Oeuvres complètes. Tome V. Correspondance 1664-1665

[p. 113]

N^o 1255.
R. Moray à Christiaan Huygens.
19 septembre 1664.

La lettre se trouve à Leiden, coll. Huygens.
Elle est la réponse au No. 1253. Chr. Huygens y répondit par le No. 1258.

A Whitehall ce 9. Septembre 1664.

Monsieur

Depuis que Jay eu la vostre du 29. dAoust, Je n'ay pas eu lopportunité de conferer auec lautheur¹⁾ du Traitte de motu musculorum touchant les experiences que vous proposez. mais il ny a pas a ce qu'il me semble, grande apparence qu'on puisse tirer aucune conclusion asseuree pour confirmer sa doctrine de ce qui arriueroit a un muscle en liant tantost une Artere, tantost une Veine. Neantmoins Je luy en veux parler, et en remettre le debat a une autre occasion. Monsieur Boile est maintenant à Oxford. Je pretends luy enuoyer vostre lettre. J'ay la mesme opinion de son liure des Couleurs que vous. il ne pretends pas y auoir beaucoup fait mais aussi ne laissera il a poursuiure le dessein qu'il a entrepris et si heureusement commencé. On se propose de l'aider en ce qui touche les experiences des Refractions. Celles dont vous parlez sont assez considerables, quoy que bien simples, et aisees, et pourront seruir peut estre à descouurir non seulement quelque causes (dont il y en peut auoir plusieurs) de chaque couleur differente qui paroist dans les Jris, mais aussi la raison de l'ordre dans lequel elles s'entresuiuent tousiours, en fin c'est une matiere de grande estendue, dont on ne peut esperer de uenir bientost à bout. En lisant ce que Monsieur Boile compte de l'organiste, Je me suis bien doubté qu'il y ait eu quelque deception ou charlatanerie.

Je ne crois pas que personne ait encore demande le priuilege des pendules sur mer. Jl est vray que ce seroit nous obliger a entrer en dispute auec celuy qui l'auroit obtenu, mais nous gaignerions sans doubte la cause, quoyque cela nous cousteroit de l'argent: mais aussi tost que Je recois lopinion de Monsieur le Comte de Kincardin (sans laquelle Je nay pas voulu demander le priuilege quoyque Jen aye le pouuoir) Je fais estat demander au Roy la patente qu'il m'a promise il y a long temps. Quoyque Je serois aise de scauoir au plus tost la nouuelle inuention que vous auez employee dans cette Horologe que vous auez nouuellement fait faire, par le detail, Je crois quil faut que Jattende que vous men fassiez faire une et me l'enuoyiez. neantmoins s'il ny a autre chose que lapplication d'un petit Contrepoids a la Rouë de Rencontre Je comprens fort bien Comment cela se peut faire en sorte qu'il la fera aller pour lespace de 3 ou 4 minutes ou d'auantage, et puis

1) W. Croone.

[p. 114]

estant en bas sera releué par le grand, neantmoins Je ne pretends pas y mettre la main que Je ne sçache vostre inuention, qui pourra estre meilleur que celle dont J'ay conceu l'Jdee, et qui seroit comme vous dites assez mal aisee a descrire sans en faire quelque figure. Jentreprendray pourtant de vous le descrire le mieux que Je puis si vous le desirez. Mais vous iugerez assez bien que²⁾ l'Jdee que Je m'en suis fabrique dans l'imagination quand Je vous auray dit qu'il y a dans la chambre du Roy une Horologe a ressort, qui fait la mesme chose, faite par Fromantel il y a 5 ou 6 ans, mais le petit ressort qui fait mouuoir la rouë de Rencontre ne se remonte que de demiheure en demy heure. Et il n'est pas difficile de trouuer le moyen d'y faire appliquer le contrepoids au lieu du Ressort. J'ay veu aussi une petite Montre pour la pochette qui fait la mesme chose que l'Horologe du Roy. Toutesfois J'approuue fort cette nouuelle alteration que cela donne au mouuement comme fait aussi Monsieur le Viscount Brouncker comme estant fort propre pour la mer en plusieurs egards, mesme bien plus que l'autre façon dont nous auons desia fait lexperience. En tout cas ne manquez pas de men faire faire une ou plustost deux selon vostre inuention. car desia Je suis hors de doubte qu'elle ira mieux que les vieilles s'il est possible, mesme sur Terre. Cependant Monsieur le prince Robert³⁾ doibt auoir les deux dont Je vous ay cydeuant parlé pour en faire experience dans le voyage⁴⁾ quil va faire. dont lune est fait a ressort et lautre a Contrepoids.

Jcy Je suis obligé a couper et Jaime mieux vous enuoyer la moitié de ma Responce a cette heure et l'autre⁵⁾ la semaine qui vient que de vous donner à la fois tout le trouble que vous auriez eu si Je l'eusse acheuce maintenant. vous l'agreerez ainsi parce que vous aimez

Monsieur

Vostre treshumble tresobeissant et tresfidelle seruiteur R. Moray.

A Monsieur Monsieur Christian Hugens de Zulichem A la Haye.

XII

2) Lisez: de.

3) Le prince Ruprecht von Bayern.

4) A la Guinée.

5) Voir la Lettre N^o. 1256.