Briefwisseling. Deel 1: 1608-1634

917. Aan lady Stranges⁴⁾. (K.A.)

Le tesmoignage que chascun doibt à la verité me porte à vous importuner de ce mot, et à vous dire à l'instance de Mad.^e la comtesse de Levenstein⁵⁾, qu'il luy a pleu me communiquer les pensées que son affection tres particuliere en vostre endroict luy a faict naistre pour le bien de vostre service, en une affaire dont j'estime qu'elle desirera vous faire plus d'ouverture de sa main propre, qu'il ne m'appartient de vous en faire de la miene. Il me suffira de vous asseurer, que je l'y ay veu agir aveq autant de zele que vous en pourriez attendre d'une personne entierement vouée à vostre service, et que pour moy, ceste siene ardeur si vive m'ayant incité à l'y seconder de mon costé, où j'ay pensé le pouvoir aveq plus d'efficace, j'ay jugé y avoir trouvé des inclinations qui pourroyent vous estre utiles, si ladite affaire estoit meure jusqu'au point d'y pouvoir travailler, comme il faut avouer qu'encor ne l'est elle pas. Pour les malheurs, Madame, arrivez à Monseigneur le comte Laval⁶⁾, vostre frere, que je feroy paroistre d'avoir tousjours autant regrettez que personne, je defereray encor cecy aux commandemens de Mad.^e dame de Levenstein, que de vous tesmoigner, comme depuis fort peu Monseigneur le Duc de la Tremouïlle⁷⁾ a faict paroistre en paroles tressages et prudentes à S. Ex.^e, combien il improuve le procedé dudit Seigneur, comte de Laval, envers un oncle qui n'a cessé de l'obliger et gratifier de tout ce qui s'est peu d'honesteté et de courtoisie. Tout le monde sçait cela, Madame, et ne croy-je pas que vous en attendiez mes verifications. Mais le mal est deplorable plus que remediable, à mon advis. Si prieray-je tousjours Dieu de le ramener à soy, et vous, Madame, de disposer de mes

4) Kopie. - Zie over Lady Stranges, blz. 204.

5) Zij behoorde tot het gevolg der Koningin van Boheme.

6) Zie blz. 428.

7) Henri de la Trémoïlle, de oudste broeder van Charlotte; zie blz. 109.aant.

[p. 464]

entremises en ce que vous y trouverez de mon pouvoir. Car aveq verité, comme j'ay travaillé de bonne volonté à le retirer de ses esloignements, aussi me lairray-je employer à le reconduire, s'il est possible, d'ou il a voulu se detascher contre les prieres et advertences de ses serviteurs, dont le moindre, mais le plus zelé a tousjours esté .... 17 May 1634.