Oeuvres complètes. Tome II. Correspondance 1657-1659

[p. 426]

N^o 631.
Ch. Bellair¹⁾ à [Christiaan Huygens.]
4 juillet 1659.

La lettre se trouve à Leiden, coll. Huygens.
Chr. Huygens y répondit par le No. 659.

A Vaumurier le 4 Juillet 1659.

Monsieur

Je nay pas vne petite obligation a Monsieur de Marlot²⁾ de m'auoir procuré l'honneur de vostre connoissance. Mais je vous aduoüe que je vous en ay encore vne bien plus grande d'auoir voulu prendre la peine de m'escrire³⁾. Vous m'auez fait en cela vne grace que j'estime extremement, Et j'en ay vn ressentiment si grand que je ne trouue point de parolles qui puissent vous exprimer en la maniere que je le souhaitterois les tres humbles remercimens que je voudrois vous en faire. Je croy Monsieur que vous aurez bien la bonté de croire ce que je vous dis, puisque vous auez desja eu celle de me faire vne faueur si particuliere. Je ne sçay en quels termes la lettre que j'ay escrite a Monsieur de Marlot, et qui a donné occasion a la vostre, estoit conceüe; mais je suis tres éloigné d'auoir eu la pensée dont vous me parlez. Je luy ay seulement voulu tesmoigner que l'estime que j'ay pour vous est telle que si j'eusse eu a moy vne des machines de Monsieur Pascal j'eusse pris la liberté de vous l'offrir, et vous eusse prié de l'accepter. Comme je vous supplie d'accepter vn dessein⁴⁾ que j'en ay fait, et dont j'ay crû que je deuois accompagner cette reponce afin qu'elle ne paruint point en vos mains sans passeport. J'ay pour cela emprunté d'vn de mes amys loriginal sur lequel je lay pris, je veux dire vne des machines, laquelle il m'a mesme permis de vous enuoyer pour vous la faire voir si j'en trouue la commodité, Et m'a dit jusques là que s'il vous prenoit enuie d'en faire faire vne en Hollande vous pourriez la garder tout le temps dont vous en auriez besoin pour cela. Mais en attendant que je trouue cette commodité j'ay esté bien aise de vous en faire ce dessein afin que vous en vissiez tousjours par aduance la construction. Et ce dessein m'ayant tenu quelque temps a faire a cause que je n'ay pû y trauailler qu'a diuerses reprises, cela a esté cause que j'ay tant tardé a vous faire reponce. Je sçauray de Monsieur Petit⁵⁾ qui est vn libraire

1) Charles Bellair, gentilhomme du Duc de Luynes, était probablement le sils d'Antoine de Laval, Sieur de Bellair (24 octobre 1550-1631), géographe du roi. Il mourut vers la fin de 1659.

2) Guillaume Marlot naquit à Reims en juillet 1596 et mourut le 6 octobre 1667 à Tives, près de Lille. Il devint grand-prieur de l'Abbaye de Saint-Nicaise, et publia plusieurs écrits sur la ville de Reims.

3) Nous n'avons pas trouvé cette lettre.

4) Voir les planches ci-jointes.

5) Le Petit était libraire à la Croix d'Or, rue St. Jacques à Paris; il est souvent question de lui dans cette correspondance.

[p. *6]

[p. *8]

[p. 427]

de Paris qui a correspondance auec Monsieur Elzeuier, s'il enuoye quelque bale de liures en Hollande. Et en cas qu'il en enuoye je mettray cette machine dedans.

Cependant Monsieur je vous supplie auec affection de me retenir quelque petite part en l'honneur de vos bonnes graces; car je puis vous assurer que je suis vn de ceux qui feray le plus d'estime de ce bien, et qui en abuseray le moins, faisant vne tres ferme resolution d'estre toute ma vie

Monsieur

Vostre tres humble et tres obeïssant seruiteur Bellair.