|
| |
| |
[Folio Lll3r]
[fol. Lll3r]
| |
Refereyn.
Abraham heeft ghelooft, ende 'tis hem ghereeckent
tot rechtvaerdicheyt, door zijn vaste hoopen:
Heeft het mette wercken zeeckerlic beteeckent
in ghehoorsaemheyt zijns zoons t'offeren De texten spreeckent
dat hoop niet beschaemt: wilt met ooren oopen
hooren, wie Godt ter salicheyt heeft gheroopen,
Dat zijn de gheloovighe met hoopen vast,
Die hy niet verlaten en sal. Dus wilt ontknoopen
de wercken des gheloofs, dats lieffde, daer op past:
Daer gheen hoop' en is, gheen ghelooff en wast.
Want hoope gheeft ghetuyge van ghehoorsaemheyt,
Ghehoorsaemheyt baert lieffde, lieffd' zijn naesten ontlast.
Roompt dan niet ydelic. Hoort wat Iacobus seyt:
'tGhelooff sonder lieffs wercken is doot, hy claerlic uyt leyt.
Laet lieffs daet romen, slacht niet den Phariseus meden:
Want lieffde te bewysen, dats 'tghelooffs werc verspreyt,
Lieft ghy Christum het hooft, soo troost dan oock zijn leden.
Lieft ghy Christum 'thooft, wiltet aen zij leden bethoonen,
Als Iacobus seyt, u gheloof doet blijcken uyt u wercken,
Ick sal u mijn wercken uyt den gheloof sonder hoonen
bewijsen: seyt hy, O heylsame leer ydoonen,
Wat nutticheyt ist mijn broeders, wilt dit aenmercken,
Soo yemant seyt dat hy 'tgheloof heeft als den stercken
End' gheen wercken bewijst, can dat salich maken siet,
Vind' ghy broeder of suster naect t'eenigher percken,
En secht, gaet in vreden, werdt warm, en helpt hem niet,
Sulc een gheloof is doot, hy claerlic bediet,
Dus wilt barmherticheyt den behoeftighe bewijsen,
Christus seyt, die d'alderminste in mijnen naem biedt
een dronc waters, 'tsal niet ongheloont zijn, laet lieft rijsen,
Als die arme Weduwe, die hy hoochgelic gaet prijsen,
Om die twee penninghen, die sy inden offer-kist deden,
Sy gaffe van haer armoede, om den behoeftighen te spijsen,
Lieft ghy Christum het hooft, soo troost dan oock zijn leden.
| |
[Folio Lll3v]
[fol. Lll3v]
| |
Die daer seyt, dat hy Godt lief heeft voorwaer,
End' zijnen naesten metter herten haet daer beneven,
Dies is seyt de Schriftuyr een valsch logenaer,
Want diet hooft liefd', liefd' ooc de leden eenpaer.
End' Christus is 'thooft, d'ermen zijn zijn leden verheven,
Dus vercoopt all dat ghy besidt, wilt aelmissen gheven
aen de oude behouftighe, som lam, som blindt,
Hoort wat Christus by Matheo heeft beschreven,
Mijn en suldy altoos niet hebben hy claer ontbindt,
Maer den armen, dus troost zijn leden waer ghy die vindt,
End' hoort ooc wat d'Apostel Paulus gaet schrijven,
Al hadt ic 'tgheloove, seyt hy, dit wel versindt,
Dat ic berghen conde versetten, sonder liefd' bedryven
Soo waert al niet, dus wilt inde liefde blyven,
Alle verdorde rancken werden vanden stam ghesneden,
Die gheen vruchten voort brenghen, wilt in liefde verstyven,
Lieft ghy Christum het hooft, soo troost dan oock zijn leden.
Princen maect reyn u zielen, in liefde onbevlect,
Christus heeft ons de lieft voor 'tnieuw ghebodt na ghelaten,
Roemt dan gheen gheloof, daer de liefde ghebrect,
Waer in werden 'tgheloofs wercken te recht perfect,
Dan uyt Christelicke liefde comen te baten
den behouftighe Armen, als Christi litmaten,
Aenmerct 'texempel vanden ouden Tobias reyn,
Die Godt meer vreesden dan 'tConincx placcaten,
Want 'tgheloof, hoop end' liefde sterc in hem was certeyn,
Den Propheet Esaias leert noch voor elcx ghemeyn,
Dat ghy den hongerighen u broot sult breecken,
Ende den ellendighen in u huys leyden pleyn,
Ooc den naecten cleeden, die daer weenen end' smeecken,
Dan sal u licht schijnen claer uytghestreecken,
Als ghy de bedroufde zielen versaet in vreden,
V donckerheyt wert als den middach licht onbesweecken,
Lieft ghy Christum het hooft, soo troost dan oock zijn leden.
|
|
Auteursrechtvrij