Spieghel der werelt

[fol. 41v]

Italien.

Italien, dwelck voortyts droech der werelt = croon,

Door de gheschicktheyt en vroomheyt der Romeynen,
Synde met alderley consten beperelt = schoon,
En laett noch van gheen landt synen loff vercleynen:
T'heeft de vruchtbaerste ackers, de beste wey-pleynen:
En t'ghenoechlyckste gheberchte datmen vint,
Dwelck veel schoon riuieren en claer fonteynen,
Aen weer syde in zee loopende, aen d'Alpes ontghint.
T'wordt ouer al soo vet en weeldich bekint,
Sonderlingh' daer de Po bespoeyt Lombaerdyen,
Datment als eenen wel beplanten hoff bemint,
Die leuende beecxkens heeft aen alle syen:
D'oeft boomen hier wyn leyen oock coren vryen:
En in Calabria men t'Manna vallen = siet.
Wandelt hier dan die uwen gheest, wilt verblyen:
Want landt besien sonder ditte, is met allen = niet.

36.

[p. *6]

Italiae Nouissim Descriptio

[fol. 42r]

Italia. 32.

Ia niemant en weet wat ryckdom oft wellust = is,

Die Italien niet en heeft betreden:
Want gheen landt en isser dat soo toe-gherust = is
Met heerlycke ghebouwen en vaste steden:
Hier is t'heylich Roomen, daer de Paus met vreden
Sinte Peeters stoel en slotelen bewaert;
D'edel Napels, t'groot Milanen, Spaensch van zeden,
Tschoon Florencen, t'ryck Venegien wydt vermaert,
T'moedich Genua, d'oudt Rauenna onuervaert,
T'vet Bolonien, en meer dier ghelycke:
Soo dat gheen gheleerde eenighe moeyte en spaert,
Op dat hyt hier al sie en wel bekycke:
Ia onvolmaeckt acht alle conste en practycke,
Die niet en comt na den treck en leer' = aerdich,
Van dese edel Const-voedstere, milde en rycke:
Na een goey voedster aerden, is alle eer' = waerdich.