Emblemata amatoria
(1611)–P.C. Hooft, R.J. de Nerée, C.G. Plemp–
AuteursrechtvrijAfbeeldinghen van minne. Emblemes d'Amovr
[pagina 83]
| |
Wyse: Volez petit Archer droit à Madame.DIana soo ghy licht cunt overwinnen
In schoonheyt, d'alderschoonst die'r zijn te vinnen,
Laet varen andre sorgh en brandt van minnen.
Laet varen andre sorgh en brandt van minnen.
Laet u der minnen brandt in't harte sincken,
Onnutte treuricheyt wilt niet ghedincken,
Ghelijk een steen in't gout suldy dan blincken.
Ghelijk een steen in't gout suldy dan blincken.
Maer ghy hebt uyt ghedooft der Minnen voncken,
Versuymt u clare voorhooft op te proncken,
Vw bloeyendt harte schijn uw Ieucht ontfoncken.
Vw bloeyendt harte schijn uw Ieucht ontfoncken.
Mijn hart, ghelooft het vry, 'tzijn sotte zeden
Te sorghen teghen morghen, en t'onvreden
Alsoo te brengen door den dach van heden.
Alsoo te brengen door den dach van heden.
De felle doodt die't alles doet versmachten,
| |
[pagina 84]
| |
Vernielt al 'smenschen opset en ghedachten,
Maer op't ghenoten goet heeft zy gheen crachten.
Maer op't ghenoten goet heeft zy gheen crachten.
Ghenoten lust werdt nimmermeer verlooren,
Destin noch avontuyr en canse stooren,
Dewijl de tijdt het lijdt wilt vreucht oorbooren.
Dewijl de tijdt het lijdt wilt vreucht oorbooren.
Ghelijck de vlugghe pylen uyt de booghen,
Soo comt den ouderdoom snel aen ghevloghen,
Diana brandt van Min dewijl wy moghen.
Diana brandt van Min dewijl wy moghen.
|
|