Horae Belgicae

[p. 73]

L.
¶ Een nyeu liedeken.

GHesellekens van herten coene
Weest vrolijck nv ter tijt
Die somer coemt in saysoene
Wi moghen wel zijn verblijt.
Die boomen beghinnen te bloeyen.
Die sonne climt so hooge
Die sotten beghinnen te groeyen
die weghen worden drooghe
Ghesellekens en laet v niet bedwingen.
Noch ionghe meyskens mede
Loopt vry danssen ende springen
Oft gaet wandelen buyten der stede
Wilt goede chiere maken.
Ende maken een blijde abuys
Condt ghi aen v boel gheraken
Brenghet den meelbuydel vry thuys
Daer isser so vele bestouen
Metten meelbuydel ghequelt
Ridders ionckers wten houen
Die ioncfrouwen zijnder mede ontstelt
Nonnen ende prelaten.
Si nemen den meelbuydel in de hant
Doorwaerders ende aduocaten
Wi hebbender af tverstant
Trompers, pijpers ende tamboeren
Die metten meelbuydel bestouen zijn
die gaerne den elleboghe roeren
Si drincken so geerne den wijn
Wilt sinte reynwts vaert varen
Tschip leyt buyten der stadt.
Al soudt wijf en kinderen ontsparen
Jaghet vry door v gadt
Dan comen wi thuys ghelopen
Om tghelt te crijghen alsmen mach

[p. 74]

 

Al souden wi tgaren vanden haspel vercoopen

 

Om te betalen ons gelach.

 

Al soudet ghi cleederen hueren

 

daer ghi mede ter feesten gaet

 

Willet vrolijck auontueren.

 

Niemant en weet van uwen staet.

6.

Latet sotteken vry wt kijcken

 

Wter mouwen en hebbet gheenen vaer

 

Wilt v metten meelbuydel bestrijcken

 

Ende slaept metten molenaer

 

Ghi meyskens wilt dit onthouden

 

die ick niet ghenomen en can

 

Ghi loopt so gaerne om trouwen

 

Ende hadt gaerne eenen man

7.

Si zijn so gaerne bestouen

 

Metten meelbuydel so grooten hoop

 

Van onder al tot bouen

 

Hout selue den quaetsten coop.

 

Wilt met die lendenen wercken

 

Oudt, ionck, sterck ende cranck

 

So moechdy die werelt verstercken

 

Ende die molenaer die weets v danck