De wylde boerinne en oar wurk

[p. 166]

Ek in sonnet

Kom, sa'n sonnet wol 'k ek eris besykje,
Skoan 'k sizze moat: it is in dreech kerwei.
Men moat jins taal befylje en befykje,
En al mar 't selde rym, dat falt neat mei.

Lykwols, myn skriuwersfingers-einen prykje,
It dichtfjoer baarnt, de lôge fljucht der nei;
Ik wol ús letterkunde ek mei ien ferrykje,
Al kost it swit en 't wurk fan hiel de dei.

Mar oer wat ûnderwerp moat ik no dichte, -
Ta 'n bytsje ynhâld is men dochs ferplichte.
Al giet de klank yn in sonnet ek foar,

Sil 't wêze: ‘Unk,’ of: ‘Lutsen yn 'e hichte,’
‘Sieltsjusterens,’ of ‘Brutsen yn 'e lichte?’...
Och, 't hoecht net mear: 't ding is al foar inoar.

('t Idee fan sa'n sonnet is nommen út ‘Braga’ fan Ten Kate)