Oeuvres complètes. Tome I. Correspondance 1638-1656

N^o 60.
A. Rivet à Constantyn Huygens, père.
23 mars 1649.

La lettre se trouve à Leiden, coll. Huygens.
Elle est une réponse au No. 59.

Monsieur.

Le pacquet qui vous aura esté rendu par mon filz¹⁾ vous aura faict voir que nous ne nous sommes pas endormis sur cette insolence commise par nos duellistes. Vostre Ludovic sçait aussi qu'outre l'animadversion Collegiale, je luy ai faict en particulier la censure que meritoit sa faute. Il n'a pas esté l'agresseur, un fripon nommé de Vries filz du Recteur de la Haye²⁾, est celuy qui l'a provoqué sur un fort maigre subjet & apres boire. Mais il ne devoit respondre a cet appel que par mespris, & en donner advis a son Regent qui asseure n'en avoir rien sçeu qu'apres leur sortie au matin; car la nuict se coucha et passa sur leur folie. Pour le Cavalier, combien qu'il aye protesté n'estre pas sorti avec eux, & les avoir suivis en intention de les separer: Neantmoins, pour n'en avoir pas adverti, & empesché leur sortie Mons. de Hauterive l'a faict mettre deux jours chez le Prevost, & n'en est sorti, qu'apres que le Recteur luy a representé qu'il n'estoit pas si fort coulpable: sur quoy mon dit Sr. de Haute-rive a faict faire une proclamation a son de tambour defendant aux Cavaliers & soldats de se mesler en façon quelquonque dans les querelles des Escholiers sous griefves peines. Vous aurez veu ce que le Conseil Academique requiert de

1) Frédéric Rivet, fils d' Andreas Rivet, avait beaucoup voyagé et devint (1647) gentilhomme de la cour de la Princesse d'Orange.

2) Johan de Vries était déjà en 1623 attaché à l'école latine de la Haye: il en devint le recteur et le 19 mars 1637 ses ‘gages’ furent portés à fl. 800. Il mourut en 1657.

[p. 105]

nous, sur quoy le Recteur attend vos responses, pour faire aussi une nouvelle defense au nom de son Altesse. Et quant au reste, j'ay tousjours esté avec vous d'advis que les Escholiers ne devoient point porter l'espée tant qu'ilz seroient escholiers, si ce n'est qu'ilz aillent en voyage. Mais je n'ay pu obtenir jusques ici qu'on leur aye defendu, pource qu'on m'objectoit qu'es autres Academies cela leur estoit libre, combien que je disse que de mon temps a Leyden, on le les voyoit point de jour, gladiatos: Et que je trouvey fort estrange de les voir entrer dans les auditoires, avec l'innocente chamarrée d'or, un grand baudrier & l'espée, sans manteau, & opposer en disputes en cette posture l'espee au costé. Les vostres ont esté des premiers, apres un jeune homme de Dort nommé Berc, qui y adjoustoit le pennache. Ce que je vous di, afin que vostre autorité paternelle, soit joincte a celle, des curateurs, pour leur faire quitter cette posture, laquelle par regle generale on prescrira a tous les autres. J'ay aussi appris depuis peu qu'on a mis un anglois valet du Capitaine Courtenay pour Oeconome. qui tient la une espece de taverne, & donne aux Escholiers en leurs chambres de quoy faire des beuvettes. J'ay souvent dit, que ne pouvant icj qu'executer ce que nous aurions conclu ensemble, il seroit du tout necessaire que deux fois l'année pour le moins nous nous y vissions ensemble, que vous y verriez mieux les defauts, & qu'on y remedieroit plus aiséement. Et que cela tiendroit mieux le monde en debvoir, quand ilz verroient nostre consentement en toutes ces choses, & orroient nos ordres en presence. Sur quoy j'attendray vos responses, & pour ce qui reste a faire là me reposeray sur vostre soin, vous baisant cependant tres-humblement les mains, & a Monsieur de Henvliet, & demeurant d'affection,

Monsieur

Vostre tres-humble & obeissant serviteur André Rivet.

De Breda le 23 Mars 1649.

Depuis cette lettre escrite vostre Ludovic m'est venu trouver, ayant appris par Mons. Renesse que vous m'aviez escrit de son faict. Je luy ai dit ce qui en estoit, Et exposé particulicrement les grandes raisons que vous aviéz de luy tesmoigner vostre desplaisir, luy ai derechef representé l'offense contre Dieu, le danger auquel il s'est mis, et les grands inconveniens qui en pouvoient arriver, le mauvais exemple qu'il avoit donné &c. Je l'ay trouvé fort abbattu. Il m'a dit qu'il s'humilieroit devant vous par une lettre d'un filz repentant, et qu'a l'advenir il se gardera de semblables fautes. Il estoit en habit decent, sans baudrier & sans espée; J'espere que cela luy servira, Je ne manqueray aux occasions d'y faire ce que mon debvoir, & la confiance que vous prennéz de moy requierent.

A Monsieur, Monsieur de Zuylicheim Conseiller et Secretaire de Son Altesse, et Curateur de l'Illustre Eschole et College d'Orange.

A

La Haye.