Horae Belgicae

[p. 146]

¶ Nr. 67.

Mijn hoop ende mijn troost ende al mijn toeverlaet,
dat staet aen onser liever soeter vrouwen.
here Jesu weet wel, hoet in mijn herte staet,
ic wilt hem toe betrouwen.

Ic hebbe die werelt so langhe ghedient,
dat rouwet mi also sere.
die cierheit wil ic laten af
ende keren mi tot onsen lieven heren.

Mijn hoop ende mijn troost cet.

Sijn ontfermherticheit die is so groot,
ic hope hi en sal mi niet versmaden.
tot sijnre scholen wil ic gaen
ende bidden hem omme ghenaden.

Mijn hoop ende mijn troost cet.

Doe ic in die schole quam,
die schole der godliker minnen,
die lecsen die waren mi onbecant,
dat deden mine werlike sinnen.

Mijn hoop ende mijn troost cet.

Die eerste lecsen die ic daer vant
dat was, ic soude sterven leren
ende laten die creaturen af
ende keren mi tot onsen lieven heren.

Mijn hoop ende mijn troost cet.

Si toghen mi alle mine cleder uut,
si deden mi mijn haer af sniden,
si toghen mi aen ene mantele die was grau,
si leerden mi die oorden ghetiden.

Mijn hoop ende mijn troost cet.

Hoe mi doe te moede was,
dat en sal ic niemant claghen
dan Jesus, die in den hoghe hemel woont,
die salt mi helpen draghen.

Mijn hoop ende mijn troost cet.

[p. 147]

8.

Die daghe die werden mi also lanc,

 

des nachtes en conde ic niet gheslapen,

 

ic dachte so dicke in minen dommen sin,

 

hoe icket soude ghemaken.

 

Mijn hoop ende mijn troost cet.

 

 

9.

Als ic overdachte in minen moet,

 

dat ic die werelt hadde ghelaten,

 

so verblide ic mi van herten also,

 

ic vervroude mi boven mate.

 

Mijn hoop ende mijn troost cet.

 

 

10.

Soeter wijn en dranc ic niet

 

uut nappen noch uut glasen

 

als uut Jesus overroder mont,

 

daer mach men vroude uut halen.

 

Mijn hoop ende mijn troost cet.

 

 

11.

Adieu, adieu, bedriechlike werelt,

 

ende ic moet van u scheiden!

 

so mach ic altoos blide sijn

 

nae deser corter ellende.

 

Mijn hoop ende mijn troost cet.

 

 

12.

Belghes u niet, vri edel coninghinne,

 

dat ic u so luttel minne!

 

ic draghe u op mijn lijf ende mijn siele

 

ende daer toe mine vijf sinne.

 

Mijn hoop ende mijn troost ende al mijn toeverlaet

 

dat staet aen god minen heren.

 

hoe gheerne wolde ic hem wesen onderdaen

 

tot sijnre ewigher eren!

B. 92. - Hs. 1, 2. steet - 11, 1. Haddev.