Horae Belgicae

LXXXVII.
¶ Een oudt liedeken.

JC stont op hoogen bergen
Jc sach ter zee waert in
Jc sach een scheepken drijuen
Daer waren drie ruyters in
den eenen stont in minen sin.
Den alder ioncsten ruyter
die in dat scheepken was.
die scanc mi eens te drincken.
Den wijn wt een glas
God loons hem die dat was
Jck brenghet v cleyn haueloos meysken.
Ghi zijt van hauen bloot
Om dat ghy een cleyn haueloos meysken zijt.
daer om ick v laten moet
Ghi en hebter ia gheen goet
Ben ick een cleyn haueloose meysken
Jck en bens alleyne niet
Jn een cloosterken wil ic rijden
God loons hem diet mi riet
dat ic wt alle genoechten sciet
Och ioncfrou nonne als ghy te clooster gaet
Ende als ghi wijnge ontfaet
Hoe geerne soude ick weten
Hoe v die nonne cleyder staen
als ghi in een clooster wilt gaen
Mer doen si in dat clooster quam
haer vader die was doot
Men vant in al myns heren lant
geen rijcker kint ende was groot
Ende niet van hauen bloot

[p. 132]

7.

Den ruyter had so haest vernomen.

 

Hi sprac sadelt mi myn paert.

 

dat si int clooster is gecomen

 

Dat mynder herten so sere deert

 

Het is mi wel rijdens waert

8.

Mer doen hi voor clooster quam

 

Hi clopte aen den rinc.

 

Waer is dat ioncste nonneken

 

Dat hier lest wijnge ontfinc

 

Het is so schoonen kint

9.

Dat alder ioncste nonneken

 

En mach niet comen wt.

 

Si sidt al hier besloten

 

Ende si is Jesus bruyt.

 

Si looft hem ouerluyt

10.

Dat alder ioncste nonneken

 

Ghinc voor den ruyter staen

 

Haer hayrken was afgescoren

 

Die minne was al ghedaen

 

Nonne cleederen had si aen

11.

Ghi moecht wel thuyswaert rijden.

 

Stout ruyter ghi moecht wel gaen.

 

Ghi moecht een ander verkiesen

 

Mijn minnen is al ghedaen.

 

Jck hebbe een ander leuen aenghegaen.

12.

Doen ic een cleyn haueloos meysken was.

 

doen stiet ghi mi metten voet

 

Om dat ic ionc ende arm was

 

Jc en hadde doen gheen spoet.

 

Stelt nv te vreden uwen moet.