Den generalen loop der werelt

(1612)–Johan Baptista Houwaert– rechtenstatus


Cort begrijp van dit teghenwoordich Boeck. Leest hier hoe al die in t'svverelts conroot, D'een voor en d'ander naer moeten campen sonder dralen, Teghen Atropos de Goddinne vander Doot Die een ieghelijck met haer dry vassalen, Te vveten sieckt accident oft executie doet halen. En t'doots cheys betalen.

[Folio Hvr]
Den vreesselijcken camp der doot. Het derde Boeck NAer dat ick dees dry Nijmphen dit hadde gheboden, Nam ick de reyse aen naer Atropos Landouvven, En ick ben voor een Woestyne ghereden, Daer ick vont ligghen boven en beneden, Ontallijck veel doode Mans en Vrouvven, Som laghen sy daer met d'armen en beenen affghehouvven, D'ander die vvaren met boghen en bussen doorschoten, D'ander laghen en sielbraeckten in svvaer benouvven, D'ander laghen op een versmacht en ghetast met roten, D'ander die crackten daer noch de bitter noten Der doot, in de grachten poelen en beken, D'ander vverden van Raven en Dieren tot op de coten. Deirlijck verslonden eer sy vvaren besvveken. SVmma daer lach soo veel volcx onder de solen, Dat de vveghen met doode lichamen vvaren bedeckt, T'ghevvest vvas soo vol speloncken diepe straten en holen Dat daer niemant reysen en cost sonder dolen, De locht vvas vol stancx en van den nevel infeckt, D'eirde vvas onvruchtbaer besolfert bepeckt, Crielende vol Serpenten Wormen en Pieren, Van den ghestolden bloede vvaren leelijck bevleckt, De staende vvateren poelen beken en rivieren, Ick hoorde de Hecaten daer eyselijck crayieren, En de harpijen maecktent daer over al onreyn, Veel Vossen Beiren Wolven Tygren Vlen Gieren, Sach ick in desen verschrikelijcken pleyn.
[Folio Hvv]
DAer en cost gheen sonne noch mane gheschynen, Daer en costen gheen planeten noch sterren blincken, De cruijten orboorlijck tot der medecynen, Die moesten door de quade lochten verdvvynen, De fonteynen vvaren veel bracker om drincken, Dan eenighe galle diemen sou moghen schincken, De vvyngaerden en brochten gheen vruchten voort daer, Boreas cost de planten en boomen soo crincken, Dat sy al sonder blaren stonden onvruchtbaer, Het reghende oock bloedighen reghen voorvvaer, Het heeft daer seer eyselijck gheblixemt en ghedondert, En daer vielen uyt de locht steenen svvaer. Daer ick aff vvas verschrickt en seer vervvondert. HOe dat mijn Peirt goeden vvil die per is ghetreden, In dese vvoeste verschroomelijck bosschage, Hoe dat ick vont en sagh ter selver steden, Meer vvonders en vremder affgrijsselijckheden, Maer hoevvel datter vvas een verdrietelijcke passage, Soo en vvas daer gheenen grouvvel noch oultrage, Die my mijn goede resolutie meer cost beletten, Want gratie die hadde mijn corage, Soo versterckt dat my gheen teghenspoet en cost besmetten, Ten lesten soo hoord'ick Atropos trompetten, Seer eyselijck slaen te strije te strije, En ick sagh veel Boeren Borghers en cadetten. Naer t'perck loopen om te bevechten haer partye.
[Folio Hvir]
IN den inganck van t'perck stont eenen Piroen, Daer in roode letteren op stont gheschreven, Alle die comen in dit regioen, T'sy tot van tijen oft op vvat faysoen, Daer Atropos aff is Gouvernante verheven, Die moeten hier al t'samen laten haer leven, Want dit is de valle der consummatie, Dit is de haven daert al compt in sneven, Daer alle Menschen eynden haer navigatie, Dit is t'slot van t'svverelts dominatie, Dit is het perck daer alle u voorsaten, Ten eynde sonder uytstel oft appellatie. Hebben moeten stryen en haer leven laten. ACcident cranckheyt en executie, Sijn de dry Capiteynen diet hier al beslichten, En die explooteren Atropos resolutie, Al die vveygheren te betalen haer contributie, En al die hun teghen haer hoogheyt oprichten, Die moeten teghen accident hier vichten, Als hy faijlleert compt cranckheyt in de bane, Die niet teghenstaende beternisse oft verlichten, Die somtijts den strijt verachteren soo pijnt te slane, Dat daer een ieghelijck ten lesten moet ane, En executie brenghtse om den hals, Al die oyt plochten haer vonnissen t'onfane. Sonder aenschou oft sy te recht zijn gevvesen oft vals.
[Folio Hviv]
ALs ick het opschrift hadde ghelesen, Van desen Piroen vvert ick soo seer besvvaert, Dat my thaeir is over eynde gheresen, En dat ick soo verschrickt vvas door desen, Dat my schier vveer berouvven vvas dat ick de vaert, Hadde aenghenomen maer nae Ridderlijcken aert, Soo maeckte ick eenen moet en nam corage, Hoevvel ick buyten t'perck bleef daer veel volcx vvas vergaert, Die oock som ghesummeert vvaren tot die voijage, Iae t'volck quam daer soo dick oft sy in pelgrimage, Vlytich hadden ghegaen ten selven tijen, Sy meynden meestendeel te hebben avantage. En van duysent niet een die socht te stryen. DOen sagh ick Atropos voort comen met haer adherenten, Soo bitterlijck siende oft sy hadden ghedroncken veriuys, Wel te recht gheleken by de Maelcontenten, Die verchiert vvaren met een lanck vvit cruys, En d'vvelck my docht vvesen noch meerder abuys, Haer ghecrolde haeiren vvaren al Wormen en Pieren, Achter haer vvert ghedraghen een berderen huys, Vol Slanghen Serpenten Hertissten en vvilde Dieren, Daer naer volghde persecutie met eender banieren, Consummatie met een ander sittende op t'vvee Peirden, Die seer magher vvaren en goet om bestieren. Op d'een banier stonden schuppen op d'ander svveirden.
[Folio Hvijr]
DEes tvvee banieren die vverden gheplant, Van dees tvvee baroenen en cadetten, D'een op den eenen d'ander op d'anderen cant, Vander lijsten die sy daer aen naghelen vvant, Syse anders niet vast en costen ghesetten, Doen sloeghen vveder soo eyselijck de Trompetten, Dat vvt t'volcx ooghen spronghen de tranen, Men hoorde daer doen niet dan van verpletten, En van groote svvaricheyt vermanen, Alle die daer quamen binnen der banen, En costen niet gheraken van dijer stadt, Sonder te stillen haer hooghmoedigh vervvanen. En sonder met lau vvater te maken haer vvangen nat. ATropos herauten sijn doen ghecomen, In het perck die vvaren ghenomineert, Force en bedvvanck tvvee Ridders vol vromen, Die elck een rolle in de hant hebben ghenomen, En met luijder stemmen in gheroepen en gheciteert, Al die sy in de triumph' feest hadden ghesummeert, En noch leefden daerenboven deden sy defentie, Dat niemant hoe neder oft hooghe ghequalificeert D'een d'ander en souden doen assistentie, Maer gheboden door Atropos magnificentie, En op de pene van haer te castijen, Dat elck op sijnen tour met vehementie. Teghen Atropos dienaers alleen moeste stryen.
[Folio Hvijv]
DE Mareschal van Atropo die groot van bestier // vvas, Die vvas Overlast ghenoempt soo ick heb' onthouvven, In d'aensien docht my dat hy vvreet en fier // vvas, Noch sagh ick dat Vreese die cancellier // vvas, Die den seghel droegh van svvaer benouvven, Het staketsel en lysten vvaren van eender vrouvven, Droefheyt ghenaemt ghetimmert en opgherecht, De rustplaetssen vvaren vol ghecrijchs en rouvven, Suchten en duchten hadden begraven den grecht, De crijt vveirders vvaren ghemaeckt heel slecht Van tvvee vileynen diemen over al verstooten siet, En die de tvvee iutreijen bevvaerden van t'ghevecht. Te vveten felle versmaetheyt en ellendich verdriet. DOen is accident in t'perck ghespronghen, Die op een svvert vveldich Peirt vvas gheseten, Hoe hijt ghetempt heeft oft den thoom ghevronghen, Het en vvilde niet vvel sijn ghedvvonghen, Maer t' heeft ghestampt ghesmoort en ghesmeten, Ghebreyst ghetiert ghegresen en ghebeten, Al oft veel volcx sou brocht hebben in verstranghen, Den sadel daer accident in sadt met stout vermeten, Die vvas over alle de zyden behanghen, Met alderhande ghevveir daer hy t'volck in pranghen, Subytelijck met brocht naer sijn believen, En elck moeste van hem sulcke slaghen ontfanghen. Daer hy zijn partye met vvilde grieven.
[Folio Hviijr]
DIt Peirt dat soo straff vvreet vvas en sture, En dat het volck naerspeurde soo subytelijck , Dat vvas ghenaemt quade aventure, En accident hadde t'ghesicht en t'vvesen heel sure, En hy sprack seer onbeleefdelijck en spytelijck, Op sijnen bokelaer daer stont vervvytelijck, Van dry vingheren een vyghe ghefigureert, En vvreetheyt die hadde hypocrijtelijck, Sijn vvapenrock met rood' strepen gheinterlaudeert, Ongheval hadde sijn Lance gheriveert, Overmoet hadde ghetempert sijn svveirt bloot, En een vrouvve die Fortune vvas ghenomineert. Hadde aen zijn syde ghehanghen een cudse groot. DOen sagh ick de vervveder accidents pertije, Van voor sijn schanse oock sitten op sijn Peirt, D'vvelck seer out vvas namelijck Envije, Sijnen Bokelaer daer hy met quam te strije, Was stoutheyt ghenaemt en sijn blanck svveirt, Dat hadde hy van hooghmoedicheyt aenveirt, En van te hooghen begrijp sijn sterck Lance, Noch nam hy qualijck en t'gaff hem onvveirt, Dat d'onsekerheyt en de valiance, Hem op t'hooft niet en stelden de crance, Eer hy vervvorven hadde de victorie, Hem docht dat hy ginck te feeste oft ten dance. Soo vierich vvas hy naer d'ydele glorie.
[Folio Hviijv]
DOen lieten sy beyde haer Lancien dalen, En staken d'een d'ander op t'lijff met cracht, Al meynde de vervveirder eer te behalen, Soo heeft accident sijn meyninghe doen falen, Want hy den vervveirder overviel met sulcker macht, Dat hy hem van den Peirde sloegh in eenen gracht, Daer hy langhe bleeff ligghen svvaer als loot, Tot der doot ghevvont maer als een Ridder gheacht, Meynde hy hem selven noch t'hulpen vvt den noot, Want hy noch opspranck en accident toeschoot, Hoevvel hem cloeckheyt noch vroomheyt hulpen // cost, Want accident viel hem soo straff in d'exploot. Dat hy zijn bloedighe vvonden niet stulpen,, cost. Als den vervveirder doen vervvonnen lach // daer, Quam daer een ander glorieuselijck in de bane, Die Atropos hadde doen summeren den selven dach // daer, Om teghen accident oock eenen bloedighen slach // svvaer, In het perck van martelijen te slane, Desen die quam ierst soo furieuselijck ane, Oft hy accident soude hebben vervvonnen, Maer accident vvist hem soo listigh teghen te gane, Dat hy vechten moest met t'ghesicht teghen der sonnen, Soo dat de vervveirder sijn voornemen niet en heeft connen Volbrenghen: vvant hy vvert gheslaghen in t'sant, Van accident de hem gheen gratie en vvilde ionnen. Maer hy stack hem d'vverirs door zijn inghevvant.
[Folio Iir]
DOen quam de derde vervveirdering t'perck gherent, Soo arrogantelijck off hy thien armeyen, Soude hebben vervvonnen en gheschent, En hy treet soo ghevveldich teghen accident, Dat hy hem dede vvijcken tot in eender valeyen, Maer accident en vvilde doen niet langhe beyen, Als hy aensach de groote vromichede, Van den vervveirder maer begonste te bereyen, Ander vvap'nen te vveten sijn cudse daer hy hem mede, Sulcken slaghen gaff dat hy ter selver stede, Ghelijck eenen Os viel en bleef ligghen in t'groen, Hy die in d'ierste teghen accident dede. Vroom feyten van vvapenen lach daer als een statue doen. GHelijck accident dees dry had' ghebrocht om den hals, Sagh ick hem noch ontallijck veel volcx bringhen, Sijn ghevveir vvas gheheel vol onghevals, Vol teghenspoets vol ramps en vol gheschals, Daer hy de vervveerders cost met dvvinghen, Ghelijck de Tygren de Deynen bespringhen, En soo de Wolven vernielen de schapen, Soo vvist hy sijn partijen sonderlinghen, Met cracht te vervvinnen en practijcken te betrapen, Ick saggher hem oock vernielen in t'slapen, Quetssen doorschieten en in ander manieren deiren, Die naer haeren adem bleven ligghen gapen. En die hun niet en hadden connen vervveiren.
[Folio Iiv]
NOch sagh ick accident d'een voor d'ander naer, Om den hals brenghen, d'een heeft hy ghelooft, Het hooft tot den tanden en kinne toe voorvvaer, Ander hief hy de baerden aff met het haer, Ander die sloegh hy met eenen slagh aff het hooft, Ander die heeft hy van haer armen berooft, Ander heeft hy de beenen affgheslaghen, Ander heeft hy met quetssuren blutssen en buylen verdooft, Dat sy in onmacht daer onder voeten laghen, En dees doode en vverden som niet ghedraghen, Vander plaetssen en som vverden sy ghedraghen naer t'graff, Die ick som boven mate seere hoorde beclaghen. Om datse accident oyt den dootsteeck gaff. DOen accident ontallijck veel volcx hadde ghekelt, En in verscheyden manieren ghedaen oultrage, Soo is cranckheyt oock ghecomen in tvelt, Die daer ghedaen heeft sulcken cracht en ghevvelt, Over menighe neder en hooghe personage, Dat hy tot sijnder grooter gheluck en advantage, Meest al tvolck heeft vervvonnen en ghebrocht ter doot, Ick en sagh daer niemant soo sterck van corage, Die hy niet en heeft ghebrocht in den noot, Iae ick sach hem doen soo menich vvreet exploot, En soo menighe acte niet om verfellen, Dat ick eer al de dieren de sijn in tsvverelts conroot. Oft de Sterren des Hemels dan de doode sou tellen.
[Folio Iijr]
HY hadde ghevveiren met tvvintich dosijnen, Daer hy de vervveirders met broght in tverdriet, Sijn meeste vyanden vvaren de medecijnen, De Apotekers Barbiers die t'volck uyter pijnen Hulpen, maer sy sijn hem in tlest' onvveken niet, Door dat hyse heeft doen singhen een ander liet, Dan sy plochten te singhen oft te lesen, Want cranckheyt die sprack vervvijtelijck tot henlien siet, Dat ghy u selven hulpt die ander plocht te ghenesen, Maer ick en sach niet eenen van desen, Die Atropos ministers costen blijven vvederstaen, Sy mochten haerlieden tijt vvat verlinghende vvesen. Maer ten lesten moesten sy oock ten danse vveirts gaen. OCh met vvat groote rouvve onghemeten, Wert mijn herte beruert doen mijn oogen crancheyt sagen, Mijn goede Ouders Cinders en Vrinden doorspeten, Die ick nu noch nimmermeer en sal vergheten, Maer alle de daghen mijns levens beclaghen, Noch sach ick dat daer vvaren verslaghen, Mijn dienaers die my langhe hadden ghedint, Ick laet hier van mijn alderliefte te ghevvaghen, Die ick boven alle vrouvven hadde bemint, Noyt Moeder en baerde beleefder Cint, Noyt ooghen en saghen schoonder vrouvve, Ick vvas in liefden tot haervvaerts soo verblint. Dat ghedincken mijn herte doet bersten van rouvve.
[Folio Iijv]
NOch sach ick dry de beste en schoonste creaturen, Die Godt onder dry hondert duysent had' gheschapen, Tvvaren dry ionghe Dochters daer ick moet affruren, Die mijnen gheest soo hadden connen vervuren, Dat ick daer naer ghehaeckt had' soo de Visschen gapen, Naer tvvater, ick moestese uyt rechter jonsten verknapen, Waer dat sy vvaren daer vvas oock mijn herte, D'een sijnde op haer t'smoeders schoot onslapen, Wert van accident door t'hooft gheschoten met smerte, De tvveede en liet vranckheyt in t'vvitte noch svverte, Voor dat sy den cheys der doot hadde betaelt, De derde heeft Atropos door subtijle perte. Met haeren pestilentialen strael doorstraelt. NAer dat dese dry schoon Dochters hadden bequolen, De doot en dat sy daer ter selver plecken, Als dry albasten belden laghen onder de solen, Soo heeft Atropos cranckheyt en accident bevolen, Dat sy vvat tijts van daer souden vertrecken, En dat sy hun selven souden gaen toerecken, Met ander vvap'nen om noch meer bloets te bevlecken, En om naer Plutonen te senden meer sielen, Door dit ghebodt lieten sy beyde sien haer hielen, En sy namen uyt den percke naer een valeye haer ganghen, Daer sy van eerloose cokynen en fielen. Naer haer qualiteyt vvel vvaren ontfanghen.
[Folio Iiijr]
EEnen vvreeden Beul namelijck executie, Sach ick doen veel misdadighe vernielen met der daet, Som losten hem selven vvat tijts door contributie, Maer den meesten hoop die met resolutie, Waren vervvesen van den souvereynen raet, Van subalterne Rechters oft Magistraet, Sach ick executie al dooden oft vermoorden, Weer sy verordeelt vvaren te reght oft uyt haet, Soo brocht hy deen om den hals met der coorden, Dander met een svveirde op schavotten en hoorden, D'ander sach ick hem verbranden d'ander verdrincken, Dander dolven raed'braken en met corte vvoorden. In veel ander manieren dooden en crincken. DAer en vvas tente noch Pavilloen gherecht, Om t'vvapen schout te doen maer in dijer contreyen, In de schaduvve ontrent eenen grecht, By een drifsantighe dootlaghe gheheel slecht, In heel doncker onbevvoonde valeyen, Die rontom besteken vvaren met vvillighe meyen, Daer vvas cranckheyt vertrocken in t'leste, Die hem daerentusschen hadde vvillen bereyen, Met ander vvapenen om al de reste, T'onder tebrenghen van die in dat ghevveste Al vvaren hoevvel dat veel volck int dal // daer crielde: Hy nam daer eenen als namelijck de peste. Daer hy in perc met weder keerde en tvolc al,, vernielde.
[Folio Iiijv]
ACcident had' een ander svveirt ghegort aen sye, D'vvelck in Menschen bloet ghetempert vvas daer Hy doen met ghedoot heeft een groote pertye, Van crijghsvolck die teghen hem quamen te strye, Die hy soo overviel met slaghen svvaer, Datter van menich hondert duysent maer Dry persoonen en vvaren over ghebleven, Die hy met sijn peirt fierlijck volghde naer, Dat hyse alle drije oock benam het leven, Al de moorden die sy over de Vrouvven bedreven, Waren my onmoghelijck om te vertellen, Sy en brochten niet alleen veel vrouvven in sneven, Maer sy sonden met Charon haer sielen ter hellen. IVppiter en heeft soo furieuselijck // niet, De hooghmoedighe Reusen onder de bergen versmacht, Hercules en heeft soo ingenieuselijck // niet, Soo sierlijck noch soo congratieuselijck // niet, Reusen Monstren en Dieren t'onder ghebracht, Noch Sampson en heeft met ghevveldighe cracht, Noyt de Philisteen soo straffelijck overvallen, Als ick dees dry beroepers met der macht, Al tvock had' sich vernielen met gheschallen, Daer en vvas niet een mensch binnen tperckx vvallen, Van al die ghesommeert vvaren diet cost ontcomen, Sy en aensaghen Heeren borghers gheleerde noch mallen, Maer zy hebbense generalijck al t'leven benomen.
[Folio Iiiijr]
DOen sijn dees beroepers ghereden // daer, Voor t'aneel daer Atropos op vvas gheseten, En sy spraken o goddinne ghy hebt ons sien ontleden // claer Al die ghy hadt ghedaghvaert te deser steden // maer, Indijen dat vvy ons noch niet vvel en hebben ghequeten, Soo sullen vvy vernielen en de vvormen doen eten, Al die ghy vvilt hebben ghebrocht in sneven, T'heeft ons in voorleden tyden vvel ghespeten, Dat ghy Adam Seth Enos Malabehel verheven, Caynam Lamech en Mathusalem so langh liet leven, Met Noe en meer ander hoevvel vvy dees altemale, In t'leste den dootsteeck noch hebben ghegheven, Deen voor en d'ander naer met onsen strale. DEs ghelijcx hebben vvy verslagen al de vroom Capiteynen, Van de Griecken als Achilles Vlisses Agamemnon, Mitsgaders oock al de cloecke Romeynen, Die vvy vervvonnen hebben in diversche pleynen, Wy en hebben oock niet ghespaert den stercken Iason, Hercules Alexander Caesar noch Timolom, Hector Pyrus Cyrus Darius Aratus, Theseus Xerxes Antiochus Telamon, Cleomenes Demetrius Odenatis, Epaminondas Lysiniachus Otorquatis, Themistocles Pompeius Milo Hannibal, Camillus Sempronies Cocles Dentatis. Met noch vele andere sonder ghetal.
[Folio Iiiijv]
AL de machtighe Princerssen van Macedonich, Hebben vvy oock ten onder ghebrocht door ons gevvelt, De vroom Penthesileam van Amasonien, Met Semiramide die de muren van Babylonien, Ghebout heeft die hebben vvy oock ghekelt, Noch laten vvy te verhalen hoe vvy hebben ghevelt, Chonyrien Hippoliten Helernam Sandane, Mitsgaders oock hoe dat vvy hebben versnelt, Cleopatran Camillam Lesbiam Germane, Zenobiam Hijpsicrateam Gaditane, Delboram Valascam Medeam Cassandre, Artemisiam Cyburnam Teucam Crane. Longobardam met noch menich duysent andere. VVY versvvijghen oock met vvat vehemence, Dat vvy in Leonis tijt te Room hebben verslagen, Dry hondert duysent Borgers met de pestilence, En hoe dat vvy met den selven strael te Florence, Dertich duysent doode deden ter eirden draghen, En hoe vvy in Caesaris orloghen affsneden de craghen, Van elff hondert en neghentich duysent Mans, Wat vvillen vvy van den strijt Punica ghevvaghen, Daer vvijer vijftien hondert duysent brochten aen den dans En hoe dat vvy ten tyde van Nerone en Sijlla gans, Te Rome den Adeldom uytroyden door u resolutie, En hoe dat vvy ten tijde van Mithridate becans. Over tachtentich duysent Slaven deden executie.
[Folio Ivr]
VVAt vvy al volcx met den vvater hebben verdroncken, Is u kennelijck ghenoech over soo menich iaer, Wat vvy al luyden hebben verghiff gheschoncken, En persoonen doen verbranden in vierighe voncken, Dat is u oock al Notoir en gheheel openbaer, Wat lijcken vvy door gulsicheyt ghemaeckt hebben is claer, Wat vvy al creaturen hebben brocht in lijden svvaer, Door overloop dierentijt en armoede bysondere, Door ancxst tempeest door blixem en dondere, Door teghenspoet svvaricheyt en tribulatie, Dat en derff u Atropo nu gheven gheen vvondere. VVant ghy dat ghevveten hebt over langhe spatie. EN vvy begheiren seer vvel te continueren, In het volbrenghen van ons daghelijcxse explooten, Maer vvy comen u o Atropo interrogeren, Waer mede dat ghy ons sult recompenseren, Want vvy sorghen dat vvy in tlest souden sijn verstooten, Doen Atropos de Goddinne niet om vergrooten, De propositie van haer vassalen had' verstaen, Sprack sy continueert uvven dienst als ghetrou ghenooten, Ghy sult ghelijcken loon met my ten eynde ontfaen, Maer vvant ghy nu u debvoir niet vvel en hebt ghedaen, Over de hoveirdighe edele Dochters en Vrouvven, Heb'ick mijn heraulten uytghesonden dat sijer saen. Een partye hier doen compareren souvven.
[Folio Ivv]
DOen quamen daer rosbaren coutssen en lattieren, In t'perck met groote hoopen ghereden, Vol Madammen Princerssen staetdochters camenieren, Die haer selven hadden vvillen vorderen en verchieren, Met alderhanden chieraet van boven tot beneden, Min noch meer dan oft sy hadden ghevveest ghebeden, Tot een triumphe banckette oft ter bruyloft feeste, Hoevvel sy som teghen accident hebben ghetreden, En metstendeeel teghen cranckheyt met droeven gheeste, Die daer vervvonnen bleven minst en meeste, Soo dat het groot perck bestroyt lagh aen alle canten, (Ghelijck den haghel op straet leyt naer den tempeeste.) Met Peirlen Robynen Safieren en Diamanten. D'Vytvvendighe abijten die sy hadden ghedraghen, Die laghen daer oock als voetdecksels ter eyrden, De paruken die dicke lobben en langhe craghen, Met de chieraten die sy naer haer behaghen, Nieut hadden doen maken vvaren doen van cleynder vveirden, Sy vvaren som in stucken ghehouvven met svveirden Som laghen sy beslijckt, besmoort en verstroyt, Onder de herde voeten van de magher Peirden, Ghelijck het lanck mest op straet doet alst doyt, Derghelijcken overval en sach ick noyt, Och die soo rijckelijck in tperck quamen ghereden, Die vvaren op min dan een ure al beroyt, En onder de voeten van Atropos Vassalen ghereden.
[Folio Ivir]
IAe de overschoone beldelijcke licchamen, Van de Camenieren die haer plochten te blancketten, Datter de Edelinghen ghenucht inne namen, Die laghen daer doen soo mismaeckt al tsamen, Iae soo leelijck en grouvvelijck datter de caddetten, Compassie aff creghen diese hadden sien verpletten, De Gravinnen die de Princen plochten te exalteren, En die sy in thoochste plochten te setten, En met haere Peirden te convoyeren, Die hoordemen som noch ligghen doleren, Dat een steenen herte hadde moghen deiren, Die Coninghinnen die de Coninghen plochten ten brasseren. In haer armen daer begonsten sy hem af te verveiren. HIerentusschen is daer een groote graboille, Gheresen en d'omstaenders keven vvy dat sou behouvven, Van d'afflijvighe het goet in de spoille, En Met dijen hebben de trompetten a lae foille Gheslaghen, en ick moeste voor ooghen aenschouvven, Dat Atropos ministers oock brochten in benouvven, Die tperck spoilleerden so dat elck hem begonst te verijsen, D'een begheirde uytstel met handen ghevouvven, Dander begonst moedeloos van daer te deysen, De derde tvvijfelde vvat hy vvou seggen oft peysen, De vierde die en vvist listen noch practijcken, Hoe hy van daer soude hebben moghen reysen. Oft hoe hy dees dry beroepers soud' ontvvijcken.
[Folio Iviv]
DOen ick al dit volck hadde sien brenghen tondere, Soo heb'ick oock een groote verschricktheyt ghecreghen, En dat ick verbaest vvas en vvas gheen vvondere, Door alle die doode Menschen bysondere, Die daer laghen doorschoten doorsteken en verslaghen, En soo ick de saken vvel begost t'overvveghen, Brocht mijn pagie ghepeys by my corage Een stoute Nijmphe die sprack Orcha ghy moet nu teghen, Atropos ministers spelen u personage, Dus creech ick nieuvven moet hopende avantage, Te cryghen in Atropos ministers te bestrijene, Ick nam naer t'perck mijn rechte voijage. Om accident met mijn lance te doorryene. MAer Cloto en Lachesis die hebben ghesproken, Tot Atropos de Goddinne obstinaet, O Atropo en vvilt desen strijt niet toestoken, Maer laet noch een vveynig tijts onghebroken, V leet op desen Ridder die metter daet, Teghen u ministers compt campen door quaden raet, Doet hem van hier vertrecken noch ter tijt, Tot dat vvylieden sijns levens corten draet, Volsponnen hebben hier in tvverelts crijt, Siet toe dat ghy dijen noch niet aff en snijt, Tot dat het gherockte aff ghesponnen // is, Sent tot hem uvven herault cort iolijt. En latet vvel voleynden dat vvel begonnen,, is
[Folio Ivijr]
DOen heeft Atropos my desen Herault teghen gesonden, Met een Blasoen in de hant van Verbeyene, D'vvelck den meestendeel vvas opghevvonden, Sijnen naem vvas Iolijt van corte stonden, Die my soetelijck dus aensprack al vleyene, Edel Ridder vatet verstant van mijnen beleyene, Atropos die onbiet u dat ghy van hier, V vertreckt en terstont pijnt te scheyene, Wt dit bloedich perck en dangereux quartier, Tot dat ghy ghesummeert sijt van haeren hussier, Dus ben ick vertrocken soo my vvas bevolen, En soo ick gheraeckte in een onbekent vergier. Begost ick buyten t'vveghs te ryden en te dolen. Ick passeerde door holle straten en speloncken, Daer niet alleen en laghen verdroncken, Soo boven op tvvater als te gronde ghesoncken, Veel Visschen Voghelen en viervoetighe dieren, Maer oock Mans Vrouvven en Cinders vvt die quartieren, En d'vvelck noch meer te vervvonderen vvas soo saghen, Wy dat de steden noch stonden in brandende vieren, En dat veel hoven en huysen gheruineert laghen, Ick en hoorde daer niet dan crocchen suchten en claghen. Dit ghevvest vvas vvel te ghelijcken certeyn, By een velt daer eenen bloedighen slagh is gheslaghen. Oft by een pestelentieuse landouvve onreyn.
[Folio Ivijv]
NOch heeft hem den straffen Boreas opgheheven, Die de staende Boomen met groot ghevvelt, Tereirden in veel stucken heeft ghedreven, Den aertsbodem die begost oock seer te beven, En den blixem en donder hadden my by naer ghevelt, Ick en vvas in mijn reyse alleen niet ghequelt, Met eenen teghenspoet ongheluck oft verdriet, Maer ick bevont t'proverbium vvaer d'vvelck vermelt, Datmen een ongheval selden alleen comen siet, Soude ick u al den teghenspoet die my is gheschiet, Hier nu particulierelijck verclaren, Ick en soude certeyn u dyen te vollen niet. Verhalen noch beschryven in dry iaren. FINIS.

Vorige Volgende

Cort begrijp van dit teghenwoordich Boeck.

Den vreesselijcken camp der doot. Het derde Boeck

Den vreesselijcken camp der doot.
Het derde Boeck