Memorieboek der stad Ghent van 't jaar 1301 tot 1793. Deel 2

1552.

Commissarissen.

Mer Adriaen de Croy, grave van Reux, gouverneur van Vlaenderen, enz.

Guillaume de Waelwijc, over mijnheere van Praet.

Mer Loijs van Heilweghe, ruddere, president van Vlaenderen, over mijnheere van Sampy.

Mer Hugues de Grammes, ruddere, heere van Winghene.

Schepenen van der Kuere.	Schepenen van Ghedeele.
Mer Charles de Grutere, ruddere, heere van Exaerde.	Adriaen Triest.
	Joos van Brakele, gheseit van den Bossche.
Meester Joos van Grijsperre.
Joos Donaes.	Philips de Vrient.
Jan van Pottelsberghe.	Gautier Alaert.
Jacob Cabillau.	Pieter de Vos.
Philips de Grutere, f^s mer Ghiselbrechts.	Loijs Bacheler.
	Gillis van Quickelberghe.
Mer Jacques Triest.	Jan de Buck.
Jan Damman.	Franchois de Clercq.
Loijs van Morslede.	Jan Dierkens, d'aude.
Meester Franchois van Hembyse.	Charles van Testele.
Jan de Backere.	Danneel de Deckere.
Charles Everwijn.	Cornelis van Zeveren.
Jan Deynaert.

Ontfanghers.

Pieter Cortewille, bouckhoudere.

Lievin van Secleers, van de wercke.

Pieter van Huckelghem, van de Yssuwe.

[p. 261]

Item, in dit jaer maecte de coninck van Vranckerijcke groote ghereescepe van orloghen, ende sonderlinghe in 't lant van Loreynen, ende nam inne veel stercten ende steden, ende de stede van Mets.

Item, de hertoghe Maurus ende Albrecht van Brandenburch waren ghealieert met den coninc van Vranckerijcke voornoemd, ende deden den Keyser groote oorloghe, ontrent Ysbrouc, ende Maurus nam inne de Cluuse ende ander stercten, ende hier in Vlaenderen moesten de ghegoede leenen groote sommen van penningen om adresse den keysere.

[Ende Adolf van Bourgongnen, heere van Wacken, wart met veel schepen ghesonden naer Spaegnen, ende hier liepen veele vremde nieumaren. (Pr. Ar.^B.)]

Item, in dit jaer vercocht men up 't lant van Vlaenderen losrenten den penninc xii, ende lijfrenten den penninc sesse, ende waren binnen Ghent drie persoonen ter Muden verberrent van quaden sticken.

Item, in Hoimaent slouch men te Ghent de trommele, alle de ghene die wilden commen ende laten hemlieden anscryven onder mer Philips van Caudenhove, men sauden elcken gheven eenen guldenen up de hant ende de reste saude men gheven te Bruusele, ende daer deden hem vele anscryven van Ghent ende elders.

Item, men screef ooc anne op Sente Pieters by Gheeraert Rijm, filius Lodewijcx, die ooc vele fraey knechten anscreef, ende brochse onder de bende van minheere van Lykerke.

Item, dese voornoemde ghesellen trocken alle uut Ghent, ontrent Maria Magdeleenendach, ende reysden alle duer Brabant, duer Namen tot in 't lant van Lutsenburch.

[p. 262]

Item, binnen desen somere es hertoghe Maurus ende de marcgrave van Brandenburch weder ghealieert met den keysere, ende hertoghe Maurus trac naer Hongheryen by don Fernandus, ende Brandenburch bleef by den keysere in 't bescudden van den coninc van Vranckerijcke.

Item, up Sente Baerbelendach was te Ghent gheboden processie generael met den Heleghen Sacramente, om te biddene voor der K.M.; want seker tydinghe commen was dat de keysere selve in persoone lach te velde voor de stede van Mets, welcke stede licht in 't lant van Loreynen.

Item, in dit jaer ende scependom voornoemt, in de maent van April, was doen maken een nieuw acoort up de weckers van der uerclocke up 't Belfroet, ende in elcken weckere doen maken eenen clepele, ende was by den selven scepenen gheordoneert dat men t'elcken sondaghe ende helichdaghe daer op beyaerden saude van den xii ueren tot den een ueren op de noene.

Item, in 't voornoemde jaer waren de gheestelicke ghetauxeert ende moesten betalen d'helft van haerlieden incommene.

[Op Onzer Vrauwenavont was by die van Ghendt buten der Mudepoort ghedaen onthoofden een die hem zeyde te zyne een Tempeleer ende heere van Rodes. (Pr. Ar.^B.)]