De hane va Job. Euëver deere en luuj oet 't land va Mergraote

[p. 103]

De maot i g'n tesj

Veur Dr. Winand Roukens* op 28 april 1956
gooj knechs zun raar, dao moos me zich e sjtökske va konne zieje
'noe howt dich mar good Winand, da weursj te neet kraank

Winandus waor eine fiene knech i ge veld.
Doa waor geine in d'r ganse pajie* väör gei geld
Te kriege dae zooë sjooën koos plooge.
Hae wis d'r ploog te sjtumme en de vaore te vooge

Zooë krek en egaal, zooë sjuus geteld
Van ein aaf en op ein aan, in 't Bekkerveld,
Oppe Wippeberg of oewe de sjtökke looge;
't Waor richtige sjpas väör de luuj die 't zooge.

De boereknechs kinne dat hujerdaags neet mieë.
Ze höbbe gein hart väör 't veld en 't vieë.
Akkere*, billeke*, sjtreupe*, deep plooge väör zaod,
't Is mar get väör g'n vot gehouwe, de maot
Höbbe ze neet i g'n tesj. De haze loupe zich kepot
In de krungele* in de vaore van d'r tractor - melot*.