Horae Belgicae

[p. 20]

¶ Nr. 3.
Van der hoochtijt van kersdach.

Alleluia.
God groet u edel maechdekijn,
ghebenedijt so moeti sijn
al opten dach van heden!
ghi hebt ghebaert een kindekijn
al sonder wee ende sonder pijn,
dat edel is van leden.

Alleluia.
Heer Jesus lach int cribbekijn,
men sach sijn naecte ribbekijn,
sijn decsel was seer dinne.
van couden so weende dat kindekijn,
doe sprac Maria die moeder sijn:
nu swighet, mijn lieve minne!

Alleluia.
Een os ende ooc een eselkijn
verwermden dat kint die lede sijn,
die aen der cribben stonden.
het was seer cout int huselkijn,
al daer en was roc noch hemdekijn,
hi lach int hoy ghewonden.

Alleluia.
Die herden in den velde laghen,
grote claerheit dat si daer saghen,
si waren al in varen.
een heilich enghel quam tot hem
ende seide: gaet tot Bethlehem,
daer is godes soon ghebaren!

Alleluia.
Ghi herden, en weest nu niet vervaert!
gaet haestelic tot Bethlehem waert,
daer is een kint gheboren

[p. 21]

 

van eenre reinre maghet fijn,

 

hi sal onser alre verlosser sijn,

 

hi is daer toe vercoren.

 

 

6.

Alleluia.

 

Die herden ghinghen al te samen

 

so langhe dat si tot Bethlehem quamen,

 

daer si die maghet vonden.

 

si songhen vrolic, si dreven jolijt,

 

si aenbeden dat kint ter selver tijt,

 

si saghen daer aen groot wonder.

 

 

7.

Alleluia.

 

Die coninghen quamen al daer van verre

 

gheleit bi eenre niewer sterre.

 

si brachten haer offerhande

 

als merre, wirooc ende gout,

 

si gavent den kinde in sijn behout,

 

si toghen wederom te lande.

 

 

8.

Alleluia.

 

Doe coninc Herodes dat vernam,

 

wert hi so toornich ende gram,

 

hi dachte in quaden saken,

 

daer menighe moeder schade bi nam

 

ende also menich onnosel lam

 

sijn leven daer om moeste laten.

 

 

9.

Alleluia.

 

Maria nam haer kindekijn,

 

Joseph te volghen mit groter pijn,

 

si togher mit in groter sorghen

 

al in Egipten, si bleven daer,

 

tot dat die enghel hem brachte die maer,

 

dat Herodes was ghestorven.

 

 

10.

Alleluia.

 

Doe toghen si weder te lande waert,

 

als hem die enghel hadde openbaert,

 

int lant van Galileen.

[p. 22]

 

daer woonde Jesus mit sijnre moeder

 

ende Joseph haren trouwen behoeder

 

een langhe tijt in vreden.

 

 

11.

Alleluia.

 

Nu laet ons allen mit herten rein

 

aenbeden dat soete kindekijn clein

 

ende sijn lieve moeder mede,

 

dat hi nae deser corter tijt

 

ons wil gheven sijn hemelrijc

 

ende sinen ewighen vrede.

B. 67. - Hs. 1, 4. huden - 2, 5. colden - 3, 5. colt - 3, 7. gevonden - 4, 2. hierden - 4, 6. segde - 7, 2. van veer - 9, 4. toghen.