Logo DBNL
Horae Belgicae (1968)

Horae Belgicae

(1968)–A.H. Hoffmann von Fallersleben–rechtenstatus Auteursrechtelijk beschermd

Vorige Volgende

LXI.
¶ Een nyeu liedeken

1.
HEt voer een maechdelijn ouer rijn
 
Tsauonts al inder manenschijn
 
Met haer snee witte handen
 
Die winter tot haerder schanden
2.
Met dien quam daer een ridder gereden
 
Hi groette die maget tot dier stede
 
Hi seyde god groet v reyne
 
Waer om staet ghi hier alleyne
3.
Om dat ic hier alleyne stae
 
Dat doet dat ic gheenen boel en hae
 
Die ick met herten meyne
 
Daerom stae ic hier alleyne, ia alleyne
4.
Och maechdelijn woudy met mi gaen
 
Jc soude v leyen daer rooskens staen.
 
So verre aen gheender groender heyden
 
Daer schaepen ende lammeren weyden
5.
Crijschman ghi zijt te hooch geboren
 
Jc ontsie so seere mijns vaders toren
 
Jc wilt mijnder moeder vraghen
 
Oft ic metten lantsknecht mach waghen
6.
Och moeder seyt si moeder mijn
 
Nv wecket mi inder mane schijn
 
Laet mi die lammeren weyden
 
So verre aen gheender groender heyden
7.
Och dochter ghi zijt noch wel te cleyne
 
Ghi slaept noch wel een iaer alleyn.
 
Tsoheyme so sult ghi blijuen
 
Ende spinnen die groene side
8.
Dat ic tsoheyme blijuen moet
 
dat doet mijnder herten groote wederspoet
 
Die lantsknecht mach mi werden
 
desghelijcx en was noyt opter aerden
9.
Die moeder sloot haer dore toe
 
dat maechdelijn spranck ter veynster wt
 
Si wilde den lantsknecht hauen
 
Haer leuen woude si wagen
10.
Die dit liedeken eerstwerf sanck
 
Een vroom lantsknecht is hi ghenaemt
 
Hi heuet wel ghesonghen
 
Van die alder liefste is hi gedronghen.

Vorige Volgende