Memorieboek der stad Ghent van 't jaar 1301 tot 1793. Deel 2

[p. 297]

1558.

Commissarissen.

Messire Bauduin de Lannoy, chevalier, seigneur de Tourcoing, au lieu du gouverneur de Flandre.

Floris de Montmorency, seigneur de Montigny, Hubermont, etc.

Jacques de Croy, seigneur de Sampy, et en son absence Iehan de Hertoghe.

Messire Philippe de Saincte Aldegonde, seigneur de Noircarmes, et en son absence Iehan van Rooden.

Schepenen van der Kuere.	Schepenen van Ghedeele.
Mer Nicolas Triest, ruddere, heere van Auweghem.	Mer Jan Sallaert, ruddere.
	Joncheer P^r van der Cauwerburch.
Mer Jan de Grutere, ruddere, heere van Loovelde.
	Joncheer P^r Cortewille.
Lievin van Sycleers, heere van Gotthem.	Jan Beths.
	Willem van Sicleers.
Jan van Pottelsberghe.	Joos van Brakele, f^s Joos.
Jan Heindricx.	Loijs Hueriblock, over hem Adriaen Borluut.
Adriaen van Riebeke.
M^r Pieter Oosterlinck.	Willem Goetghebuer.
Lievin van Testele.	Jan van Beaufremez.
Lievin Cluetrijn, over hem Adolf de Grutere.	Lievin van der Muelen.
	Thomaes Blanckaert, f^s Pieters.
Heindric Zoete.	Joos van den Vivere.
Jan Dierkins.	Loijs Cluetrijn.
Lievin Heindricx.
Gillis van Loo.

Ontfanghers.

Franchois Hueribloc, bouckhoudere.

Adriaen de Wintere, van de weercken.

Jacob Rufelaert, van der Yssuwe.

[p. 298]

Op den ij^en Juny was begonnen maken ende achterganck vulmaect de Steenenbrugghe an 't Cuupgat, ende de strate ghebreedt.

In 't begin van den zomer quam de peste te Ghendt, ende begonste te cesserene t' Sente Jansmesse ofte daer ontrent.

In 't begin van den zelven zomer was by de Franchoysen ghewonnen de stede van Thionville, Duunkercke ende Winocxberghe, ende was in de zelve 't vier inne ghesteken, vreesende dat sy 't zelve niet en hadden connen ghehauden.

In 't begin der maendt van Juny was al Vlaenderen in roere, ende was ghedisiniert ten platten lande al dat van de audde was van xx jaren.

Den iiij^en Juny in dit jaer ende schependom was binnen deser stede ghedraghen eene schoone processie generael zeer costelick ende solemnelick met zwarten habyten, danof de vergaderinghe was binnen de kercke van Sente Jans ende insghelijcx de dienst.

Op den xiij^en July lviij heeft ghesleghen gheweest by mynen heere den grave van Egmondt uten name van de K.M. eenen slach jeghens de Franchoisen, over dese zyde van den watere by Grevelinghe, alwaer versleghen wierden: eerst, acht benden van ordonnantien van Franchoeysen, vijf cornetten lichte peerden, derthien vendelen voetknechten. Item, noch xiij vendelen Franchoisen, vijf cornetten lichte peerden, derthien vendelen voetknechten, noch xiij vendelen Franchoeysen. Item, x vendelen Duutschen die overgetrocken waren om den coninck t' assisterene, ende al d'artillerie ghenomen. De heere van Chaulne, gouverneur de Corbie, ghevanghen; de heere van Termes uppercapiteyn van de Franchoeysen ghevanghen; Pierre Strossy, gouver-

[p. 299]

neur van Calis, versleghen; de heere van Willebon, prevoost van Parijs, versleghen; de heere van Nieuvilles, gouverneur d'Abbeville, ghevanghen; de zone van den heere Hannibal, gouverneur van Normandie, ghevanghen.

Item, van onsen volcke de capiteyn Jaspar van Robbers, doot gheschoten in 't voorhooft met eender busse; de heere van Bevere, bailly van Brabant, was een arm afgeschoten; de heere ende grave van Egmondt in d'eerste scharmutsinghe was 't hooft van zynen peerde afgheschoten, ende in de ij^e bataelje een ander peert onder hem doot gheschoten.

Den xx^en July reysden deur Ghendt v^c Franchoeysen die ghedeelt worden in diversche steden, die in den slach ghevanghen waren by Grevelinghe.

Den xxj^en July reysde onse coninck Philips, grave van Vlaenderen uut Bruusele naer Onser Vrauwen t' Halle, ende van daer tot Atrecht, omme zoo naer den legher te zyne als 't hem moghelicke was.

[Op den voornoemden xxj^en dach van July waren te Ghendt op de Veerleplaetse twee schoone jonghe vrauwen verberrent, van de heresie. (Pr. Ar.^B.)]

Den xxiiij^en dito, was te Ghendt ghedraghen eene schoone costelicke processie generael, [daer medeghinghen, naer costume, de heeren van den rade, de bailliu met scepenen van beede de bancken, alle de heuverste ende gheswoorne van neerynghen, de vier guldenen van schutters, de vier cameren van rethorijcken, (Pr. Ar.^B.)] daer in persoone medegynghen de prelaet van Ste. Pieters ende de prelaet van Baudeloo, ende d'ander twee prelaten deden haerlieder excuse; de vergaderinghe was ghehauden t' Sente Michiels, ende de dienst was t' Sente Jans ghedaen.

[p. 300]

[Item, in 't selve jaer, op Onse Vrauwenavont halfougst, quamen binnen Ghendt vier vaendelen spaensche knechten, ende waren gheforiert by den bailliu van Ghendt, op de Vismerckt, in de Curtemunte, in den Hoyaert, op de Cooremerckt, in de Velstrate, ende alsoo opwaerts gaende tot Ste. Pieters ten spriete, ende bleven tot 's anderdaghs naer Onser Vrauwendach, ende alsdoen naer den legher van onsen coninck van Enghelant ende graef van Vlaenderen, daer hy alsdoen te velde lach jeghens den coninck van Vranckerijck met groote macht van volcke aen beede de syden te peerde ende te voete, ende deden malcanderen niet dat wonder was. (K.M.)]

Den xxj^en Septembre 1558 overleet dese weerelt de hooghe doorluchtige moghende prince de keyser Carolus van Roome, coninck van Spaengien, enz., hertoghe van Bourgoingnen, grave van Vlaenderen, ende was zyne uutvaert ghedaen by den coninck Philips van Spaengien, zynen zone, binnen der stede van Bruussele, ende overleet in 't rijcke van Spaengnen.

In dit jaer starf de coninghinne van Ynghelandt die ghetraut hadde Philips, coninck van Spaengnen, 's keysers zone, ende was de uutvaert ghedaen den xxij^en Decembris binnen der stede van Bruusele.

In 't dit jaer overleedt vrau Marie, douagiere van Ongarien ende Bohemen, 's keysers zustere, in 't rijcke van Spaengen.

In dit jaer starf coninck Christiernus van Denemercken, Zweden, enz., die ghetraudt hadde vrau Ysabelle, 's keysers zuster.

Den xviij^en Sporckele, waren op de Vrydachmaert verberrent twee ghesellen, d'een van Amsterdamme ende d'ander

[p. 301]

van Brugghe, omme diversche rooven, die zy ghedaen hadden by avonde ende nachte, afnemende den lieden haerlieder mantels ende cappen.

Den xxij^en Octobris was te Ghent, ontrent den drye uren naernoene, ghevanghen eenen Jooris de Vos, ballinck van Vlaenderen, ende was beleyt in sijns vaders huus, in Sente Niclaes kerekhof, ende daer was van beede zyden gheschoten met pistoletten; ende in 't Sausselet ghelevert zijnde op den xxiiij^en ten twee uren naer middernacht brac de selve ghevanghene ute, ende was by trompette ghestelt op hondert guldenen zoo wie hem vonde.

Item, in dit jaer waren op de galleye ghewijst zes ghesellen, omme vele ende diversche quade fauten by hemlieden ghecommitteert ende oock diversche dievereyen.

[Item, in dit schependom den xij^en in Maerte voor Paesschen was de peys ghecontracteert ende ghesloten te Camersijs (Cambresis), tusschen onsen coninck van Spaignen ende grave van Vlaenderen, ende den coninck van Vranckerijck, 's avonts tusschen vij ende viij uren; ende de selve peys was te Ghendt by de heeren van den rade in Vlaenderen uytghelesen ten Casteele, op den viij^en April xv^c lix naer Paesschen, ten ix uren voor den noen, ende ten xj uren op den selven dach was hy uytgheropen by schepenen van der Kuere met groote triumphe; Godt sy gheloft van sijnder gratie. (K.M.)

- Op den xvj^en April 1558 wiert de clercq van de greffier ghecommitteert van weghe schepenen van der Kuere, omme den bouck t' houdene van de vry huysen ende erfven binnen dese stadt ende schependomme, in de plaetse van wylent Lieven Buydens. (Pr. Ar.^C.)

[p. 302]

- Item, in dit schependom waren aldereerst verpacht den xxiiij^en April naer Paesschen de xij miten up den wijn, ende galt vierhondert xij ponden grooten, ende voor elke tonne crabbeleere (dat is gredt bier) moeste de brauwer gheven een blancke; dien pacht galt dry hondert vierentachentich ponden grooten, ende noch was verpacht de neghen-seskens van elke tonne clauwaert, die de brauwer gheven moeste, twee en seventich ponden groote; de somme van dese dry pachten beliepen achthondert acht en sestich ponden grooten. (K.M.)]