Momenta desultoria

[p. 73]

cIɔ Iɔ c xxxɪ.

In H. Grotii Institutiones Iuris Hollandici.

QUae patriam observat Grotius servare, reservat:

Quae putat in Patria non patria esse, putat.

Quid scriptore putas, Lector, tam sana putante,

Quid melius tam non sana putante putas?

Non puto, quae putat hic lectu benè digna, putanda,

Quae putat hic lectu non benè digna, puto.

Ad Arn. Vinnium I.C. Iurisprudentiae Contractae
Libros edentem.

OBstupui de re dictâ cum dicere velles,

Posse, vel ut posses dicere, velle legi:

Obstupui magis, ut Legum prudenia mole

Penè suâ imprudens obvia facta stetit:

Quasque vagis, inquam, setis tot saecula scopas

Laxavistis, opus qui redimiret erat.

Ergo forum verris, Vinni, non fasce soluto;

Laudo licet serae sedulitatis opem;

Hàc tua tot veterum phaleris compendia praestant,

Quà minor est pugni robore passa manus.

In divitem deformis aedificii autorem.

VItruvI atque Midae rudis indigestaque moles,

Auri stultitiam passus acervus hic est.

Dispiciant superi, quae nos fortuna beatos

Tertia, nec dives, reddiderit, nec inops;

Si quo nîl habuit paupertas durius in se,

Ridiculos homines nunc faciunt & opes.

[p. 74]

Mutilus manu dextrâ globo ferreo ablatâ.

O Si dextra minùs, quanto magè dextra fuisset,

Quae nunc laeva minùs, sors mihi laeva fuit!

Certè laeva magìs, non tam malè laeva fuisset,

Quae sic dextra nimis non bene dextra fuit.

Ad Adrianum Vergoes I.C. in Concilio Principu Collegam de Domo natali Ioannis Secundi.

GOesi, digne meo sanguis cognate Secundo,

Digne vir egregii posteritate viri;

Sic vacat, & nosti, rogo, quo pulcherrima magnum

Nascier indigenam viderit Haga loco,

Certus honoratos lauro vestire penates,

Certus ad augustos addere thura lares.

Ut vacet, & nôris, jam non rogo; clarior Haga

Ambiguo, in partem laudis ubique venit.

Vera licet lateat: non est ingloria de qua

Forsitan hac dubites vagiit ille domo.

In adversarium Iudicii aleam detrectantem.

POscit restitui Titius quam Maevius agnam

Possidet, &, si vis, lege probemus ait.

Maevius, agna mea est, clamat, vivamus amici;

Nil mihi cum turbâ judicii, agna mea est.

Dicite, Causidici, num sit victoria pluris,

Nec cecidit caussâ qui cecidisse timet?

AEnigma de speculo.

QVaero mea an par sit superis an iniqua potestas:

Res unas facio non faciendo duas.

[p. 75]

AEnigma de Codice compacto.

ADverte Stoa, versor in tuo sacro;

Quis liber & non libet & tamen est liber?

De Amico gratulante natalem terii filii.

QVi ter felici, feliciter, inquit amicus,

Quà ter sum felix non velit esse quater.

Ad apostatam proelio navali elapsum.

NAufrage, sed Fidei primùm patriaeque sacrorum,⁺

Agnati decoris mox & amicitiae;

Quò fugis infensi demens compendia Fati?

Oblatae poteras mortis obire diem.

Non poteras; instat gravius, quo plectere discas

Naufragium superos non sine naufragio.

+ Nempe una nave, cruentis Fluctibus, & tardâ per densa cadavera prorâ, Iuv. 10.

Epitaphium Varennae, Nobilis Galli,
Musici elegantissimi.

ORpheiam terris animam raptura Varennae

Impia cum foderet nobile sica latus,

Creditur, occluso voci pulmone, canorum

Vulnus olorinis ingemuisse modis.

Mittite, qui vestro tegat hìc de marmore, Thebae,

Aurito pueri Musicus ossa lapis.