Briefwisseling. Deel 5: 1649-1663

5843. C. van Beuningen⁴⁾. (H.A.)

Au reste, Monsieur, j'apprens avec un extreme estonnement et deplaisir, que jusques ores vous n'ayez pû sortir, comme vous deviez, d'une affaire où la raison et la justice sont si manifestement de vostre costé, et où ceste raison et ceste justice se trouvent appuyées d'un si bon patron que vous. Le tort qu'en ceste occurrence on faict à M. le Prince d'Orange est encor beaucoup moindre que celuy qu'on faict au Roy tres-chrestien. Nous trouvons icy des gens qui disent, nil superesse certi, cum a iure et ratione discessio facta est, et appliquent ce passage à l'affaire d'Orange, taschans de diminuer par là la fiance qu'on pourroit avoir en tout ce qui a esté arresté entre la France et nostre Estat, et encor se pourroit traicter et conclurre entre deux. Surtout ils veulent faire valoir ce que dessus pour obscurcir le lustre et la gloire que ce grand Roy faict rayonner de toutes parts, et laquelle aussi, pour autant que concerne les vertus quae sunt viri boni, nous eussions pû faire esclatter icy avec un advoeu et applaudissement universel de tout le monde, si nous ne nous fussions trouvez embarassez à excuser les difficultez injustes que vous rencontrez en vostre negocation. Cependant, Monsieur, nous n'avons pas manqué d'asseurer publiquement Messeign.^rs les Estats Generaulx que vous obtiendriez le contentement tout entier; et pour Madame la Princesse Douariere que la grande experience a rendu si prudente, apres luy avoir parlé de vostre conduitte comme il appartenoit, tout ce que nous avons pû luy dire pour excuse, c'a esté que ce retardement qui vous accroche jusqu'à present, semble n'estre causé principalement que par les passions de quelques gens qui s'advisent de couvrir l'iniquité du pretexte de la religion, laquelle au contraire debvroit estre la source de toutes vertus, mais qu'à la fin sans doubte l'equité et la justice tant connue du Roy dissiperoit tout cela, comme je le souhaitte de tout mon coeur, qui suis.... Amsterdam, le 20^e Juin 1662.

4) Kopie van Huygens, die er boven schreef: Extraict d'une lettre escritte par Monsieur van Beuningen, à Amsterdam, le 20^e Juin 1662. - De brief was in het Nederlandsch; de vertaling is van Huygens. - Zie No. 5840.