Spieghel der werelt

[fol. 48v]

Sardinien.

Dit eylandt werdt eertyts ouerwonnen = heerlyck

Van Pisa, d'oude stadt, in Tuscanen vermaert,
Maer moet nv Spaengnen synen dienst ionnen = eerlyck;
Wiens wetten Calaris als de hooft-stadt bewaert:
Hier groeyt Sardonica een cruydt van vremder aert,
Dwelck den mensche al lachende brengt om syn leuen.
T'heeft en dier, wiens ghelyck nerghens en wordt ghebaert,
T'is als een hert ghehaert = maer niet soo verheuen;
Syn hoornen op den rugghe haer cromte gheuen:
T'is gheytachtich ghefatsoent, wordt Muflo ghenoemt.
Seer veel alluyns comt ons van hier beneuen:
Int Zuyden ist plat landt marassich beroemt,
Noortwaerts heel berchachtich, gheboomt en ghebloemt:
Ouer syne locht hoortmen met gheschrey = claghen,
Mids dat sy t'volck dick met peste en sieckte verschroemt.
Een onghesonde locht baert alderley = plaghen.

[fol. 49r]

Sardinia. 38.