Horae Belgicae

¶ Nr. 18.

Dit is die wise:
Volnae als die dach der vrolicheit

Doe god onse here gheboren wart
te Bethlehem in die stede,
ende doe verrees al mitter vaert
een schone sterne daer mede.
drie coninghen werden des ontwaer,
dat die sterne schene ooc also claer,
si seiden alghelike:
den joden is een coninc gheboren,
onse bede en is ooc niet verloren,
wi soeken hem int jodische rike.

Die coninghen scheiden doe van daer,
si en wouden niet langher beiden.
die sterne die scheen daer voor hem claer,
si soude si den rechten wech leiden.
die sterne was schoonre dan die dach,
si hielt altoos den rechten pat,
haer ganc was bi der eerden,
haer weghe die waren also menichfout,
mer god die hadde der sternen ghewout
ten einde dat si haer keerde.

[p. 45]

3.

Te Jerusalem quamen si eerstwerf aen,

 

die sterne bleef verloren.

 

si vragheden: weet daer iemant van?

 

een coninc is daer gheboren

 

...............

 

een teiken is van hem ghesien

 

so veer al in dat oostenrike.

 

wi en connen des ooc niet ontgaen,

 

wi sijn hier comen ende beden hem aen

 

wi drie alghelike.

 

 

4.

Doe Herodes dat vernam,

 

sijn anxt en was niet clene.

 

hi wert in sinen sinne ooc also gram

 

ende alle die stat daer mede.

 

hi liet halen die hoochste priesteren

 

ende daer toe die wijste meisteren,

 

si waren uutvercoren:

 

ghi heren, een dinc heb ic ghehoort,

 

condi mi des iet maken vroet,

 

waer dit kint is gheboren?

 

 

5.

Si seiden alle: dat is waer,

 

te Bethlehem ist gheboren.

 

dat sprac al den prophete claer

 

so menich jaer te voren.

 

doe Herodes dat hadde vernomen,

 

die coninghen dede hi voor hem comen.

 

hi vraechde hem heimelike:

 

ghi heren, condi wel verstaen,

 

waer saechdi sine sterne opgaen

 

uut uwes coninghes rike?

 

 

6.

Die coninghen en dachten daer in gheen quaet,

 

si seident hem openbare.

 

Herodes sprac: ic gheve u raet,

 

te Bethlehem suldi varen.

 

ic segghe u dat al toe voor waer,

 

dat kint dat suldi vinden aldaer,

 

dat heb ic wel vernomen.

[p. 46]

 

als ghi weet, waer dat kindekijn is,

 

so maket mi des kindes wis,

 

als ghi wedercomen.

 

 

7.

So wil ic comen als ic eerst can

 

ende wil hem doen groot ere:

 

dat kint dat wil ic beden aen

 

voor enen landesheren.

 

die coninghen scheiden doe van daer,

 

die sterne die scheen daer voor hem claer,

 

si soude si rechte leiden.

 

die sterne die soude doe voor hem gaen

 

al totter stat, daer si bleef staen,

 

daer Maria ende haer kint in waren.

 

 

8.

Die coninghen traden in dat huus,

 

daer toe en was hem niet lede,

 

si vonden dat kindekijn schoon edel ende claer,

 

Maria ende Joseph daer mede.

 

si vielen neder op hare cnie,

 

si beden dat kindekijn aen alle drie

 

mit rechten ootmoedighen sinnen.

 

si loken op haer schatten so bout,

 

si offerden merre, wirooc ende gout

 

mit herteliker minnen.

 

 

9.

God die vader dedet hem openbaer

 

des nachtes in haren dromen,

 

si souden van Herodes vaern,

 

niet weder tot hem comen.

 

si waren des so wel ghetroost

 

ende waren van Herodes verloost,

 

dat quam hem alghelike:

 

si waren des so wel ghemoet,

 

si voeren enen anderen wech so goet

 

tot hares coninghes rike.

B. 70. - Hs. 1, 10. oen (hem) - 2, 8. oer (haer) - 2, 10. keerden - 5, 1. segden - 6, 9. wys - 8, 6. baden.