Momenta desultoria

[fol. **5v]

In Hagam vocalem.

QVisquis es, Augustam peregrè qui tendis ad Hagam,

Parce foris Hagam visere, vise domi.

Non opus est Hagam nunc ire, viator; ad Hagam

In patriâ lector stare, jacere potes.

Ante focum residens, natali lentus in umbra,

Haga potens quae sit tota videre potes.

Magnus eam, pedibus divino carmine vinctis,

Nunc tibi circumfert, nunc tibi donat Eques.

Nunc peregrina sibi, nunc se divisa per Orbem

Hugeniâ didicit se tibi voce loqui.

Templa, domus, lapides, vicique, viaeque loquuntur;

Ille pater vocum mille dat ora Loco.

Muta Loci natura, redi. mox Haga tacendo

Quale peroravit semper adoret opus.