Horae Belgicae

[p. 32]

¶ Nr. 9.

Nu vervrouwen wi ons tot deser liever stont,
men doet ons groter vrouden cont:
ons is gheboren in der werelde troost,
van hem is al die werelt verloost.

des sulle wi alle wesen vro,

singhen ende springhen ho:

gloria in excelsis deo.

Van Jesses wortel gaerdekijn,
van ons moetstu ghelovet sijn
ende ooc dat soete bloemekijn,
dat ons god liet in menschelicschen schijn,

des sulle wi alle wesen vro cet.

Waer sach ieman alsulken meit,
die sonder wee ende sonder leit
der werelt heeft een kint ghebracht?
dat hevet ghedaen die godes cracht.

des sulle wi alle wesen vro,

singhen ende springhen ho:

gloria in excelsis deo.

B. 63. - Hs. 2, 4. menschelickenschen