Horae Belgicae

¶ Nr. 63.

Dit is die wise:
Lief hebben ende miden

Ic wil mi selven troosten
ende maken enen moet.
al bin ic nu int liden,
dat sal noch worden goet.
alst liden is verganghen,
so comet die blischap aen.
in liden wil ic mi houden
so als ic beste can.

Natuurken, du moetste di liden
dijns herten onghevoech.
ic bin hier in den liden,
mi is dicke so wee te moet.
och god so wilt mi troosten
alst u dunket wesen tijt
al voor des viandes stricken,
sijn laghen sijn so wijt.

Nochtans so wil ic hopen
ende truren niet so seer:
mijn liden mach verwandelen,
ghenade gheeft die heer.
dat mi is ghevallen
dat mach een ander gheschien.
conde ic mijn liden verhalen,
so woude ic truren niet.

[p. 138]

4.

Och rat van avonture,

 

woutstu niet ommeslaen?

 

die mi woude helpen truren,

 

dat duchte mi wel ghedaen.

 

het comet in eenre uren,

 

men cans ghewenden niet.

 

wat sulle wi veel betruren

 

ooc alsmen daghelics siet?

 

 

5.

Eens woordes mach ic ghedenken,

 

dat ic te segghen plach:

 

mi selven wil ic schenken

 

dien heren diet al vermach.

 

mi selven wil ic schenken,

 

so mach ic worden quijt,

 

ende dienen hem al mijn leven

 

den heren van hemelrijc.

 

 

6.

Mit liden mach men temmen

 

ende bendich maken schier.

 

een hertken sonder liden

 

is een onstadich dier.

 

daer bi so mach men merken

 

ende horen haren sanc.

 

van liden waer veel te spreken,

 

die reden worden veel te lanc.

 

 

7.

Hier bi so mach men merken,

 

hoe menich edel hertken staet,

 

dat sijn natuur moet crenken

 

ende smedet daer op dat gout.

 

het spruten aen der heiden

 

die bloemkens jonc ende out:

 

ic ligghe hier arm ghevanghen,

 

van liden so worde ic out.

 

 

8.

Och ouder mach ic werden

 

ende jongher nimmermeer.

 

soude ic dit langher herden,

 

so woude ic bidden seer

[p. 139]

 

door god ende door ghenade,

 

dat hi mijns ghedachtich weer.

 

die rouwe comt veel te spade,

 

dat ordeel is gheschiet.

 

 

9.

Och heer van hemelrike,

 

ontfermt mi arme man,

 

ic ligghe hier ellendelike,

 

siet mi ellendich an,

 

ende wildet mi vergheven

 

al door Marien eer!

 

ic diene u alle mijn leven,

 

ic hone u nimmermeer!

B. 3. - Hs. 1, 8. so fehlt - 2, 4. ta moede - 7, 2. steet - 7, 4. dat sprutet - 9, 2. mensche (man).