Horae Belgicae


LI. ¶ Een oudt liedeken 1.[regelnummer] GHeldeloos ghi doet mi pijn. Al mijn vruecht doet ghi verdroogen Jck soude so gaerne vrolijc zijn Woudt mijnen buydel ghedooghen 2.[regelnummer] Het was mi van te voren gheseyt. Jck en wouder niet na hooren Hadde ick een pennincxken wech gheleyt. Dat mochte ick nv oorboren 3.[regelnummer] Jck plach te sitten op die bierbanck Waer is den tijt gheuaren
[pagina 75]
Al buyten sweechs leyt mijnen ganc Niet hebben doet veel sparen 4.[regelnummer] Doen ic goet geldeken had in mijn tas Doen ghinc ic metten goey ghesellen Mer nv mijn ghelt is al verteert Nv moet ic boomkens tellen 5.[regelnummer] Wanneer ic in die tauerne come Ter tafelen ben ic haest geseten Dan make ic mi van achter wt Dat die goey ghesellekens niet en weten. 6.[regelnummer] Pot ende kanne het is al verteert Waer sal icx meer gaen halen Die vrouwe die mi te borghen plach die moet ic nv wel betalen 7.[regelnummer] Eten ende drincken is mijn motijf. Te sitten metten vollen balghe Als ict ghebrenghen can int lijf Voor die dore en staet gheen galghe 8.[regelnummer] Het was mi van te voren gheseyt Jc salder noch langhe op dincken Als ic mijn buycxken hebbe gheuult So gae ic te Walem duncken