Dapes inemptae of De Moufe-schans, dat is de soeticheyt des buyten-levens vergheselschapt met de boucken

[p. 523]

P. Hondii.
Hof-wetten.

Aen mijn Heere. D. D.
Ieremias van Dalen
Vermaert ende ervaren Medicijn.

MYn lieve vrient en ouwe Camerate,
Wanneer ick u dees wetten achterlate,
Die mijnen Hof door enckel grooten noot
Van langher hant versint voor cleyn en groot:
Sy comen haer u hier ter handen stellen,
Niet om u oock u lesse voor te spellen,
Die alsoo wel u selver is bekent,
Als die u hier dees wetten over sent:
Oock sulcken vrint can nergens in misbeuren,
Is buyten wet is buyten alle Ceuren:
Maer werden u dees wetten in u hant
Als voocht ghestelt, en heel den goeden stant

[p. 524]

 

Van mijnen Hof op t'hoogste u wert bevolen:

 

Wie datse volcht en sal niet connen dolen.

 

Doch cont ghy oock gheraecken aen de weet

 

Dat yemant hier hem in mijn Hof vergeet,

 

En onbedacht, of willens, onse wetten

 

Set achter rugge, om niet daer op te letten:

 

Ick stelle u hier de deure naer u lust,

 

Laet niemant in of zijtter in gherust.

 

Ist noodigh u noch grooter macht te gheven,

 

Ick gheve u selfs de sleutels daer beneven.

 

En also lang ghy voocht blijft van mijn Hof;

 

Sal blijven oock den onverbroken lof,

 

Van twee ghetrouwe en ongheveynsde vrinden,

 

Die elck om best malcanderen beminden.