6363. Aan H. de Lionne. (H.A.)
Ne pouvons nous jamais laisser le Roy et ses ministres en repos pour ceste malheureuse occupation d'Orange? Et ne voyci pas une des plus grandes indignitez qu'on nous y puisse faire souffrir? S.M. vient d'ordonner que les outils de la Monoye nous soyent restituez, et on ose pretendre de nous les faire achepter; on veut nous vendre ce qui est à nous. Je vous supplie d'en veoir le detail au premier article des extraicts cy joints, et aux trois autres le peu d'estat que nous pouvons faire de veoir obeir le Roy en ce que S.M. de sa generosité a faict prescrire à ses officiers en ceste miserable place avec tant de punctualité. Ce sera donc tous les jours à recommencer. Quand il n'y auroit que cela seul, n'en seroit-ce pas assez pour lasser et degouster S.M.té de la possession d'un bien d'autruy, qui n'est bon en rien à son service? Justice, Monsieur, justice, et nous la recevrons en grace. Que si vous avez la bonté de bien penser à l'ouverture que j'ay eu l'honneur de vous faire de bouche, je m'asseure que vous y trouverez et l'entiere satisfaction du Roy, et le droit chemin de nous delivrer
Auteursrecht onbekend