Horae Belgicae

[p. 135]

¶ Nr. 62.

Ic wil mi selven troosten
ende maken enen....

Ic wil mi selven troosten
ende maken enen moet,
want alset gaet ten quaetsten,
so macht noch worden goet.
van sonden wil ic mi keren
in mijnre jongher tijt.
Ic bid ghenade, here,
want ghi ghenadich sijt.

Mijn oghen die moghen schouwen
tgheen dat ic heb verdient,
tsi blischap ofte rouwen.
ic rade minen vrient,
dat hi hem van sonden kere,
want cort is onse tijt.
Ic bid ghenade, here,
want ghi ghenadich sijt.

Woud ic die werelt verliesen,
tghepeins dat waer mi goet,
so soude mi god verkiesen
als hi den salighen doet.
och mi berouwet sere
al mijn verloren tijt!
Ic bid ghenade, here,
want ghi ghenadich sijt.

Niemant en darf hem poghen
te comen daer god si,
hi en moet nae sijn vermoghen
van sonden wesen vri
ende dienen onsen here
die wijl dat hi heeft tijt.
Ic bid ghenade, here,
want ghi ghenadich sijt.

[p. 136]

5.

Ouder mach ic werden

 

ende jongher nimmermeer,

 

ende namaels onder die erde

 

ende laten goet ende eer.

 

waer toe dat ic mi kere,

 

altoos gaet nnnen tijt.

 

Ic bid ghenade, here,

 

want ghi ghenadich sijt.

 

 

6.

Ende noch so wil ic hopen

 

op god ende onser vrouwen:

 

gods gracie staet altoos open,

 

als ons die sonden rouwen,

 

want milde is die here,

 

onseker is die tijt.

 

Ic bid ghenade, here,

 

want ghi ghenadich sijt.

 

 

7.

Och rat van avonturen,

 

selstu niet omme gaen,

 

dat mi troost mocht gheburen

 

van dat ic heb misdaen?

 

ic en sondighe nimmermere,

 

al had ic wel die tijt.

 

Ic bid ghenade, here,

 

want ghi ghenadich sijt.

 

 

8.

Aldus so wil ic temmen

 

dat jonghe herte mijn,

 

so mach ic namaels clemmen

 

al daer die salighe sijn,

 

daer ic so langher so mere

 

begheret heb altijt.

 

Ic bid ghenade, here,

 

want ghi ghenadich sijt.

 

 

9.

Nu spreect voor mi int beste,

 

ghi heilighen al ghemeen?

 

al bin ic van den lesten,

[p. 137]

 

ic bin derselver een

 

daer Cristus met groter onere

 

om starf tot eenre tijt.

 

Ic bid ghenade, here,

 

want ghi ghenadich sijt.

A. 45. - Schon Hor. belg. 2, 33.