Liedeken.
Ghy die Christum bemint, so u woorden luyden,
Jacobus seyt, dat het geloof is doot
daermen gheen boexcken vint verstaet Schrifts beduyden,
Maeckt u hoop leyt tot vierige lieft groot,
Aen d'armen inden noot, seer out en traech,
Aensiet die naect en bloot gaen alle daech,
Door ouderdom warachtich zijn haer selven onmachtich
Troost haer zijt die gedachtigh,
Weet liefd', maeck 'tgeloof crachtich, so ons Paulus leert gestaech.
| |
Lieft ghy Christum, bewijst het d'Armen zijn leden,
Op als ghy sult roepen, vverden verhoort,
Den hongerigen spijst, den naeckten wilt cleden,
Weest doch ghestelt als doenders van Gods woort,
Soo vergadert ghy voort een Hemels schat,
Dat den dief niet becoort om graven plat,
Soo sult ghy schat vergaren by de Hemelsche scharen,
Aen d'Armen vol beswaren, want Christus gebiet ons dat.
Dat ist seyt t'onser leer, wel hem zy den ghenen,
Die aenneemt hier der nootdruftighen last,
Christus seyt selfs noch breet, die daer sucht en steenen,
Wilt goedertier by u nooden te gast,
Die nae zijn woort doen vast, voorwaer die sal
salich zijn, hier op past, ghelooft dit al,
Dat die 'tbroot sullen eeten in Godes rijck gheseten,
En wilt dit niet vergeten,
Lieft ghy Christum wilt weten, troost zijn leden int aertsche dal,
Slacht den iongelinck niet, Die Christus quam vragen,
Goe meester fijn, wat dinghen moet ick doen
salich te werden siet, hoort Christus ghewaghen,
Sprack hoort nae mijn, gaet haesten wilt u spoen
Vercoopen all u goen, en gheven claer
om den Armen te voen, hy ginck voorwaar,
Is van Christus geweken, sonder yet meer te spreken,
Daer sachmen 'tgeloof breken,
De hope bleef versteken, want de liefde was veer van daer.
Princen niet vreck en weest hier tegens den Armen,
Die zijn bedroeft, troost haer met gaven milt,
Gheeft liefdich minst en meest', die suchten en kermen
All haer behoeft, soo liefd' volbrengen wilt,
Troost met ootmoet ghestilt, door reyne deucht,
Laet gheloof zijn u schilt, in hoop verheught,
Lieft Christum al gelijcken, want hier u Trou moet blijcken.
Wilt d'Armen niet beswijcken,
Lecht in ghemeen en rijcken, verwacht den prijs met geneucht.
Met gheneuchten.
|
|
Auteursrechtvrij