Memorieboek der stad Ghent van 't jaar 1301 tot 1793. Deel 2

1560.

Commissarissen.

Messire Lamoral d'Egmont, prince de Gavere, conte du dict Egmont, gouverneur et capitaine général de Flandre et d'Artois.

Messire Floris de Montmorency, seigneur de Montigny, Hubermont, etc.

Messire Philippe de Sainct Aldegonde, seigneur de Noircarmes.

Schepenen van der Kuere.	Schepenen van Ghedeele.
Mer Charles van Ydeghem, heere van Wiese.	Joos van Brakele.
	Joos Donaes.
Jan van Pottelsberghe.	Willem van der Zype.
Willem van Sicleers.	Gaulthier Alaert.
Joncheer Willem van de Kethulle, heere van Assche.	Franchois van Wijchuus.
	Charles Everwijn.
Adriaen van Riebeke.	M^r Lievin de Grave.
Jacob Hueribloc.	Colaert de Scietere.
M^r Lievin Sanders, f^s Jans.	Jan de Commere.
Anthuenis van Wijchuus.	Gyselbrecht Terlez.
Lievin Petrins.	Gillis de Wint.
Jacob Feron.	Philips van Boonem.
Jan Baers.	Jan van Huerne.
Jan Meynkin.
Lievin de Scoemakere.

[p. 310]

Ontfanghers.

Jooris Vijts, bouchoudere.

Joncheer Pieter Cortewille, van de wercke.

Omaer Everwijn, van der Yssuwe.

Op den xxvj^en Meye was de papegay gheschoten van den grooten ende auden gulde van mijnheere Ste. Jooris, ende was de reede van allen den peerden die de coninck, te wetene: Joos van Brakele, gheseyt van den Bossche, filius Joos, eere deden, hondert ende lxij in ghetale, alwaer onder andere mede reet een vry vischcoopere deser stede, ghenaempt Herman Beys, zoo hy droncke zijnde, dat hy sijn peert metten treckene van den toome dede uprechten, zoo dat hy metten peerde viel ende 't peert boven op hem jeghen eens rijns wijnvat, zoo dat hy daer ter stede ende aleer die rede wel ghescheeden was doodt bleef.

Den ij^en Juny braken uutter vanghenisse van den nieuwen cypier Joos de Costere, vijf mannenpersoonen by den deken van Ronsse aenghegheven omme metten brande te stervene, ter causen van de heresye, ende braken boven 't dack in de gote ende lieten hemlieden sincken ende afrysen met haerlieder slapelakenen, die zy gheschuert ende aeneen geknoopt hadden, in zulcker wijs, dat zy lieden ontquamen.

[Item, in 't selve jaer, den xxvj^en Wedemaent, soo heeft men Sente Lieven afghestelt naer d' aude ghewoonte ende costume, ende is ghebrocht in den beuck van der kercken van St. Jans, nu gheseyt St. Baefs. (K.M.)]

[Op den xxvij^en der maendt van Juny waren twee vrauwen, d'een van Curterijcke ende d'ander van Comene, 's morghens curts naer den twee uren in den morghenstondt gebrocht

[p. 311]

binnen den Scepenhuus ter cause van der heresye, ende hadden by hemlieden totter noene priesters ende gheleerde mannen, omme hemlieden van de voornoemde heresie te stellene, dwelcke zylieden ontseyden, blyvende by huerlieder verdoolde proposte, ende worden also ghebracht in vierschare, ende ghecondempneert te sterven, ende danen gheleet in 's Gravencasteel, waer sy den twee uren naer de noene livelijc ghecorrigiert waren metten zweerde, ende also ghevoert buter Mudepoorte, ende daer in eenen put gheworpen ende begraven. (Pr. Ar.^B.)]

Op den xiij^en July waren te Ghendt ghesoden twee munters gheboren van Rijssele, gheheeten Jacques ende Jan Rogghe, ghebroeders, ende huerlieder moeder was ghestelt op een schavaut met een strop aen hueren hals, ende zelfs Jacques meyssen was van ghelijcken op een schavaut ghestelt met een strop ende was ghegheesselt totten bloede, ende waren ghebannen ende huerlieder goet gheconfisqueert.

Ten zelven daghe was een Philips Stuerbaut ghelugietere, woonende voor der Fremineuren te Ghendt, die hemlieden gheaddresseert hadde in huerlieder weerck, ende 't zelve ghelt hebben uutghegeeven, op de Veerleplaetse aen eene potence ghehanghen ende zijn goet gheconfisquiert; maer hem was door zijn oodtmoedighe biddinghe zijn kerckhof gheconsenteerdt, ende was begraven te Sente Nicolaes.

Op den xiiij^en July was te Ghendt ghedraghen processie generael, danof de vergaderinghe was te Sente Michiels, ende de dienst was ghedaen t' Sente Jans.

[Op den xxix^en der maendt van July was binnen Ste. Jansprochie, in de Mageleynstraet wonachtich eenen Lieven de Sloovere, schildere, de welcke by zijnder huusvrauw hadde

[p. 312]

diversche kinderen, onder andere twee in huwelijcken state, de welcke kinderen waren so groot dat die grootheere ende grootkin zeyden, ende selfs Lievens vrau es, naer dat zy grootvrau gheheeten was van de jonghe kinderen, bevrucht geworden ende gheleghen van twee kinderen. (Pr. Ar.^B.)]

Den xj^en September waren vier jonghe knechten die gherooft hadden ende waghens hadden helpen afstellen buuten der Mude ghehanghen.

Den xiij^en September was eenen Wale van dootslaghe ende andere faicten by hem ghecommitteerdt op de Veerleplaetse verberrendt.

Den v^en October was te Ghendt by mandement van de K.M., ende daer naer by trompette t' allen vierweechscheeden gheboden dat hem nyemandt vervoorderen en zoude in eenighe kercken ofte cloosters, up eenighe plaetsen oft maerten te wandelen, niet meer ter vischmaert dan elders, ende gheduerende dat men 't sermoen ofte hoogmesse dede op alle sondaghen, mestdaghen die by der kercke uutgheleyt worden, dwelck noyt te vooren ghesien en es gheweest, op sekere boeten.

Den xiij^en November waren binnen 's Gravencasteel gherecht metten zweerde drye vrauwepersoonen, ter causen van de heresye.

Op den xxj^en December, wesende Sente Nicasiusavondt, in den nacht, waren drye manspersoonen achter de Slijpstrate up de Leye met een barkette commende an 't schip van eenen Moerman turven ghelost hebbende, ende lach gheladen met blauwe schurren, ende braken 's nachts de plecht open, tusschen de een ende twee uren, ende de schipper 't selve hoorende quam uyt zynen roef ende sloot de plecht

[p. 313]

toe, ende hielt de voornoemde mannepersoonen ghevanghen totten dagheraet, ende worden in den morghenstondt by den officiers deser stede gheleet in de vanghenesse, ende op den xvij^en Lauwe daer naer de twee van dryen op de Vrydachmaert levende verberrendt, ende de iij^c was aen eene potentie ghehanghen; den eenen was Cornelis Jans gheboren van Breda.

Den xxiij^en Lauwe waren gehanghen op den Coorenaert deser stede aen eene cruysgalghe Daneel van der Gracht, gheseyt Goetdief, Jooris Diericx, gheseyt Sot, Pieter van den Broucke, gheseyt Mijn Kindt, ende Michiel de Keysere, gheboren van Hulst, de welcke hadden haerlieder kerckhof.

Op den xv^en Sporcle was binnen deser stede ghecommen een Francois Stalens, de welcke mordadelick dootghesteken hadde eenen man uut Zeelandt, ghenaempt den Ghistman, omme dat hy ten versoucke van eender partye t' oorcondtscepe gheweest hadde ten laste van den voornoemden Franchoys, omme welck faict ende meer andere hy ghehaelt was uten cloostere op 't Meerhem, ende op den xxv^en dito daer naer, was hy op de Hooftbrugghe deser stede onthooft ende was daer naer begraven ten Augustynen in 't cloostere, in de Cruyscappelle.

Op den viij^en Meye xv^clx reysden uut Ghent myneheeren hoochbailliu, onderbailliu ende schepenen van der Kuere met haerlieder pensionarissen ende secretarissen naer Assenede, ende was ter causen van der vaert den eersten steen van de binnenvaert by den hoochbailliu der voornoemde stede gheleyt, ende Jan Pottelsberghe alsdan voorschepene, midts der absentie van mer Charles van Yeghem, ruddere, heere

[p. 314]

van Wiese, aldaer wesende in de monsterynghe van den garnisoene, die leyde den ij^en steen.

In Ougste was de eerste steen gheleyt van de nieuwer brugghe te Riemen.