Momenta desultoria

Monsieur;

I'avoy escrit ma derniere lettre pour vous dire Adieu: lors que j'ay receu vostre excellent livre, qui m'a faict recommencer & reprendre de nouvelles brisées, puisque le present m'y convie, qui contient quasi tout ce qui est dans la nature, & partant pour lequel il me faudroit employer toutes les creatures pour vous en remercier. Je vous asseure que si j'avois autant de Genie à la Poesie que vou, je mettrois toute la Physique de M. des Cartes en vers, comme Lucrece a faict celle de Democrite: mais avec plus de grace. Car je vous imiterois: c'est à dire j'en ferois une partie en vers Heroiques, d'autres Saphiques, d'autres Jambiques & c. selon le caprice qui me prendroit. Si tost que je l'eu receu, le S^r. de Gastines, le Pere, homme de bon Esprit, trouva l'Epigramme gentil à l'ouverture du livre, où vous descrivez la femme noire soubs son voile, & fut ravi aussy bien que moy, de la preface admirable de M^r. Barlaeus. Je vous donne à penser, comme je vay devorer &

[fol. ****8r]

lire & relire tous vos vers, qui ont le sel de Martial, & la richesse des odes d'Horace. Au reste les vers escrits de vostre main, au commencement de vostre livre, m'obligent encore plus que tout le livre, puis qu'ils me donnent le droit de vous estimer mon frere, quoy qu'il foit bien plus à propos de renverser & mettre le maximus pour vous, que l'on vous donneroit malgré vous, puis que vous y obligez par tant de tiltres. Je croyois y trouver des vers Italiens, Flamens, Grecqs & François, comme l'on m'avoit escrit de la Haye, mais j'ay esté trompé: peut estre les avez vous faict mettre en un volume separé. Si vostre Muse descrivout un siege, un secours, & une prise de ville, je croy que l'on auroit grand plaisir à la lecture de tels vers. Mais cela est, peut estre, de trop longue haleine. Ne vous forcez en rien, ce qui est plus naturel sera plus beau.

XX. April. 1644.

M. MERSENNE.