Oeuvres complètes. Tome II. Correspondance 1657-1659

[p. 286]

N^o 553.
Ism. Boulliau à [Christiaan Huygens].
6 décembre 1658.

La lettre se trouve à Leiden, coll. Huygens.
Elle est la réponse au No. 548.

A Paris le 6^e jour de Decembre 1658.

Monsieur

Je vous suis infiniment obligé de tant de courtoisies que je reçois de vous, & de la faueur que vous me faictes, vous chargeant auec tant de facilité du soin et de la peine de faire fabriquer par vostre ouurier vne horologe de vostre inuention pour ce mien amy, qui la demande au prix que l'on les vend. Comme il ne s'est pas expliqué sur le choix de celles qui sont a ressort ou a contrepoids, & que je n'ay pas aussi pensé a cette difference, je ne vous ay pas marqué de laquelle des deux manieres il la desire: Je l'attends entre cy & que je ferme mon pacquet, & s'il vient j'adjousteray en postcrit ce qu'il m'en dira.

Vous me comblez au reste, Monsieur, & de ciuilité & de bienfaicts, puis que vous auez eu la bonté de trauailler aux verres des lunettes de vostre inuention, que je cheriray autant que mes yeux, & que je ne manqueray pas d'enchasser dans vn beau & bon canon, pour la fabrique duquel vous me ferez vne singuliere grace de m'enseigner ce qu'il est necessaire d'y obseruer pour y bien reussir.

La difference que vous auez trouuee entre l'ancien & le dernier vient sans doubte de ce que la forme deuient plus concaue vers le milieu que vers les bords, en s'vsant dauantage dans ce fond de concauité que vers les bords, que l'on euite, de peur de sauter hors de forme, & de casser ou de rayer le verre.

Je vous prie de me faire scauoir le temps de vostre obseruation de ☿, si vous l'auez pû voir au soir quelques jours apres sa plus grande digression, vous aurez aussi pû apperceuoir quelles sont ses phases. J'ay tousjours remarquai vne chose, que le Soleil estant sur la sin des ♓ & dans tout le signe d'♈, ☿ apparoist le soir moins clair qu'alors que nous le voyons aussi le soir lors que le Soleil est sur la fin du ♉ & des Π. ce que pareillement j'ay obserué qu'il paroist plus clair le matin lors que le Soleil est dans ♎ & bien auant dans le ♍ que lors que le Soleil est dans le ♂. sans doute que vos Lunettes vous auront monstré quelque chose de cela.

Je suis bien peine de prendre parti pour la voye par laquelle vous prendres la peine de me les enuoyer. Le port ne me faict pas peur, mais comme l'on defaict les pacquets a Peronne, & quils donnent des coups de cousteau dans les pacquets, afin de voir s'il n'y a point d'argent ou de pierreries dans les pacquets, j'apprehenderois, & sans doute il arriueroit ainsi, que voyant celluy que vous m'enuoyeriez estre dans vne boite de bois qu'ils auroient la curiosité d'ouurir & de voir & peut

[p. 287]

estre d'escroquer les verres. C'est ce qui faict que je tombe dans vostre sentiment qui seroit de me l'enuoyer par la voye de quelque amy. Que si vous auiez quelque maistre de nauire de vostre cognoissance qui s'en vint a Rouen vous pourriez addresser le pacquet a Monsieur Jacques le Tellier¹⁾ marchand rue de la Magdelaine a Rouen, qui me le feroit tenir par le Messager fort seurement & il faudroit l'embourrer de papier afin quil fust plus gros; sinon vous vous seruirez de quelquun de vostre cognoissance; mais pour certaines raisons ne vous seruez point de ceux que Monsieur de Thou pourroit renuoyer de sa maison. Mais bien si Monsieur de Thou confioit quelque chose a quelquun pour Madame de Thou vous pourriez y joindre les verres & les luy addresser.

Je n'ay pas ouy parler de Monsieur Paschal il y a long temps, je m'informeray s'il a faict imprimer vne fueille²⁾ qui contienne la resolution des problemes de l'incognu. Pour Monsieur de Roberual il a faict vne sottise chez Monsieur de Montmor, qui est comme vous scauez homme d'honneur & de qualité, il a esté si inciuil que de luy dire dans sa maison, s'estant picquez sur vne des opinions de Monsieur des Cartes que Monsieur de Montmor approuuoient³⁾, qu'il auoit plus d'esprit que luy & qu'il n'auoit rien de moins que luy que le bien & la charge de Maitre des requestes, & que sil estoit Maitre des Requestes, qu'il vaudroit cent fois plus que luy. Monsieur de Montmor qui est tressage luy dist, qu'il en pourroit & deuroit vser plus ciuilement, que de le quereler & le traicter de mespris dans sa maison. Toute la compagnie trouua fort estrange la rusticité & pedanterie de Monsieur de Roberual.

Pour l'horologe qu'il dit auoir conceue dans l'esprit, je doute fort que l'inuention vaille quelque chose, pour ce quil est tres-sterile en inuention, & jusques icy nous n'auons rien veu des productions de son esprit qui soit bien excellent. Je ne veux point vous flatter, mais je doute que toute autre jnuention puisse arriuer a la vostre. Je prie Dieu qu'il vous conserue longues annees en vigueur & en santé afin que vous donniez au public des inuentions qui sont non seulement tres subtiles, mais encores plus tres vtiles. Je vous prie aussi de croire que je suis,

Monsieur

Vostre treshumble & tresobeissant seruiteur Boulliau.

1) Jacques le Tellier tenait à Rouen un magasin d'instruments de physique.

2) Voir la Lettre N^o. 548, et la note 2 de cette Lettre.

3) Lisez: approuvoit.