Oeuvres complètes. Tome I. Correspondance 1638-1656

N^o 302.
J. Hevelius à Christiaan Huygens.
22 juin 1656^a).

La lettre se trouve à Leiden, coll. Huygens.
Elle est la réponse au No. 267. Chr. Huygens y répondit par le No. 318.

Nobilissime ac Doctissime Vir.

Non meis sanè de re Astronomicâ meritis, quae admodum sunt exigua; sed singulari Tuae humanitati, summoque Tuo erga me affectu tribuendum puto, quod

a) ℞ 21 Jul. [Chr. Huygens].

[p. 435]

et mihi quantocyus observationem tuam circa Saturnum habitam, et quidem per fratrem tuum¹⁾, Juvenem Nobilissimum ac Praestantissimum, communicare haud gravatus fueris. Quibus observationibus coelestibus, ut magnoperè delector, sic profectò rem mihi fecisti multò gratissimam: quare non solum gratias ingentes Tibi ago et habeo; sed et allaboraturus, ut nullo non tempore par pari rependam. Gratulor felicitati tuae, lateronem ex numero errantium circa Saturnum detexisse: etsi, verum ut fatear, de illo nihil certi adhuc pronuntiare audeam: vidi, et notavi quidem saepissimè prope Saturnum Stellulam: cum verò singulis continuis diebus Planetam observare rarò operam dederim: idcircò, utrum ea stella, fixa, an verò erratica fuerit? minimè deprehendere potui. Imposterum tamen paulò attentius oculos ad istud phaenomenon dirigam, quò et ego aliquid certius statuere possim. Ad vicissitudinem verò facierum phasiumque Saturni, iam à multis annis diligentissimè attendi, ac etiam annuente Divino Numine certam eius periodum, meo judicio, penetravi. De quo Phaenomeno, quales observationes obtinuerim, et quid sentiam, ex hac dissertatiunculâ²⁾ pluribus intelliges. Quid tu autem hac de materiâ inveneris, ac iudices; num negotium hocce rectè comprehenderim nec ne? gratum erit primâ occasione percipere.

Interea Vale Vir Nobilissime et me ama. Dabam Gedani Ao. 1656 ipso die Solstitij.

Tuae Nobilitatis Studiosissimus Johannes Hevelius

Consul Gedanensis.³⁾

Nobilissimo ac Doctissimo Viro, Domino Christiano Hugenio.

Hag. Comit.

1) Philips Huygens.

2) Johannis Hevelii Dissertatio de Nativa Saturni Facie, ejusq; variis phasibus certa periodo redeuntibvs Cui addita est, tam Eclipseos Solaris anni 1656 Observatio, quam Diametri Solis apparentis accurata dimensio. Ad Serenissimum Ludovicum Deodatis regis Christianissimi patruum Gastonem Borbonium, Aurelianensium Ducem &c. Gedani edita Anno Christianae 1656. Sumptibus Autoris. Typis Reinigeri. in-folio.

3) Sur la troisième page de la lettre Chr. Huygens a écrit au crayon:
Chartaceae figurae. directio ansarum. linea per medium. anglorum consentiens observatio.