Horae Belgicae

[p. 35]

¶ Nr. 11.

Dit is die wise:
Conditor alme siderum.

Van vrouden ons die kinder singhen
des avondes, doe si heimwert ghinghen,
dat god onse here gheboren wart
op enen wel heilighen kerstesnacht.

Dat was die alrecoudeste nacht,
die god der werelt ie ghegaf,
die god der werelt ie gheschiep:
in eenre cribben wert hi gheleit.

Te Bethlehem wert hi gheboren,
in eenre cribben wert hi vercoren.
daer en was niemant nae noch bi
dan Joseph ende die maghet Marie.

Maria en hadde haer niet bereit
tot enigherhande wieghencleit,
daer si haer lieve kint in want.
Joseph die tooch altehant

Die hosen van den benen sijn,
die men ons noch tAken latet sien,
ende daer toe dat wel heilighe cleet,
daer god sine menscheit in ontfenc.

Die coninc Herodes die toornde hem seer,
hi sprac: hoe soude een arme deern
een kint ghewinnen sonder man,
dat heer waer over die werelt al?

Coninc Herodes, des doet ons noot!
nu slaet ons alle die kinder doot,
en spaert noch coninc noch keisers kint
so waer ghise in den lande vint!

[p. 36]

8.

Si sloeghender elf dusent doot,

 

si storten al haer jonghe bloet.

 

hoe diep dat si daer inne woeden

 

al in der jongher kinder bloede!

 

 

9.

Een stemme al van den hemel quam

 

tot Joseph den wel heilighen man:

 

schaffet u van heen, des doet ons noot,

 

of Jesus Cristus blivet hier doot!

 

 

10.

Joseph die liep ende ran

 

dat hi een eselkijn ghewan,

 

daer op sette hi dat maechdekijn

 

mit haren wel lieven kindekijn.

 

 

11.

Maria doe vaste voort ghereet

 

den langhen wech, den smalen pat

 

so veer al in dat Egiptenlant,

 

daer waren si al onbecant.

 

 

12.

Daer nae over drie ende dertich jaren

 

wert Jesus aen dat cruce gheslaghen.

 

dat cruce was .xv. voeten lanc.

 

och Jesus Cristus was so cranc

 

 

13.

Van gheiselen ende van swaren slaghen,

 

dat hi dat cruce niet en conde ghedraghen.

 

daer toe soude wi ons voeghen,

 

dat wi tcruce mit hem droeghen.

B. 65. - Hs. 2, 4. gelecht - 5, 4. Die hasen.