Briefwisseling. Deel 6: 1663-1687

6238. Prinses Amalia van Oranje. (H.A.)

Je ne sçay si je doibs croire que le lord Holles ayt enfin faict son entrée, et eu sa premiere audience. A la bonne heure! J'espere que bientost nous verrons ce qu'il a pu faire et obtenir pour nos affaires d'Orange. Je n'oserois encore m'en promettre grand chose; mais en tout cas nous n'aurons plus rien a attendre apres ce dernier coup. Je suis tres-aise qu'il est si bien instruict sur tout, et si animé a agir vigoureusement, et resolu de ne s'arrester pas a une simple harangue de bouche, mais encore de mettre tout par escrit, ce qui servira tousjours a une plus entiere descharge. J'attendray donc avec impatience ce que vos prochaines m'en diront. - J'approuve fort la lettre que vous avéz

[p. 50]

escritte a M.^r de Lionne¹⁾, pour luy faire cognoistre les outrages qu'on nous faict a Orange sans en demander directement reparation au Roy, qui y pourroit pourtant remedier en nous rendant le total. Elle est couchée en tres bons termes et tres forts. Je voudrois que Sa Maj.^té eust la patience de se la faire lire, et que M.^r Colbert y fust present. Vous auréz veu par mes dernieres qu'elle est tres-conforme a mes sentimens, et vous avéz tres prudemment faict de n'y rien toucher de la derniere violence, puisqu'elle est de religion, estant tres-certain que la conjoncture presente n'est pas favorable pour des affaires de cette nature, quelques justes qu'elles soient. Je suis bien aussi de vostre opinion qu'on n'en devoit pas avoir esté faire tant de bruit, jusques a deputer au commandeur de Gaut a Toulon, puisque cela ne sert qu'a animer davantage, mais se contenter de protester, comme vous dites, pour la conservation des droicts du Prince ..... A la Haye, ce 27^e Mars 1664.

J'avois preparé cette lettre pour estre signée par S.A. Madame. Mais estant fort interrompue de visites d'importance, elle m'a faict commander de la signer et de vous l'envoier.

Fréd. Rivet.

1) No. 6236.