Horae Belgicae

[p. 246]

¶ Nr. 122.

Hoe lude so sanc die leraer al opter tinnen:
so wie in swaren sonden leit
die mach hem wel versinnen,
dat hi hem te tide godewert keer,
eer hem die doot den wech ondergheet.
si vroeden die dat bekennen.

Dat verhoorde een jonghelinc jonc van jaren:
nu sech mi, leraer onbekent,
hoe moochstu dus ghebaren?
ic mach noch leven menighen dach
ende hebben blischap ende groot ghemac
ende daer nae mit gode varen.

Die leraer sprac: dijn woorden sijn seer vermeten.
och waer sijn uwe ghesellen jonc,
die bi u waren gheseten?
si waren van jaren uwes ghelijc
ende daer toe vrisch ende verwenentlijc:
die worme hebbense ghegheten.

Die jonghelinc sprac: ic en can mi niet bedwinghen:
ic moet ghebruken mijn jonghe joocht
mit dansen ende ooc mit singhen.
die veech sijn die moeten sterven.
wel op, laet ons nae vroochden werven,
die tijt sel ons verlenghen.

Die leraer sprac: dijn vroochde en mach niet gheduren.
dat liden comt so menigherhant
in also corter uren.
och waerstu in die sinnen mijn,
dat di nu dunket vroochde sijn,
ten waer di niet dan truren.

[p. 247]

5.

Die jonghelinc sprac: sel mijn hemelrijc sijn vererret,

 

so is die werelt harde seer verkeert,

 

den rechten wech verwerret;

 

ic was ghewaeit al in een wac,

 

ghemisset heh ic den rechten pat;

 

nu weet ic wat mi erret.

 

 

6.

Die leraer sprac: woutstu dijn hert tot gode neighen,

 

den rechten wech tot gode waert

 

soudic di gaerne leiden.

 

maer wereltvroochde is maer een caf.

 

wilstu dijn sonden niet laten af,

 

die helle die is dijn eighen.

 

 

7.

Die jonghelinc sprac: dijn woorden sijn seer ghedurich.

 

du hebste mi so wel gheleert,

 

den rechten wech ghesturet.

 

nu leet mi door den rechten pat,

 

op dat ic mach kennen die werelt bat:

 

si is mi worden sure.

 

 

8.

Die leraer sprac: nu danc ic god die goede,

 

dattu in also corter stont

 

verwandelste dijn ghemoede.

 

nu hout aen die tien ghebode

 

ende hoetti voor des viants loon,

 

so moochstu varen mit gode.

 

 

9.

Die jonghelinc sprac mit een bedroefde sinne:

 

help rijc heer god van hemelrijc,

 

hoe sal ic dit beghinnen?

 

als ic aentrec den grauwen roc,

 

so bin ic alre werelt spot.

 

mittien tooch hi ten clooster.

A. 96. - Hs. 1, 1. 2, 2. 3, 1. leerre (leraer oder lerer) - 1, 4. godewairs - 2, 4. jaer (dach) - 3, 6. verlanghen - 4, 1. lerar - 9, 6. ten cloester (ob nicht dafür: van hinnen, henen?)