Horae Belgicae

XLV.
¶ Een oudt liedeken.

EEn ridder ende een meysken ionck
Op een riuierken dat si saten
Hoe stille dat dat water stont
Als si van goeder minnen spraken
Och segt mi stout ridder goet
Jck soude gaerne weten
Waer om dat dat water stille stoet
Als wi van goeder minnen spreken

[p. 64]

3.

Dat dat water stille staet.

 

dat en gheeft mi gheen vreemde

 

Jck hebbe so menighe ionghe maecht

 

Ghebrocht in groot allende

4.

Hebdy so menighe maecht

 

Ghebrocht in swaer allende

 

Wacht v stout ruyter goet

 

dat v God niet en scheynde.

5.

Jck weet noch een so hooghen berch

 

Boouen alle berghen is hi hooghe

 

die sal ick noch in dale brenghen

 

daer om ist dat ick pooghe

6.

Suldy mijns vaders hooghen berch

 

Tot eenen dale brenghen

 

Jck sage v lieuer stout ridder goet

 

Bi uwer keelen hanghen

7.

Jck hadde noch veel lieuer

 

dat v die sonne bescheene

 

Al onder thol van uwen voeten

 

den bast al om v kele

8.

Dat meysken was ionc ende daer toe dom

 

Si en wist niet wat si seyde

 

doen si in haers liefs armen lach

 

doen was den berch ter neder.

9.

Och segt mi meysken ionck.

 

Js nv mijn kele gehanghen

 

Nv is dijns vaders hooghen berch.

 

Jn eenen dale gheuallen

10.

Och doen dat meysken ghewaer wert

 

dat si een kindeken bleef draghen

 

Si ghinck al voor den ridder staen

 

Si badt hem om ghenade

11.

Ghenade stout ridder fijn

 

Ghenade van mijnen lijue

 

Jc was een goet maechdekijn

 

Nv moet ic met uwen kinde blijuen

[p. 65]

12.

Wat ghenade soude ic v doen

 

Ghi en zijt gheen keyserinne

 

Jck mocht v mijnen schiltknecht gheuen

 

Cost ic hem daer toe ghebringhen

13.

Vwen schiltknecht en wil ic niet

 

Hi is mi veel te snode

 

Al is mijnen hooghen berch ter neder

 

Jc hope ghi sult hem noch wel hoghen

14.

Dat meysken hadde eenen broeder stout

 

Hi was haer goet ende ghetrouwe

 

Als hi haer dede wel int aenschijn

 

Hi beweest haer al metter trouwen

15.

Och doen die broeder gheware wert

 

Dat si een kindeken bleef draghen

 

Hi ghinc al voor den ridder staen.

 

Hi badt hem mede te graue

16.

God groet v seyt hi stout ridder vrij.

 

Stout ridder vrij van waerden

 

Och die met uwen kinde was beuaen

 

Die leyt hier doot opter aerden

17.

Och is si doot dat schoone wijf

 

Die ouerschoone die ick beminne

 

So en sal ic nv noch nemmermeer

 

Mijn grauwe ros berijden

18.

Haelt mijn spere ende ooc mijn schilde

 

Myn swaert al aen mijn side

 

Jc wil gaen rijden seluer daer

 

Men vint der valscher boden so vele

19.

Och doen hi op der heyden quam

 

Hi hoorde die clocken clincken.

 

Hi hoorde wel aen der clocken clanck

 

Dat si inder aerden moeste sincken

20.

Hi nam sinen bruynen schilt

 

Hi worp hem op der aerden

 

Ligget daer ligget daer goet bruyne schilt

 

Van mi en suldi niet ghedragen werden

[p. 66]

21.

Heft op uwen bruynen schilt

 

Hanghet hem onder v side

 

Al waer v vader ende moeder doot

 

Den rouwe moet ghi lijden

22.

Al waer mijn vader ende moeder doot

 

Ende mijn broeders alle vijue

 

So en waer den rouwe niet also groot

 

Als hi is van desen schoonen wijue

23.

Doen hi op dat kerchof quam

 

Hi hoorde die papen singhen

 

Hi hoorde wel aen der papen sanck

 

Dat si vigelie songhen

24.

Doen hi inder kercken tradt

 

Hi sach zijn liefken staen in bare

 

Ghedect met een haren cleede

 

Recht of si nv oock doot ware

25.

Hi hief op dat baren cleet

 

Hi sach haer cleyn vingerken roeren

 

Och doen so loech haer roode monde

 

Doen si den ridder voelde

26.

Staet op staet op mijn soete lief.

 

Wel ouer schoone ioncfrouwe

 

Jc en sal v nv noch nemmermeer

 

Doen so groten ontrouwe.

27.

Wel op wel op mijn soete lief

 

Mijn ouerschoone ioncfrouwe

 

Al waert mijn vader ende moeder leet

 

So sal ick v tot eenen wijue trouwen

28.

Al waert mijn vader ende moeder leet

 

Ende mijn broeders alle vijue

 

So sal ick v houden voor mijn bruyt

 

Ende trouwen v tot eenen wijue