Horae Belgicae

[p. 132]

¶ Nr. 60.

Dit is die wise:
O Venus bant, o vurich

O Jesus bant, o vurich brant,
hoe heeft u minne in mi bewant
mijn hertken onbedwonghen!
dat doet u troostelic onderstant.
wat lof wort u int hemelsche lant
ghesonghen
al mitter enghelscher tonghen!
O maghet rein, o hemelsschrijn,
ghi sijt ons hope, ons troost allein,
stadi ons nu in staden!
ghi sijt den sonderen int ghemein
ende een vol vat, datter is certein
gheladen
mit godeliker ghenaden.
O reine maghet, daert licht uut daghet!
u groot ootmoet heeft god behaghet
ende daer toe uutvercoren.
die eerste sonde heeft hi beclaghet
ende wert van u jae onversaghet
gheboren,
hi ontsloot datter was verloren.
O rosegaert van god bewaert!
gracie is gheopenbaert
in ons tot menighen stonden.
mer als die siele ter pinen vaert,
biddi daer voor, si wert ghespaert
van sonden:
des wil ic vri oorconden.
O lieve heer, lof danc ende eer
schrive ic tot u, o heer,
mit groter begheerten uut minnen.
ic bin ghewont here harde seer
mit groten sonden buten keer
van binnen.
sent troost of wi ontsinnen!

[p. 133]

6.

Die viant fel, hi is altijt snel,

 

wi sijn verloost dat weet hi wel,

 

daer om lecht hi ons laghen.

 

hi smijt, hi cloppet, hi maket rebel,

 

op dat hi ons mach in die hel

 

becnaghen.

 

ist vremde, dat wi versaghen?

7.

Hier om ist noot clein ende groot

 

mer dat wi denken opten doot

 

ende leren altijt sterven.

 

ten baet weer hals noch edel bloet,

 

weer huus noch hof noch enich goet

 

of erve:

 

wi moeten dan al sterven.

8.

Waer op, secht mi, verlati di?

 

gheen schepenbrieve weer out noch nie

 

si en moghen u dan niet baten.

 

daer om siet voor, dat segghic vri,

 

u lijf ende u goet mer als een pri

 

te haten:

 

ghi moetet al hier laten.

9.

Dit ist slot van al dat god beval:

 

dient mi ootmoedich sonder gal,

 

staet vast in uwen striden!

 

hout niet aent gras ende laet den val,

 

mer doedi dat, so sidi mal

 

int liden:

 

staet vast in uwen striden!

10.

Hebt lief verstaen die u versmaen,

 

recht als Franciscus heeft ghedaen,

 

hi is daer bi verheven,

 

so moochdi mit hem sonder waen

 

dat blide woort van god ontfaen

 

beschreven:

 

comt hier int ewighe leven!

B. 4. - Hs. 2, 1. h. screyn - 2, 5. sartein - 5, 2. o heer fehlt - 10, 4. sonder vaen.