Horae Belgicae

[p. 76]

¶ Nr. 31.

Dit is die wise:
Mijn hertken uutvercoren heeft,
du biste mi lief ende weert

Ic weet een maghet suverlic,
des wil ic mi verbliden.
niemant en sach al haers ghelic
nu noch tot ghenen tiden.
si is solaeslic boven al
ende boven allen maechden
verciert in shemels sael.

Lustentlic is haer aenghesicht,
die edele maghet fijn.
si is die boven die sternen licht,
so claer is haer aenschijn.
hoe reine is haer aenghedacht!
ic wil in hare ghenaden gaen
bi daghe ende ooc bi nacht.

Och woude si mijn ghedenken
die godelike maecht!
die viant die mi crenket,
hi soude sijn verjaecht.
uut mine weghe soude hi gaen,
die mi tot allen tiden
so dicke heeft leide ghedaen.

Die maghet is seer schoon ghedaen
mit lustentlike wesen.
mocht ic in hare ghenaden gaen,
so waer mine siele ghenesen.
mocht ic des weerdich sijn!
haer minne doet mi leven,
al is si veer van mi.

[p. 77]

5.

Op haer set ic mijn toeverlaet,

 

die edele coninghijn.

 

si is so schonen dagheraet,

 

si verlicht dat herte mijn.

 

si is mijns leides verdrijf

 

ende boven alle magheden

 

verciert is al haer lijf.

 

 

6.

Ic en can si niet volprisen

 

nae hare weerdicheit,

 

die vrouwe des paradises.

 

och waer ic des bereit,

 

ende dat ic quame daer bi,

 

so soude mijn herte in vrouden sijn,

 

dat seer bedrucket is!

 

 

7.

Haer minne ende ooc haer wesen

 

dat is mi altoos bi.

 

si is so hoghe verheven,

 

want si des weerdich is,

 

bi Jesus haren soon:

 

nu wilt al mijns ghedenken,

 

Maria maghet schoon!

B. 11. - Hs. 1, 7. in hemelrike (in shemels sael) - 5, 2. coninghinne.