Memorieboek der stad Ghent van 't jaar 1301 tot 1793. Deel 2

1538.

Commissarissen.

Mer Anthonis de Croy, riddere, heere van Simpy.

Philips de Lalaing, bastaerd van Hoochstrate, in de plaetse van den grave van Hoochstrate, synen vader.

Mer Hughe van Grammez, heere van Winghene, riddere, in de plaetse van den heer van Noircarmes.

Maximiliaen de Hornes, heere van Gaesbeke.

[p. 122]

's Heeren kiesers.	Der stede kiesers.
Jan de Vos.	Jan Brouckaert.
Mer Jan de Steercke.	Adriaen de Wale.
Joncheer Claeys Triest.	Willem Stoop.
Jan Theyssins.	Jacob van der Beke.
Schepenen van der Kuere.	Schepenen van Ghedeele.
Gyselbrecht de Grutere.	Jan Damman, heere van Oomberghe.
Lievin Pien.
Jan de Brune, over hem Jan Brouckaert.	Lievin van Beke.
	Gillis Diericx.
Willem van Hembyse.	Andries van Quickelberghe.
Berthelmeeus de Backere.	Jan Pauwels.
Gillis van Huffele,	Jan de Bellemakere.
Anthonis de Baenst.	Jan Ruffelaert.
Jacob de Sceppere.	Willem Cocquut, over hem Lievin Dherde.
Lauwerijns Macharis.
Jan Meussins.	Jacob Alsberghe.
Pieter de Schuutere.	Joos Codde.
Claeys Baes.	Oste van den Wale.
Thomaes Heylinc.	Bauwin van Kerrebrouc.
	Gyselbrecht Tarles.
Heuverdeken.	Deken van de Weverie.
Jan de Bloc.	Reynier van Huffelghem, over hem Joos van der Haghen.

Item, in dit jaer was te Ghent een scoone batementspel van Retoryken daer vele scoone prysen te winnen waren voor den upperprijs van den spele van sinne, danof d'uutstel van der reghele by die van Ghent uutghestelt welc den mensch stervende den meesten troost es, ende de upperprijs was vier selveren cannen, weghende ix maerc Troys, de naerprijs drye selveren cannen, weghende zes maerc Troys, de derde prijs drye derden deelen, weghende v maerc, de

[p. 123]

vierde prijs drye selveren coppen, weghende drye maerc, de v prijs ij coppen van ij maerc, de vj prijs eenen cop, en noch vele sconen prysen van incommene, van vierne van steden ende durpen; ende van batementen in 't sotte iij selveren coppen, de naerprijs ij coppen, de iij prijs twee coppen, t' samen weghende een maerc Troys; de vierde prijs een schale zes onsen swaer, de vijfsten prijs vier onssen, de seste prijs een schale van iii onssen ende noch andere zes prysen van voorts commene ende van refereynen in 't vroede, in 't amoruese ende in 't sotte; de prysen van den factuers in 't vroede ende sotten spel, ende noch zes prysen van best den sot te makene, ende den prinschepalen prijs van den spele hadden die van Andworpen.

[.... Die van Ste. Wynocx den tweesten ende Thielt den derden. (S.G.)

- In dit jaer, den iiij^en van Maerte, soo reysde uyt Ghendt Joos van der Stoet als bode van der Rethorica in Zeelant ende Hollant, ende quam weder in de Paesdaeghen (15) 40. Item, 't es te weten datter acht boden uytghesonden waren. (K.M.)

- Den x^en July quam logieren de heere van Sempy shoochbaillius, ende men gaf hem gheenen presentwijn. (Pr. Ar.^B.)

- In dit jaer was uutgheleyt de macht van de vinders, ende hoe verre dat zy huerlieder bestreck hebben. (Pr. Ar.^B.)

- In dit jaer waren de ghevanghene van settynghe ende pointinghe t' Aelst, Deermonde ende t' Audenaerde ende elders ontsleghen, up belofte van wedercommene als zy 't versocht zullen wesen. (Pr. Ar.^B.)]

Item, in dit jaer ende scependom vergaderden de coninc

[p. 124]

van Vranckerijcke ende de coninghinne van Hongheryen, voor ons regente van dese Nederlanden, te Compiengien.

Item, den..... van October reysden uut Ghent naer de coninghinne om te belettene den last die men den lantvolcke dede, ter causen van de voorgaende begherte, ten eersten beede de dekenen, twee scepenen van de Kuere, te wetene: Lievin Pien ende Willem van Imbiese, twee scepenen van Gedeele, te wetene: Gillis Diericx ende Jan Rufelaert, ende voort uut eleken lede van der stede twee, te wetene: van der poorterye joncheere Chaerle de Grutere, heere van Exaerde, ende Adriaen Triest; van der weverye was Jan de Vettere ende Jan Brouckaert; van neeringhe waren Roegier van Sonnemaere ende Jan van der Fonteyne, ende meestere Jan Baert was mede om de propositie te doene.

Item, in 't voornoemde jaer ende scependom overleet de keyserinne geselnede van hertoch Kaerle, keyser van Roome, ende op den laetsten van Meye was te Ghent huere uutfaert ghedaen.

Item, in 't voornoemde jaer, den sevensten in Hoeymaent, gaven scepenen der ghemeente te kennene by colatien den staet van der stede ende vraechden of men alle voorgaende assysen verpachten wilde; maer 't en was niet gheconsenteert voor dat vulcommen zijn zoude 't slot van der lester colatie, inhaudende twee poeinten, te wetene: dat men de prevelegien prenten zaude, ende dat men 't lantvolc bescudden zaude van alle settinghen, te Ghent niet gheconsenteert.

Item, den xxiiij in Hoeymaent was men in 't secreet in 't Beelfroot; maer daer en waren niet vele prevelegien ghelesen, ende hier mede meenden zy 't volc te payene.

[p. 125]

Item, den (xxiiij) in Hoeymaent was 't wederomme colatie, maer de assysen en wierden niet gheconsenteert te verpachtene voor dat corexie ghedaen zijn zaude van de ghene die dlant belast hadden buten den sloote van colatien, ende ooc die men ten laste leyde van eeneghe prevelegien, die by hemlieden ontvremt zijn zauden, midts dat eenen Pieter de Voocht, filius meester Andries, der stede smet, te kennen gaf als dat hy in 't jaer xxxvj uut laste ende by bevele van meester Philips van de Ketulle, in dien tijt voorscepene van der Kuere, een slot af smeet van den secrete in 't Beelfroot.

Item, den xxviij^en in Hoeymaent ginc men wederomme in 't secreet, ende men haelde ute de lade met der A, ende men brachtse op den colatie-soldere, ende men begonste te lesen ende uut te scryvene de prevelegien, ten bysyne altijts van eenighe dekenen ende alle andere die 't gheliefde te commene.

[Den iiij^en in Meye bedaghende, wart up de Hoochpoort in 't Peert eenen wulghen mey ghestelt, ghestoffeert met dootshoofden, ende woonde daer in 't huus Jan de Laray, dienaer van der stede, ende dezen mey wart ghedreghen up Sente Nyclauskerckhof by de andere hoofden. (Pr. Ar.^B.)

- Den vj^en in July wart het bestandt up het scepenhuus by M^r Jan Baert, present de hoochbailliu ende de scepenen, elc ligghende up een fluweele cusse met twee tortsen, uutgheroupen. (Pr. Ar.^B.)

- Den xiij^en July drouch men processie general; men vergaderde t' Sente Jacobs, ende de dienst was t' Sente Michiels, ende men drouch 't Sacrament van Ste. Jacobs onder den troone, ende de dienst was ghedaen by den

[p. 126]

souverain van Luudicke, heere..... van der Gracht, broeder van den hoochbailliu, die te vooren gheweest hadde prior van de Augustynen. (Pr. Ar.^B.)

- Achter de processie quamen de heeren van Dronghen, Baudeloo, Sente Baefs ende Sente Pieters, de heeren van den rade met huerlieder consoorten, daer naer de wet van Ghendt, alle de dekenen metten gheswoorne, die van Sente Jooris, Sebastiaen, Sente Anthuenis, de camere van Rethorijcke, elc met eender kersse in de handt, ende lanxst der strate ghynghen de liij cnapen met tortsen van zes ponden in de handt, elc met zynen wapene ende d'ander zyde also veele van der weverie. (Pr. Ar.^B.)

- Den vj^en July was by dheeren van den rade onthooft een pacient ter plaetse ghecostumeert, ende daer viel questie tusschen den procureur generael ende den hangmeester dat hy hem ontseyde breeder dienst, so dat de procureur met zyne hussiers ende messagiers het lichaem selve up het rat rechten moesten. (Pr. Ar.^B.)]