Memorieboek der stad Ghent van 't jaar 1301 tot 1793. Deel 2

[p. 317]

1562.

Commissarissen.

Messire Lamoral d'Egmont, prince de Gavere, conte du dict Egmont, gouverneur et capitaine general de Flandre et d'Artois.

Floris de Montmorency, seigneur de Montigny, Leuze, enz.

Schepenen van der Kuere.	Schepenen van Ghedeele.
Mer Jan de Vos, ruddere.	Jan Beths.
Joncheer Willem van den Kethulle.	M^r Franchois van Hembyze.
	Jan van Beaufremez.
Joos van Brakele, d'oude.	Joncheer Pieter de Vos.
Joncheer Pieter van der Couderburg.	Joncheer Charles de Grutere.
	M^r Lievin de Grave.
Jan van Pottelsberghe, over hem Joncheer Philips de Grutere.	Omaer Everwijn.
	Dominicus van Wijckhuuse.
	Geeraert de Sceppere.
Adriaen van Riebeke.	Lievin Heylinck.
Jan Heindricx.	Gillis van Loo, Onderberghen.
Joncheer Nicolaes van der Vichten.	Pieter van de Velde, f^s Pieters.
	Loijs van Havere, f^s Adriaens.
Geeraert van Eechoute, f^s Adriaens.
Jan Meyntkin.
Lievin van Casele.
Jacques Hugaert.
Beernaert Bornaige.

Ontfanghers.

Joncheer Pieter Cortewille, bouchoudere.

Lievin van Huerne, f^s Michiels, van de weercke.

Lievin Petrins, van de Yssuwe.

Den xxj^en Maerte was op de Veerleplaetse een man ghegheesselt totten bloede, met eene schroode voor 't hooft,

[p. 318]

op een schavout, ende ter zelver plaetse was hem zijn rechter handt afghesmeten, ende was ghecondempneert te betalen eene boete van vj^c guldenen, ende te betalen zijn vanghenescosten, ende dat omme dat hy sommighe van der wet van Verrebroeck, in 't landt van Waes, ghesmeten hadde omme huerlieder officie; hy was van Bevere gheboren by der stadt van Antwerpen.

In dit jaer, den xiv^en April naer Paesschen was de eerste weeck-maert ghehauden in de prochie van Wacken, 't welck vercreghen was by mijn heere van Wackene, hoochbailliu van Ghendt.

Den x^en dach van Meye wesende soendach was de papegay van den grooten ende audden gulde van mijnheere St. Jooris, tusschen drye ende vier uren naer noene afgeschoten by den grave van Egmondt, gouverneur van Vlaenderen, ende 's maendachs den xj^en Meye was ghedaen groote vieringhe met groot ghetal van veel wassen tortsen ende pecktonnen, ende dysendaeghs waren ghedaen triumphante incompsten te watere, daermede te winnen waren schoone prysen; insghelijcx was ghesteken te watere, daer van ghelijcken mede te winnen waren schoone prysen.

Den xiv^en Meye reysde de voornoemde grave van Egmondt met die van de weth op 't Sas, om aldaer te nemene de visitatie van de weercke.

In de maendt April anno 1562, naer Paesschen, nam mer Adolf van Bourgoingne, ruddere, heere van Wackene de reyse aen naer Spaengnen over landt deur Vranckerijcke, daer alsdoen groote twist was ter causen van den gheloove d'een jeghen d'andere, ende was dese reyse by hem ghedaen ten versoucke van de vier leden 's lants; maer principalick

[p. 319]

om die van Ghendt, ter causen van de Nieuwe Vaert, oock by advyse van de ducesse van Parma, ende de grave van Egmondt hadde brieven van recommandatien aen den coninck.

In dit jaer hebben die van Ghendt vercreghen aen de K.M. de hoocheyt dat zy vermoghen recht ende wet te doene op 't nieuwe Sas, ende dienvolghende hebben zylieden op den i^en dach van Meye ghedaen rechten aldaer eene galghe, daerby tooghende haerlieder vermoghen.

Den v^en Juny eene jonghe dochtere staende up 't Sas an 't roer van eenen schepe metten val van eenen mast es aldaer doot bleven, ende reden derwaert Heyndrick van Hauwaert, officier ende drye schepenen van der Kuere metten cleerck van den bloede, omme die te aenschouwene, zoo zy deden.

[Den voornoemden v^en dach van Juny was by den bailliu van den nieuwen Sasse aldaer ghevanghen eenen dief, de welcke hy bracht naer Ghendt, omme over hem justicie gheadministreert te werden, ende op den vj^en der zelver maendt was de voornoemde dief overgheleet ter tortuure binnen der stede van Ghendt. (Pr. Ar.^B.)]

Den vij^en Juny was te Ghendt ghedreghen eene processie generale omme dat Charles, de jonghe prinche van Spaengnen, toecommende grave van Vlaenderen, in grooter sieckten gheweest hadde, 't welck aen de beter zyde was, omme te bidden voor syne ghesontheyt.

Den vij^en dito was grooten brandt binnen der stede van Hulst, zoo datter afberrenden bet dan 200 huusen, ende bysonder oock het clooster van den Observanten.

[In dit jaer was groote beroerte binnen der Croone van Vranckrijcke in partien de conynck met eenighe edele ter eender zyde, ende andere edele met een ander partie

[p. 320]

ghenaemt Hughenoysen over d'ander zyde, zo datter groote ongheloovichede regneerde die hemlieden aen beede zyden seer sterck van volcke maecten ende jeghens elcander sloughen, ende aen beede zyden veele princhen ende edelen bleven. (Pr. Ar.^B.)]

In de maendt van Lauwe was te Ghendt uutghelesen zeker placcaet ter causen van de poincten die myne heere van Wacken uut Spaengnen brachte van de Nyeuwer Vaert ende vryheyt van diere.

[In de maent van Lauwe waren boven de acht dieners die te Ghendt langhe gheweest hadden by commissie van den hoochbailliu noch vier toeghestelt. (Pr. Ar.^B.)]

Den xviij^en dito starf de prelaet van Ste. Baefs, ende den xxix^en der zelver was zyne uutvaert ghedaen zeer costelick ende eerlick, ende quam in zyne plaetse resideren de president Viglius, ende maecte van de abdye eene proostye.

In dit jaer waren binnen dese stede vele mannen ende vrauwen ghejustichieert, zoo metten viere als metten zweerde, ter causen van de heresye.

In dit jaer op eenen vrydach, 's avonts tusschen den neghen ende tien uren, was grooten brandt buuten de Waelpoorte, zoo datter afberrenden twee soo drye huusen ende eenen stal, daer inne dat verbranden twee peerden ende vijf hoornebeesten.

In dit schependom den xviij^en Juny waren twee jonghe ghezellen ghevoert naer de galleye, den eenen was op de galleye ghewijst sijn leefdaghe, ende eenen anderen zes jaer.

Den ix^en Maerte waren by schepenen van de Kuere op de gallye ghewijst vijf ghesellen, ende waren voor den noene ghevoert naer 't Sas ende van daer naer Zeelandt.

[p. 321]

In dit schependom, den x^en dito, was by d'heeren van den rade in Vlaenderen ghecondempneert Clays Stoop, huyssier van der zelver camere, te biddene vergheffenesse ende in de boete van ij^c guldens, ende was ghedestitueert twee jaer van zynen state van huyssierschap, omme dat hy Clays zijn commissie gheexpedieert hadde.

In de maendt van Sporckel begonst zoo zeer te waeyen dat de mueren, caven ende daecken averecht waeyden, oock ter zee vele schepen bedorven, ende vele andere inconvenienten, welcken windt duerde continuelick beth dan acht daghen achtereen gheduerende.

Op den iij^en dach van April voor Paesschen was het nieuwe Sas deurghesteken, zoo dat het zaut watere quam ende vloeyde in 't zoete watere ende 't zoete in 't zaute, in zulcker voeghen dat op den vierden dach der zelver maendt eenen schipper ghenaempt Pieter Jacobssen Zoetemelck, gheboren van Leckerkercke, daer deure quam ghevaren van uut Dordrecht, brynghende met hem in 't voornoemde schip xcvj versche salmen.