Milenus clachte

[p. 122]

[Promotheus heeft die Egyptenaren]

Promotheus heeft die Egyptenaren,

Om dat die Princen min souwen zijn verbolghen

Op die lantsaten, (naer Plutarchus verclaren)

Die wetten ghegheuen die hier naer volghen.

Wy commanderen nerstelijck en beuelen,
Dat die Princen, om eenich onghelijck
Dat hun es aenghedaen, niet en selen
Wrake doen ouer arm noch ouer rijck.
Want die goede Princen, t'es autentijck,
En behooren gheen injurie te wreken;
Maer wel te defenderen in t'publijck,
Die gheinjurieert zijn oft versteken.

Wy beuelen noch en statueren,
Dat alle die Princen die van nu voordaen
Die Republijcke sullen gouverneren,
Gheen weirbaer wapenen en sullen doen aen,
En noch min met gheoffenseerde gaen:
Want een Prince en mach niet wreet zijn van mijne,
Noch vitieus, dat hy in vreese sou staen
Vande lantsaten vermoort te zijne.

[p. 123]

 

Wy en willen gheensins ghedooghen = oock,

 

Dat die Prince iemant doode met zijn handen:

 

Ia, noch dat hy met zijne ooghen = oock

 

Iemant sou sien dooden in zijn landen:

 

Want t'souden wesen inreparabel schanden,

 

Soude een Prince iemant sien benemen t'leuen:

 

Maer t'es loflijck, als Princen eenighe vanden

 

Lantsaten hun misdaden vergheuen.

FINIS.