Print Horae Belgicae(1968)–A.H. Hoffmann von Fallersleben Vorige Volgende XLIX. ¶ Een nyeu liedeken. 1. GHepeys, ghepeys vol van enuijen. dwelc oorspronc is dat menich truert Hoe queldi mi nv met fantasijen Mi dunct dat mi mijn herte schuert God gheue haer vruecht wient ghebuert. Al doetse mi dese quale Haer wesen fier heeft mi becuert. Midts tcoluer van corale Rast v ghi nachtegale Vliecht wt dat wilde wout Gaet segt haer dit altemael Ende groetse mi menich fout. 2. Jck peynse om Venus discipline die mi so late sandt dese sucht Hoe stadigher liefde, hoe meerder pijne Hoe vuylder wonde, hoe erger ducht Een tijtlick fruyt neemt saen de vlucht Ghepluct ten groenen dale. Men prijst best een volwassen vrucht Ghelijc een cuyssche smale. Rast v. 3. Beloften veel is si mi schuldich Mer onder al een excellent daer na verlanghet mi menichfuldich [p. 72] Wat is, tis haer bekent Wat ick bedrijue in mijn conuent dit altoos ic verhale Vonde ic mi leech als si is absent Van haer ic niet en fale 4. Ghepeyns hoe soudy niet gehingen. Jc moet eylaes tis groote noot dat doen thien duysent vreemde dinghen. Ons beyden ghebuert, si weet al bloot Wi drincken vruecht en droefheyt groot Beyde wt fortuynen schale door tswaer ghepeyns van dit exploot Therte sterft al waert van stale. Rast v. 5. Mochtmen met cruyde oft medecijne Ghenesen mijnder liefden brant Jc waer ghenesen vander pijne Mer neent hulpt sulck onderstant Dus gatet eylaes aen minen cant Door tlast der minnien strale Jc vloecke den afgod die mi bant Met Venus bitter dwale Rast. 6. Princesse ic swijghe veel om beter Als ic peynse om ons oude spel. Jc en vant ter werelt noeyt secreter Dies vreese ic twint dese nijders fel Vrou Venus dect haer kinderkens wel Draghen zijs huesche tale, Tsal al wel zijn door mijn beuel Schoon lief dat is tprincipale Rast v. Vorige Volgende
