Memorieboek der stad Ghent van 't jaar 1301 tot 1793. Deel 2

1565.

Commissarissen.

Messire Lamoral d'Egmont, prince de Gavere, conte du dict Egmont, gouverneur, etc., et en son absence Messire Maximilien Vilain, chevalier, seigneur de Rassenghien, etc.

Messire Floris de Montmorency, baron de Montigny, Leuze, etc.

Jacques de Claerhout, chevalier, seigneur de Maldeghem et de Pitthem.

Philippe de Saincte Aldegonde, aussy chevalier et seigneur de Noircarmes.

Schepenen van der Kuere.	Schepenen van Ghedeele.
Joncheere Jan Damman, heere van Oomberghe.	Mer Jan de Grutere, heere van Loovelde.
Lievin van Sicleers, heere van Gotthem.	Willem van Sicleers.
	Adriaen Borluut.
Arendt van Grijspeere.	Jan Heyman, f^s mer Lievins.
Adolf de Grutere.	Franchois van Wijchuus.
Geeraert Triest.	Geeraert d'Oosterlinck, f^s Geeraerts.
Jan Heindricx.
Bussaert van Hembyze, f^s Jans.	Jooris Vijts.
Geeraert van Eechoute, f^s Adriaens.	Andries van der Sare.
	Gillis van Loo, de jonghe.
Franchois Hueribloc.	Gillis Dhanins.
Lucas Cluetrijn.	Jan Dhooghe, f^s M^r Lievins.

[p. 333]

Servaes van Steelant, f^s Maercx.	Thomaes van der Craeyen, d'aude.
Lievin van Casele.
Bernaert Bornaige.	Gooris van den Bogaerde.

Ontfanghers.

Joncheer Pieter Cortewille, bouchoudere.

Heindric Zoete, van den wercke.

Loijs van Havere, van der Yssuwe.

[Item, in dit jaer waren ghecontinueert de twee schepenen van der Kuere Lievin van Sicleers, heere in Gotthem, ende de voorschepene van Ghedeele met Jan de Grutere, heere van Loovelde, het welck te Ghendt noyt ghesien en was dat eenige schepenen aenbleven. (K.M.)]

Den xxviij^en April was op de Nyeustrate, by Sente Jacobskercke, eene loterye uutghetrocken daer eenen Jan Monuwet, vry goutsmit, de divyse ingheleyt hadde, ludende aldus:

Heeft ons Christus verlost met zynen bloede root,
Wat helpen sielmissen ende uutfaerden naer de doodt.

Ende was met goede redene ghevanghen by den heer deken van Ronsse, ende den xvj^en Meye was hy by den deken van Ronsse gecondempneert te doen doene eene uutvaert metten vigilien binnen S^te Jacobskercke, aldaer dat quamen offeren de vier ordenen, ende moesten hebben elck een broodt van vier ponden, ende in elck broot stekende eenen stuyvere, ende betalen alle die mysen van justicien.

[Item, in dit jaer, was volmaect de brugghe aen 't Nieulant, die te vooren van haut hadde ghemaect gheweest ende sonder eenighe brugghe xvij jaren, ende men hilt er eene wei, ende was in pachte ghestelt in 't jaer xv^clij, ende was verpacht by Lievin Dierickx een jaer xviij pont ij schellinghen

[p. 334]

grooten 's jaers, ende was alsoo verpacht van jare te jare tot dat sy volmaeckt was in 't jaer xv^clxv. - Item, het yserwerck dat gheleyt is in de selve brugghe aen 't Nieuwlant was gheweghen in de waghe om elck gat; besonder het eerste gadt naest den Schutterhove woech v^clxxxiij , ende om het middelgat was gheweghen, den xvij^en Meye xv^clxv, ende woech viij^cliiij ; den xxiiij^en in Meye daer was gheweghen om het derde gat naer den Nieuwlanden, woech v^cxx ; dus in 't gheheel xix^c en lij pont yser, ende men ginck voor de eerste reyse over die brugghe donderdaechs 's avonts, ontrent den viij^en in Meye van 't jaer xv^clxv. (K.M.)]

Op den xviij^en Meye was de straetschendere die ghevanghen was in de halfvasten-weke, zoo voorseyt staet, up de Vrydachmaert levende aen eenen staeck verberrent.

Den viij^en July quam binnen deser stede van Ghent, de grave van Mansvelt met sijnder huusvrauwe ende met zyne dochteren, metten heere van Wackene, omme te reysene naer Anthelesyen, omme te gaen beslapene eene machtige dochtere die ten huwelijcke hebben zoude den zone van de ducesse van Parma, gouvernante van den lande van Herwaertsover, ende quamen met hem binnen Ghendt de grave van Hoorne, de grave van Hoogstraten, de grave van Ligny, ende was hemlieden den viij^en dach van July ghegheven een costelijck bancket, daer zy quamen met vele dochteren, de welcke de reyse metten grave van Mansvelt ende den heere van Wackene aenveerden.

[Den xiij^en July waren drie mannenpersoonen die ghevanghen waren by Mariekeercke by den bailliu van Auderburch ghedaen onthoofden, ende twee van hueren vrauwen aldaer ghegheesselt. (Pr. Ar. ^B.)]

[p. 335]

Den xv^en July was binnen Ghendt ghedreghen een schoon processie generael omme te biddene dat de kersten princhen ende heeren mochten victorie cryghen jeghens den grooten Turck, die met groote menichte van galeyen lach voor de stadt van Malta.

[In dit voornoemde jaer was ghefundeert de gheheele caye ende vulmaect totten Veebrugghe. (Pr. Ar. ^B.)

- Item, den v^en September was in de waghe gheweghen twee looden klommen om te stellen op den turre staende op het Sas, weghende t' samen ij^clxviij pont. (K.M.)]

Den xxij^en October waren binnen deser stede gebracht, in de hostelrye ghenaempt de Draecke in de Burchstrate, twee jonghers van de audde van xvj of xvij jaren, met noch vier andere die ghedaen hadden eenen roof in den Poldere ontrent Schoondijcke. Den xxvij^en der maendt November, waren sy op de Vrydachmaerct levende verberrent.

In dit jaer curts naer Meye begonst in de landen van Herwaertsovere te rysene groote dierte van coorne ende andere granen, ende galt de oostersche rogghe, die men hiet Revelerere, den gendtschen zack xvij sch., zoo xviij schellingen groote, ende de taerwe xxj ende xxij schellingen groote.

Den ij^en van Meye was 't inghevallen Sas wederomme van nyeus ghedolven, ende alsdoen gheleyt den eersten steen.

Den ij^en November in dit jaer lxv arriveerde binnen Zeelandt de grave van Mansfelt ende de heere van Wackene, hoogbailliu van Gendt, met huerlieder schepen, verselschapt met alle de porsoonen, huerlieder huusvrauwen ende jonghe dochteren, commende vry ende ghesont uut Anthelisyen, ligghende in Portugale, metter bruydt, moye wesende van

[p. 336]

den coninck van Portugale, uutghenomen eenen trompettere die in 't wedercommen ghestorven was, ende den viij^en November arriveerden zy op 't Sas deser stede, ende quamen 's avondts ontrent den thien uren binnen Ghendt, hoewel de bruydegom van Brusele in poste quam duer Ghendt naer 't Sas, daer hy zyne bruyt willecomme hiet, ende zeer curts vertrack hy weder in diligentien naer Brusele, ende den ix^en Novembris reden de voornoemde persoonen zeer triumphant de stede besien met alle de vrauwen ende joncvrauwen tot binnen Sente Janskercke, in zeer costelicke horsbaren ende waghenen, ende 's anderdaechs vertrocken zy naer Deremonde, ende alsoo naer Bruusele, daer 't zelve gheselschap zeer triumphantelijck inneghehaelt was, ende wiert daer de bruyloftfeeste ghesoleniseert tusschen den voornoemden prinche van Parmen ende de voorseide dochtere; men tournoyder ende stacker met grooter triumphen.

Den xxviij^en in April was binnen Ghendt ghedraghen eene zeer schoone processie generael, danof de vergaderinghe was binnen der kercke van Sente Jans, ende insghelijcx binnen der selver kercke van Sente Jans wert de dienst ghedaen.

In dit jaer waren groote menichte van curten ghesleghen die alle valsch waren, zoo dat elck die refuseerde t' ontvanghene, zoo dat men ter causen van dyen daeromme t' hove reysen moeste, ende op den iiij^en Meye, de zelve curten nyet wesende ghedaen slaen by den keysere ende der K.M., waren ghestelt de viere op een curte, zoo dat de loop ende ganck van den zelven curten cesseerde.

Den vij^en dach van Meye was binnen den lande van

[p. 337]

Vlaenderen, te weten, binnen der stede van Curtrijcke d'eerste justicie ghedaen van rabraken; dwelck noynt aldaer en was ghebuert, maer wel binnen Antwerpen ende Mechelen, ende was te Curtrijcke aldaer gherabraect eenen ghelugietere, die noyt van alle de persecutie hem niet eens en roerde noch een woord en sprack, ende was met hem levende verbrandt eenen straetroovere, die huerlieder v^c gherooft hadden, recht buuten Curtrijcke, een pachthof van eenen pensionnaris van der voorseider stede, ghenaempt het Goet ter Moten, welcke roovers ende straetschenders noch vele andere diversche rooven ende moorden ghedaen hadden.