Memorieboek der stad Ghent van 't jaar 1301 tot 1793. Deel 2

1563.

Commissarissen.

Messire Lamoral d'Egmont, prince de Gavere, comte du dict Egmont, gouverneur, etc.

Floris de Montmorency, seigneur de Montigny, Leuze, etc.

Jacques de Claerhaut, seigneur de Maldeghem, Pitthem, etc.

Schepenen van der Kuere.	Schepenen van Ghedeele.
Mer Nicolas Triest, heere van Auweghem.	Joncheer Jacob Beths, heere van Auweghem.
Jan van Hembyze, f^s Willems.	Geeraert Triest.

[p. 322]

Joos Donaes.	Willem van Sicleers.
Adolf de Grutere.	Franchois Borluut.
Antuenis van Wijchuus.	Geeraert Sersanders.
Jacques Rufelaert.	Geeraert Oosterlinck, f^s Geeraerts.
Heindric Zoete.
Jacob Feron.	Lievin van der Meulene.
Pieter de Brune.	Servaes van Steelant, f^s Maercx.
Jan de Sceppere.	M^r Adriaen Meganck.
Willem van Auweghem.	Gillis van Loo, d'oude.
Nicolaes Baes.	Philips van den Bossche, f^s Philips.
Pieter de Keysere.
	Gillis Dhanins.
	Joos Schauteete, f^s Lievins.

Ontfanghers.

Jooris Vijts, bouchoudere.

Franchois Hueribloc, van de wercke.

Lucas Cluetrijn, van der Yssuwe.

Op Sente Cathelynenavondt waren in den nacht in den Baers aen den Callenderberch, van haerlieder bedde ghehaelt drye straetroovers, ende op den Cautere, in de herberghe ghenaempt het Peertstrontge, noch twee straetroovers, de welcke op Sente Cathelynendach voor den noene gheexamineert waren, ende naer den noene waren zy ghebrocht ter bancke ende scherper exame, ende 's anderdaechs wederomme de drye van vijfven, ende den iij^en December waren zy op de Vrydachmaert dezer stede levende verbrandt.

Den ij^en December was voor 's Gravensteen op eene stellinghe onthooft eenen Gillis van Overwale, omme eenen dootslach, die hy moordadelick ghedaen hadde aen eene jonghe dochtere, ghenaempt Mayken van Reysschoot, ende was begraven met vier tortsen voor de kerckduere van Sente

[p. 323]

Jans neffens der jonghe dochtere, die hy zonder cause ofte redene oft zonder een woort te sprekene dootstack, daer zy in haren wynckel zat, ende was rechtsweere van selfs Gillis huusvrauwe.

Op den xvij^en dito was ghevanghen Gillis Ghyselins, autcleercooper, om dat hy ten diverschen stonden ghestolen goet afghecocht hadde van de dieven ende roovers die 't zelve ghestolen ende gherooft hadden, omme 't welcke hy jeghens de accusateurs proces nam, 't welck langhe duerde.

Den xj^en in Lauwe was binnen der stede van Brugghe in den nacht eenen roof ghedaen ten huuse van de weduwe van eenen spaengnaert, zoo men zeyde wel van 1000 guldens, wanof vier roovers 's woensdaechs in den nacht quamen van Eeke naer Ghendt, ende huerden buyter Waelpoorte eenen waghene, elck persoon v schellingen groote, omme te reysene naer Brusele, ende quamen, binnen dat de waghen zijn gereetschap maecte binnen der stede van Ghendt, in den Ynghel in den Hoyaert, ontrent den iij uren in den morgenstont, ende deden viermaken ende droncken bier ende ghebranden wijn, ende saten up huerlieder waghene ende reysden naer Aelst, ontrent den iiij uren, 't welcke vernemende joncheere Pieter van Overbeke, onderbailliu van Ghendt, ontboodt by hem eenen Pieter de Ruddere, officier, met drye hallebardiers, ende sandt die te peerde hemlieden vervolghende, ende reden den wech zijdts omme, zoo dat sy voor den waghene quamen binnen der stede van Aelst, die aldaer ghereetschap deden maken, ende als zy binnen der stede met den waghene quamen, eer zy wel van den waghene consten gheraecken, waren in handen van justicie ghevanghen ende naer d'exame waren ter torture gheleet,

[p. 324]

alwaer zy kenden den roof binnen der stede van Brugghe ghedaen te hebbene, daer toe zy waren achtien persoonen, kenden van ghelijcken dat zy in alle de roofven, zoo wel binnen de beslotene steden als daer buuten, gheweest hadden, midtsgaders diversche moorden ghedaen, ende den xxvj^en Lauwe waren de twee ghestelt op eenen yseren rooster aen eenen yseren staecke met ketenen, rugghe tegen rugghe ghebonden, ende onder den voornoemden roostere was groot vier ghemaeckt ende boven haerlieder hooft eene tonne vul stroo, peck ende terre, daer inne veel gaten waren daer 't zelve pek duere op huerlieder lijf drupte, ende de voornoemde roostere was met eender wippe up ghehaelt ende alsoo weder neder ghelaten tot zy levende verberrendt waren, ende de derde was levende ghestelt aen eenen staecke ende rontomme hem stroo ghestelt vier voeten van hem, ende alsoo levende verbrant, ende de vierde, die verwesen was met ghelijcke sententie, was wederomme in vanghenesse gheleet, ende den iij^en dach starf hy van plueris, ende naer dat hy ghestorven was zoo wiert hy verbrandt aen eenen staeck buuten der poorte, ende alsoo by syne medeghesellen aen eenen vierhoeckten staeck ghehanghen.

Den xxix^en dito verberrende de herberghe ghenaempt de Zwane t' Sente Baefs van inviere.

Den ij^en September was op 't Sluseken binnen deser stede ghehauden den eersten maerctdach van allen manieren van grane, beginnende donderdach 's morghens ten viij uren totten avonde ende 's vrindachs 's morghens ter ghelijcker uren totten thienen, alle weken eens, ghenaempt den Zeeusschen Aert.

Op den vj^en December, op Sente Niclaesdach, alzoo vier

[p. 325]

schiplieden deser stede op de Coornleye haerlieder spriet uphijssen zouden, het ghewant brack ende viel de spriet op eenen jonghen knecht ende viel hem de herssenen in de kele, ende bleef ter stede doot.

Den ix^en dito waren by schepenen van der Kuere ghewijst vier ghesellen op de galleye, ende waren op 't Sluyseken t' schepe gheleet ende alzoo ghesonden naer Zeelandt.

Op den xvij^en Lauwe, vryndach, quam te Ghendt eenen boot uter zee met levende platen tot an de vischmaert, ende was de boot metten selven platen met xvj oft xviij ghesellen ghebrocht in de myne.

Den vj^en April, 's vryndaechs naer Paesschen, was ghehauden voor 't hof van Fines d'eerste peerdemaerct, ende alzoo alle vryndaghe eene peerdemaerct ter weke.

[..... Ende Adriaen de Rave, vleeschauwere cocht aldaer d'eerste peert xxij guldens, ende vercocht de selve Adriaen een peert zeven guldenen. (Pr. Ar.^B.)]

Ten zelven daghe waren by schepenen van der Kuere verwesen de moeder ende haer zone; de moeder was onthooft in 't Gravensteen, ende de zone was op de Vrindachmaert verbrant.

Item, dese schepenen deden maken de Nyeuwe Camere staende in 't scepenhuus, ende den xxix^en April was aldaer ghehauden d'eerste maeltijt van der vierschare.

Item, de zelve schepenen deden afbreken de ij^e Turrepoorte staende naest den Poel, die zeer steerck was van blauwe steenen.

[Item, de selve schepenen hebben ghecocht ten profyte van der stede de pampier-meulen, staende aen de Keyserpoorte binnen haerlieder schependom. (K.M.)

[p. 326]

- Item, dese voornoemde schepenen van den voornoemden jare hebben oock doen maken binnen huerlieder schependom de volmeulen aen de Vijf-wintgaten. (K.M.)

- Item, de voorseyde schepenen den ix^en Meye hebben doen legghen den eersten steen van de nieuwe brugghe aen den Minnemeersch, die te vooren van haut was, ende hadde gheweest veele jaren sonder brugghe, ende men hielt er een wei, ende was verpacht ten stede profyte in 't jaer xv^clxiij xviij ponden grooten 's jaers. (K.M.)

- Item, dese selve schepenen hebben noch doen legghen den xiij^en Mey voor den noen, voor haerlieder afgaen den eersten steen van der nieuwe kaye aen Sente Michielsbrugghe, streckende tot aen het conduit ofte gote van 't Sausselet. (K.M.)

- In dit schependom quam te Ghendt eenen meester Hugis, gheboren van Rijssel, booghmaker van der stede van Antwerpen, ende heeft ghenomen te beschieten den xxix^en in Maerte voor Paesschen, Asschenwoensdach sijnde, ij^c vrywitten, van 's morghens beginnende ten vier uren tot 's avonts ten viij uren in de langhe doelen met den cruysboghen in Sint Joorishof, daer af dat hy Hugis gheschoten heeft 's avonts ten ses uren ij^cxx vry-witten, ende wonder wel mede ij^c guldenen met de wedden, ende trock van hier also naer Rijssel, om van 't selve aldaer te doen. (K.M.)]