Memorieboek der stad Ghent van 't jaar 1301 tot 1793. Deel 2

1551.

Commissarissen.

Mer Adriaen de Croy, grave van Reux, gouverneur van Vlaenderen, enz.

Guillaume van Waelwijc, ontfanghere van Oostvlaenderen, over Mynen heere van Praet.

Mer Loijs van Heylweghe, ruddere, president van Vlaenderen, over Mer Jaques de Croy, heere van Sampy.

Mer Hughes de Grammes, ruddere, heere van Winghene.

Schepenen van der Kuere.	Schepenen van Ghedeele.
Mer Antonis de Baenst, ruddere.	Jan van den Eechoute.
Jan van Dixmude.	Mer Jan Salaert, ruddere.
Daneel van Pollinchove.	Pieter Cabelliau.
Jacob Vrient.	Jan Heindricx.
Pieter Cortewille.	Philips de Stoppeleire.
Geeraert de Stoppeleire.	Raphaël van der Sare.
Pieter van der Cauwerburch.	Jan Bets.
Antonis Sersanders, f^s Joris.	Adolf de Grutere.
Lievin Dhooghe.	Jan Heyman, f^s M^r Lievins.
Jan Meussins.	Lievin van Testele.
Loijs Hueriblock.	Gyselbrecht Terlers.

[p. 258]

Thomaes Heilinck.	Jan Schautheete, f^s Jans.
Pieter van Ackere.	Omaer Everwijn, f^s Franchois.

Ontfanghers.

Gillis Dieriex, bouchoudere.

Lievin Cluetrijn, van de wercke.

Guillaume Goetghebuer, van de Yssuwe.

Item, den xx^en van Meye in dit jeghenwoordich scependom soo consacreerde minheere de prelaet van sente Pieters neffens Ghent, van wijtsele ende gaf crune twee syner jonghe religieusen, te wetene: her Jan van Steelant ende heer Joos Boussins.

Item, in dit voornoemden scependom was bevonden datter eeneghe persoonen maecten vergaderinghe buuten Sente Lievinspoorte in eenen bosch, ende waren onderlinghe leerende ende prekende naer huerlieder ingheven, soo dat se bespronghen waren, op den xxxi^en Junius, wesende sondach, van den bailliu van Ghent ende den bailliu van Sente Pieters met huerlieder ghealieerde, ende daer waert er vijftien ghevanghen onder mans ende vrauwen, ende den meestendeel ghejusticiert met den viere.

Item, in dit scependom was by scepenen van Ghent ghecondempneert Lievin de Grave, backere ende wagenmakere, ghegheeselt te syne ende ghesleutelt up pellarin, ende bovendien ghebannen vijftich jaer uut den graefscepe van Vlaenderen van valscheden, ende hy en wilde de voornoemde sententie niet laten te executien legghen, dreighende bovendien eeneghe van der wet ende andere, indien hy 't moeste volcommen, met den brande; soo dat hem 's anderdaechs ghesonden waren twee biechtvaders, ende de eerste sententie

[p. 259]

was inghehauden, ende was in vierscharen verwijst ghehanghen te werdene ter Muden an de galghe, ende de voornoemde patient bleef al noch veel meer quaets sprekende ghelijc eenen uutsinneghen meinsch, ende daer hy naer 't gherechte reet was hem verbonden synen mont met eenen doncke seer stijf, ende commende an 't gherechte en wilde niet opgaen, soo dat een catrol an de galghe boven ghehangen was om hem op te treckene, ende endelic hy wert verwurcht an de leere sonder te biechten, welck compasselic was voor de siele.

[In dit jaer den viij^en van Hoymaent zo was er eenen dief by de stede ghepuniert ende was ghevoert up een scavaulte ende ghegeesselt lancx de straten, ende in de stede van ghecortoort te zyne, was hy ghebrant met eender G op zynen rugghe, dwelc te voren hier niet ghezien en was. (S.G.)

- Item, in dit jaer was den eersten steen gheleyt van de nieuwe vaert up 't Sas, ende aen den Zeedijk, den xix^en in Ougstemaent, by mer Antheunis de Baenst, ruddere ende voorschepenen van Ghendt. (K.M.)

- In dit jaer den viij^en, ix^en, x^en en xj^en in Januarie was 't zulc ongheweerte van winde, ende principalic den xj^en, zo dat den zelven dach van den grooten storme van winde veel diversche polders ende landen in Vlaenderen ende elders groote scade hadden, ende vele huusen ende keercken oock bedorven; up desen dach wayde omme een van de vier turrekens van Ste Niclaus binnen Ghendt. (S.G.)]

Item, in dit voornoemde jaer waren weder verpacht de nieuwe imposten van wyne ende biere ende vleessche, also wel te lande als in de stede, om te betalene seker somme van penningen der K.M. belooft te bescuddene den

[p. 260]

lande van Herwaertsovere, ende namen cours ende ginghen inne den eersten in Meye xv^e twee ende vijftich.