Emblemata amatoria

Afbeeldinghen van minne. Emblemes d'Amovr

[p. 97]

Sonnet.

Meer dan ghy zijt ghevvoon, laet ghy u het verdrieten

Dat ick den Hemel van Liefs byzijn mach ghenieten,

VVat schaedt u mijn gheluck dat ghy u daer in quelt?

Een grysaert zijt ghy Tijt, en proefde noyt 't ghevvelt,

Van't ghene, datse Liefd' en soete VVeerliefd' hieten.

Helaes de tranen blanck over mijn vvanghen vlieten,

Als ick aen't uyrvverck denck dat qualijck vvas ghestelt.

Och Meester, die de tijt met uyren af kunt meten,

Ghistr'avont miste ghy en had u konst vergheten,

VVel viermael sloech de klock in min dat een quaertier.

Maer nae mijns Liefs vertreck, door dien't began te daghen,

En heeft de klocke boven tvveemael niet gheslagen,

In eenen tijt, docht my, van tvvaelf uyren schier.