Oeuvres complètes. Tome II. Correspondance 1657-1659

[p. 407]

N^o 619.
J. Chapelain à Christiaan Huygens.
15 mai 1659.

La lettre se trouve à Leiden, coll. Huygens.
Chr. Huygens y répondit par le No. 649.

Monsieur

Bien que je reçoiue tousjours le plus agreablement du monde les lettres dont vous m'honnorés de temps en temps, je suis neantmoins capable de les attendre auec patience, pource que je considere tousjours moins mon plaisir que la commodité de mes Amis et qu'vn si grand bien comme sont les tesmoignages de leur affection merite bien qu'on lachete par l'attente. Ne vous pressés donc jamais de m'escrire jusques à vous priuer de vos estudes ou de vos diuertissemens, si ce n'est aux occasions où il ira de vostre seruice et ou vous aures besoin que j'agisse pour vous. Ce que j'ay fait pour contenter vostre curiosité, touchant ce Dessein d'Horloge de Monsieur de Roberual, est trop peu de chose pour estre mis en ligne de conte. Je suis pourtant bien aise de voir¹⁾ que vous le ressentiés aussi noblement que vous faittes, et je vois auec joye en vous ce que je sens en moy auec satisfaction, je veux dire qu'il mest doux de uoir que vous mettés vn grand prix aux moindres marques de bonne volonté que vous donnent ceux qui vous ayment. Pour ce qui regarde cette horloge elle a tousjours semble a chacun de fort difficile execution et d'vn vsage bien moins commode que la vostre. Outre que c'est vne simple Idée qui n'a point encore esté verifiée par la pratique. Il y a de plus que par la propre confession de son Autheur ces deux poids du Balancier pour bien reussir doiuent estre fort gros et propres seulement a auoir leur jeu dans vn fort large espace, ce qui diminue beaucoup de la gloire de l'Inuention, quand l'effet en seroit trouué veritable. Pour ces detentes dont lexpression vous semble mystereuse, j'auois creu qu'elle ne le seroit que pour moy et m'estois imaginé que vostre grande capacité en ces matieres vous en feroit aisement penetrer le secret. Je voy cependant que vous y estes arresté et que vous n'y voyés pas plus clair que moy, ce qui me laisse en doute de la réalité de cette Inuention. Lorsque j'en doutois moins je m'estois persuade que ces Detentes qui par exemple dheure en heure deuoient se lascher, ne se deuoient lascher que par le mouuement de lhorloge prouenant de celuy du Balancier, lequel apres vn certain nombre de vibrations, lors qu'elles commencent à s'allentir et a se faire dans vne moindre estendue, reprend vn nouuel ebranslement par l'effet de ces Detentes, le laschement des Detentes seruant à renouueller les vibrations du Balancier et les vibrations du Balancier

1) Nous n'avons pas trouvé dans nos collections la lettre de Huygens à Chapelain, à laquelle celle-ci sert de réponse. Elle était incluse dans la Lettre N^o. 615.

[p. 408]

faisant aller les rouës de l'horloge jusques aux lieux ou se doiuent lascher ces Detentes, le tout reciproquement comme dans lhorloge de vostre fabrique où le pendule ayde le mouuement du balancier et le balancier le mouuement du pendule. Voila, Monsieur, quelle estoit ma pensée sur son Dessein. Car si cela estoit autrement et que ce balancier apres l'esbranlement donné d'abord eust besoin de la main encore pour ranimer son mouuement de temps à autre, l'Inuention ne me sembleroit pas digne d'estre tant soit peu considerée et a proprement parler ne seroit pas vne Inuention. Mais de quelque sorte quelle soit elle me paroist infiniment au dessous de la vostre, tant pour la beauté que pour la facilité dans les grands et dans les petits volumes. Ioüissés en donc auec seureté, et croyés qu'elle a receu parmy nous la louange qu'elle a meritée, et que les horloges de cette sorte y sont extremement estimés et recherchés. Je vous suis au reste bien redeuable de la maniere dont vous aues vsé pour la confidence que je vous auois faitte des motifs de la Guerre Academique²⁾, et de la Reuolte scandaleuse de Monsieur Menage contre le principal de ses Amis, je dis principal en affection et en offices. Je ne suis pas pour moy d'humeur plaintiue et parleuse, et a moins que de vous aymer aussi tendrement que je fais je n'eusse eu garde de me laisser engager a vous eclaircir de cette extrauagante affaire. Je m'y suis resolu pource que je scauois pouuoir le faire sans consequence dans la certitude que j'auois de vostre amitié et de vostre discretion. Jen mande quelque chose de plus a nostre cher Monsieur Heinsius³⁾ qu'il vous communiquera aux mesmes conditions s'il vous plaist. Je voy auec plaisir que vous entres si equitablement dans la justice de ma cause, qui parle a la verite delle-mesme et qui couure de confusion cette Personne mesconnoissante aupres de tous les gens de sens non seulement de mes Amis mais encore des Indifferens que la passion ou l'interest n'ont point preuenus a mon desauantage. Aussi me suffitil du Jugement public et de celuy de ma conscience, et je ne me mets point en peine de me justifier pour ne me commettre pas auec vn Ingrat. Vous voyes par la, que la perte ne men doit pas estre fort sensible, et quelle est compensée au centuple par l'acquisition precieuse que j'ay faitte d'vn coeur aussi noble et aussi bon que le vostre, lequel je vous supplie de me conseruer auec le mesme soin que je vous conserue le mien qui n'est pas tout a fait indigne d'vne si glorieuse correspondance. J'apprens auec vne extreme joye par vous et par Monsieur Heinsius que vostre Saturne⁴⁾ est sous la presse. Quelque contradiction quil puisse rencontrer il ne faut point vous rebuter pour cela. Les grandes choses sont sujettes à l'enuie et a l'injustice. Cest leur destineé et vne marque de leur veritable grandeur. Cellecy aumoins maura pour ferme Partisan je ne dis pour fort, a cause de la foiblesse de mes lumières et du peu de connoissance que

2) Voir la Lettre N^o. 606.

3) Cette lettre, de même date, de J. Chapelain à N. Heinsius, a été publiée par M. Tamizey de Larroque dans les Lettres de Jean Chapelain. Tome II. 1883.

4) Voir la Lettre N^o. 640, note 2.

[p. 409]

j'ay de ces admirables speculations. Le bon Monsieur Gassendi vous manque bien dans la publication de ce bel ouurage. Il en eust esté le Juge le plus competant et le plus sincère, et ce quil en eust prononcé eust esté dvn grand poids pour en appuyer la naissance et le progres. Je ne luy eusse pas esté inutile aupres de ce grand Personnage par lestroitte liaison qui estoit entre nous et par la pleine confiance qu'il auoit en moy. Mais Dieu ne la pas permis et en le retirant de ce Monde il nous en a voulu consoler en faisant eclôre vn Genie aussi philosophique et aussi candide que le vostre. Cest la creance de celuy qui sera eternellement

Monsieur

Vostre treshumble et tresobeissant seruiteur Chapelain.

De Paris ce 15. May 1659.

A Monsieur. Monsieur Christianus Huggens Gentilhomme Hollandois A la Haye.