Oeuvres complètes. Tome III. Correspondance 1660-1661

[p. 442]

N^o 942.
Ath. Kircher à R. Southwell.
[décembre 1661.]^a)
Appendice au No. 941.

La pièce se trouve à Leiden, coll. Huygens¹⁾.

Παλιγγενεσια Plantarum ex cujusque plantae semine.

1. Accipe seminis plantae cujuscunque maturrimi tempore et caelo sereno libras 4. quae in mortario contusa phialae mundae quam optimè clausae imponantur, et ne vel minimum exspirent caveto, asservata quoque phiala in loco munito.

2. Observa tempus vespertinum caeli serenissimum ut sequenti nocte rorem decidentem colligas.

3. Phialam reservatam aperi, semen contusum prius comminutumque exime, et supra tabulam vitream extende, hanc vero tabulam cum semine in horto aliquo sub dio libera expositam relinque, et ne quid roris ex tabula defluendo pereat, tabulam una cum semine in patina latiuscula collocabis. Sic fiet ut ros copiose supra semen decidens ipsi commodius naturam suam nocturnis hisce macerationibus conferat.

4. Eodem tempore ad rorem commodius excipiendum 4 palis affixum linteamen subtile et mundum extendatur, quod madore nocturno imbutum deinde in vitrum mundissimum ad 8 circiter mensuras exprimatur.

5. Porro semen imbutum rore nocturno, iterum phialae suae inclusum ne quid inde exspiret aut calore solis extrahatur ante solis exortum pristino loco reponatur.

6. Ros ex linteamine expressus saepissime percoletur, colatus aliquoties distilletur, donec omnibus faecibus et terrestri immunditia immunis fiat. Faeces vero relictas calcinabis, et salem dabunt pulcrum visu, qui mox in rore distillato dissolvatur.

7. Ros hoc sale imbutus semini in phiala asservato altitudine 3 digitorum affundatur. Deinde phiala hermetice sigillata in loco calido et humido asservetur, aut etiam sub fimo equino menstruo spatio condatur. Hoc peracto exemptam phialam considera, et semen ad instar gelatinae transmutatum, spiritum cuticulae instar videbis varijs coloribus imbutae supernatantem, et intra cuticulam terramque limosam rorem de natura seminis existentem instar segetis viridis.

a) Ex autographo Athanasii Kircheri cujus copiam faciebat D. Southwell [Chr. Huygens].

1) Ces observations ont été publiées en 1664 par Kircher dans son ‘Mundus Subterraneus,’ Tome II, Livre XII, Section IV, Chapitre V, Exemple I.

[p. 443]

8. Phialam hanc dicto modo sigillatam per totam aestatem suspende in loco, solis interdiu, noctu vero lunae reliquorumque siderum radijs pervio. Caelo vero turbato vel pluvioso in loco calido et sicco reserva, donec pulsis nubibus serenitas denuo affulgeat. Accidit nonnunquam ut opus hoc mensibus fere duobus aut citius, aliquando post annum juxta temporum constitutionem absolvatur.

Caeterum signa perfectionis operis haec sunt; Limosa materia à funda in altum extumescit spiritus et cuticulae indies durescunt totaque materia demum inspissatur. In vitro vero a solis reflexione subtiles nascuntur exhalationes, et nebulae, plantae excrescentis veluti prima quaedam rudimenta, sed debilis adhuc et sine colore et ad formam solum telae arenearum, nunc ascendentis nunc descendentis, pro radij solaris, phialam ferientis efficacia.

9. Tandem a tota illa in fundo subsistente materia spirituum cinis fit albi-caeruleus et tunc successu temporis caulis, herba et flores producuntur, in forma et specie seminis, quae species praesente calore semper comparet, eadem absente evanescit, et in chaos suum revertitur. Sic quoties ignem applicueris, toties calore suscitata materia plantae formam exhibebit, durabitque hac ratione si bene obturatum fuerit perpetuò.

Servus humillimus Athanasius Kircherus.

Superscriptio erat Arcanum παλιγγενεσιας Plantarum ex semine earum.