Memorieboek der stad Ghent van 't jaar 1301 tot 1793. Deel 2

1541.

Commissarissen.

Mijnheere van Ruex.

Mijnheere van Simpy.

Mijnheere van Gaesbeke.

Mijnheere van Grammez.

Schepenen van der Kuere.	Schepenen van Ghedeele.
Claeys Triest, heere van Auwegem.	Loys Alaert.
	Antonis de Baenst.
Jan van den Eechaute.	Andries van Quickelberghe.

[p. 218]

Joos van Eetvelde.	Joos van den Bossche.
Jan van den Kethulle.	Jan van Pottelsberghe.
Jan de Grutere, f^s mer Philips.	Fransoys Everwijn.
Philips de Stoppeleere, d'oude.	Jan van den Brande.
Jan de Grutere.	Jan d'Hooghe.
Claude Goetghebuer.	Jan de Backere.
Franchois van Nieuwenhuus, over hem M^r. Joos van Grijspeere.	Adriaen de Wale.
	Jan de Buc.
	Gillis Stalins.
Jooris van Crombrugghe.	Jacob van der Beke.
Joos Donaes.
Lievin Cluetrijn.
Andries Seys.

Ontfanghers.

Jan Ruffelaert, tresorier.

Adriaen Triest, van de werke.

Gillis Diericx, van de Yssuwe.

Item, in dit jaer was meester Joos van Caloen by den commissarissen ghecoren ende uutghelesen scepenen van Ghedeele, ende om dat hy toochde dat hy gheen poorter en was, wert weder ontsleghen, ende in syne plaetse was ghestelt Franchoeis Everwijn.

Item, den x^en in Wedemaent was te Ghent, by trompetslaghe gheboden, dat men gheen etelicke waren als boter, caes, eyeren ende andere victualge coopen en saude dan ter maert, up groote boete, ende ooc alle tavernen staende buten de heerstraten, dat men daer gheen bier vercoopen en saude, uutghenomen in 't bordeel.

Item, den xxvij^en in Hoeymaent deden scepenen van Ghent weder by trompette verbieden 't draghen van Sente Lievin tot Hautem, ende dat naer 't uutwysen den lxxv^en artycle van der nieuwer Consessie.

[p. 219]

Item, op den xxix^en der maent van....., des snacx, verberde 't brauwhuus van 't cloostere van Galileën van inviere.

Item, den xxx^en in Ougste soo dede men te Sente Nyclaes, in de kercke, de uutvert van Lievin Pien, ende als men offerde ende de vrienden gheoffert hadden, soo riep de biddere de vier dekenen, die waren ten vanghene van den overleden, dat se offeren sauden by der ordonnantie van der K.M., te wetene: de deken van de mueleners, de deken van den hudevetters, de deken van den cleercoopers ende de deken van de smeden, dwelc also ghedaen wert.

Item, in dit jaer berrende 't seere t'Antwerpen in de Maelgeryestrate wel xxvj^en huusen, tusschen der marct ende Onser Vrouwekercke.

Item, te wetene te Ghent was ghedreghen processie generael om te bidden voor de K.M.; want de fame was dat de Turcken in Hongheryen veel schade deden.

Item, den xix^en in Octobre waren te Ghent twee jonghe ghesellen ghejusticieert die veel quade saken ghedaen hadden, daer omme dat se buten der Mudepoorte levende verberrent waren, den eenen aen eenen stake ghebonden ende also levende verberrent, den anderen in de polye ghehanghen met eender ketene onder sijn oxele, ende 't vier was doen berrenen daer de patient levende in stont, ende was drye waerf uut en weder in laten vallen, up ende nederghetrocken, ende ten enden in 't vier laten vallen ende verberrent, ende binnen der selver weke was by den procureur generael van der selver bende eenen verberrent an eenen stake, ende op den xxij^en der selver maent was buten der Muden noch twee ghehanghen van den selven gheselscepe, aen een cruusgalge.

Item, den xxvj^en in Maerte was het Helich Sacrament,

[p. 220]

ghedreghen uut Sente Jacopshuus, ende ghestelt in de capelle ghenaempt den Noot Godts, daer de prochiekercke by den K.M. ghestelt ende gheordoneert was, ende de suffragaen van Doornyke wijdde ten selven daghe 't kerchof van der voornoemde prochiekercke in den name ende ter eeren van den Heleghen Kerst, ghelijc d'aude kercke te Sente Baefs was, ende men heet dese den Noot Godts 's Helichs Kerst.